1 Corintios 1

₁Aỹim Pablo, ma' ỹimo' loỹaxanaxat ñi qota'olec quiyim ỹauaaque aỹim lelaatec so Jesucristo. Iỹaatac ñi qarqaỹa Sóstenes. ₂Ca' nagui selatalo qamiri ana ỹerecse, qamiri ỹaqaỹaripi ma' mashic viilec ñi qota'a, ñiita'ñi na na'a' lodegaxat Corinto. Qamiri lalamaxarete' ñi qota'a, ma' na'yiitau'a so Cristo Jesús. Ñi'maxare roỹaxañiỹaxaua' ma' ỹahotaque quiyim co'taxat da nachaalataxaguii, 'nejem ná'ogue na 'neeta'ogalo naua liỹa' 'lauari ná'maq mashic nqouagaxaintacot so qara'gaxala' Jesucristo, só'maq la'gaxala' na'maxare, neete'm qomi'. ₃Sahotaque coñiguit da qouagaxa chaqai da na'maxa chicqo'ot ñi qota'a chaqai so qara'gaxala' Jesucristo.

₄Ca' chaqai shintari' quiyim saantacot da ña'aachicyaxac ñi qota'a queda 'ñiita, ma' so Cristo Jesús ỹoviraqta'ogalo qamiri da lqouagaxa ñi qota'a. ₅Ma' na'yiitau'a so Cristo, ca' ñi qota'a ỹaanema qamiri ná'ogue na ỹoreta'oguit nesallaxa se re'xogui quena' ỹaanema qamiri da retaxaỹaxaguii chaqai da ra'deenaxanaxahi. ₆Ma' dá'maq na'qaatec queso Cristo mashic re'oq lliqueta quiyim ñaxatouguilo qamiri. ₇Ca chaqaida 'neeta quiyim qaica ca viñitaque quená'maq lame ñi qota'a, ca chi nauaañitaque ca na'xa'a quiyim novi' so qara'gaxala' Jesucristo. ₈So'maxare ỹaatqajam nolliichiriñi, ỹoviraqta'guita qamiri ca lqodoc ná'ogue najo, qaiyi qaica ca ishit pataxalgoto ca nasauaxaset qamiri ma' novi' ca qara'gaxala' Jesucristo. ₉Ca' ñi qota'olec ỹaatqajam ipacqajanchiguilo naua la'qaatqa, ma' chaqaiñi ñí'maq roỹaxanalo qamiri quiyim nouañiỹau'a da nachaalataxac so llaalec Jesucristo só'maq qara'gaxala'.

₁₀Ỹaqaỹarolqa, ñi'xoresentouguilo qamiri, sahote'e da leenaxat so qara'gaxala' Jesucristo quiyim se neuagaxachiỹac, ta'ta'a quiyim na'yiiñiỹata', le'en quiyim neuagaxachiỹac. Ta'ta'a ne'xoriñiỹata', cá'ogue ca ra'deenataxanaxaguii quecá'maq 'ñiita. ₁₁Shinac dajo, ỹaqaỹarolqa, ma' na lauo' añi qarqaỹa Cloé ra'qaataxañim quiyim se neuojñiỹata' qamiri. ₁₂Ma' quedajo re'qoota quiyim se natenta' naua ra'qaataxahi. Ma' 'uo' quen na 'naac: “Aỹim ỹa'gaxala' so Pablo”; chaqai 'uo' quen na 'naac: “Aỹim ỹa'gaxala' so Apolos”; chaqai 'uo' quen na 'naac: “Aỹim ỹa'gaxala' so Pedro”; chaqai 'uo' quen na 'naac: “Aỹim ỹa'gaxala' so Cristo.” ₁₃Qam shinac: ¿peeta'a neuagaxata'chi so Cristo? ¿Loqo'm ỹim qaypatenalgoto qamiri? ¿Loqo'm qarachilaxanataxana caqamiri na'le da ỹeenaxat? ₁₄Aỹim saantacot da ña'aachic ñi qota'a, ma' ỹim sqaica ca ỹachilaxanatec caqamiri, qaicaata ca Crispo chaqai ca Gayo, ₁₅qaiyi qaica ca 'naac qanachilaxañigui na'le da ỹeenaxat. ₁₆Chaqai qai'neeta ỹachilaxanatec so Estéfanas chaqai so lauo' laseripi, ca se ño'uenegue quiyim 'uo' ca liỹa ỹachilaxanatec. ₁₇Ma' so Cristo se yila' quiyim sachilaxanataxan, ta'ta'a quiyim sa'xatetac da nca'laxa. Qam se souen da chi la'deenaxanaxa ca chaqai qom, qaiyi se so'taxat quiyim 'ec sqaica ca 'negue da lelauaxa so Cristo na' qaipateno.

₁₈Ma' da na'qaatec queda lelauaxa so Cristo na' qaipateno 'eco' chaqai mogollishic quená'maq tai'a quiyim na'laañi. Qam qomi' ma' saaqa'a da nca'laxa, ca' dajo na'qaatec lquesaxanaxa ñi qota'a. ₁₉Ma' 'naac da naneretañi la'qaatec ñi'maxare:

₂₀Ca' nagui ¿negue' ca 'neco' ca 'deenaxanqachaqaic, loqo'm ca napaxaguinataxanaq, loqo'm ca ỹa'den ỹa'xat na huelecna? Ma' dá'maq na'deenec huelecna, da'maxare 'eco' mogollishic nqai'en ñi qota'a. ₂₁Ca ma' ñi'maxare ỹa'deentalec cá'maq ỹo'uet, ca ỹo'uet quiyim se qaỹa'den quená'maq na'deenaxanaxa huelecna. Chaqaidaata quiyim ỹahotaque nca'laxatec ná'maq huelec ñi'maxare, chicqochigui nqai'en da la'qaatec, 'eno' 'ec mogollishic quená'maq liỹa qomyipi.

₂₂Na judioipi ipaquetaque iuanchigui ca netanec se qaiuanapega, chaqai na mesqai judío ipaquetaque ca 'xoic na'deenaxanaxa. ₂₃Qam qomi' sa'xatqatac da na'qaatec na' so Cristo qaipateno. Na judioipi quena' 'xaỹa da na'qaataxanaxac, ca ỹaatqajam npocoxolec, chaqai quena mesqai judío laseripi quena' 'xaỹa, 'eco' 'nejem ca chaqai mogollishic nqai'en. ₂₄Qam quená'maq qota'a loỹaxanqateripi quena judío laseripi chaqai na mesqai judío, na'maxare ỹa'deenta quiyim so Cristo chaqaiso so lquesaxanaxa chaqai la'deenec ñi qota'a. ₂₅Ma' dá'maq quena qomyipi 'neetapega chaqai mogollishic chicqo'ot ñi qota'a, da'maxare napacalec ná'ogue na na'deenec huelecna; chaqai dá'maq 'neetapega quiyim 'eco' qaica ca lquesaxanaxa chicqo'ot ñi qota'a, da'maxare napacalec ná'ogue na nquesaxanaxa hueetalecna. ₂₆Qamiri ỹaqaỹarolqa, ñaq retañii quiyim roỹaxanalo qamiri ñi qota'olec, 'eno' chaqai qailligueme' ca ra'deenaxanaxahi quená'maq huelecna, chaqai sqaica ca nalou'a quiyim nashi, loqo'm chicqaugui na choxoraiquipi. ₂₇Qaidaata quiyim ñi qota'olec nca'au'a ná'maq qohinac qaica ca ỹa'den, ma' ỹahotaque ỹayilqochit na 'deenaxanqachaqaiquipi. Chaqai nca'au'a na qohinac qaica ca lquesaxanaxa, ma' ỹahotaque nayiloxoñigui lauel nqai'en na quesaxanaxaiquipi. ₂₈Ca' ñi qota'a lca'acsec ná'maq sqaica ca lemaqachic, ná'maq naqaigaxat, ná'maq ỹaatqajam qaica ca 'negue, ma' ỹahotaque ỹapalaxat ná'maq 'ue ca 'negue, ₂₉qaiyi qaica cá'maq nemaqajantac quiyim ỹovira'a ñi'maxare. ₃₀Ma' chaqaiñi ñí'maq qota'a ỹo'uet quiyim na'yiitau'a so Cristo Jesús; chaqai ỹo'uet quiyim chaqaiso so'maxare qara'deenec, chaqai chaqaiso chigoxochichigui quiyim qaỹa'maxarente' qomi' quiñi qota'a, chaqai qomi' lalamaxarete', chaqai quiyim qomi' yca'laxauec. ₃₁Ca “no'm 'ue ca shim napacqachin, hua' qam no'uen quiyim ỹapacqachin so qara'gaxala'.” Ma' 'eda da 'nerac naua nerecse' la'qaatqa ñi qota'a.