1 Corintios 13

₁No'm ỹim sa'xateta'pe naua la'qaatqa na qom chaqai naua la'qaatqa na chicqashiguim qota'a lelaatqaipi, qam quiyim sqaica ca i'xorenataxanaxa, ca shintari' aca nouaxana quiyim ilamtapigui, loqo'm aca nasaquinata quiyim qaỹasaquintapigui. ₂Chaqai no'm sa'xateta'pe naua la'qaatqa ñi qota'a, chaqai sa'den ná'ogue nanchaqaina se re'xogui, chaqai somata'ta' ná'ogue na na'deenaxanaxa, chaqai queda ipi'ỹaxac mashic ỹovita quiyim seshit ñqo'naxat aca ladocai quemaralec, qam quiyim qaica ca i'xorenataxanaxa, qaiyiita qaica ca shinegue. ₃Chaqai no'm saan ná'ogue na hueetaỹot, chaqai no'm saanec na ỹoshicmaxa quiyim qaỹavigaxat, qam qaica ca i'xorenataxanaxa, qaiyiita qaica ca 'negue caỹim.

₄Cá'maq 'ue ca le'xorenataxanaxa ỹaatqajam 'ñaaxaic lauel, 'naxanaxaraic, se pa'guenaxanaxaic, se napacqajnaxai, chaqai se nemaqajnaxai. ₅Se ỹo'uet ca layiloxo ca liỹa, chaqai se imitetaque ca chi la'maxa. Chaqai se ro'o, chaqai sqai caapeguem ca qohine'tegue. ₆Se netoongue ca lasauaxaset ca liỹa, qaidaata dá'maq lliqueta netoongue. ₇Chaqai ná'ogue nanchaqaina na'ñaxachiguit, ma' 'ue da lpi'ỹaxac, naquitaxac, chaqai da leualaxavic. ₈Da ne'xorenataxanaxa sqaica ca lqodoc. Ca 'uo' ca na'xa'a quiyim tot qaỹa'xate' naua la'qaatqa ñi qota'a, chaqai tot qaỹa'xate' naua se qaiuanapegalo na'qaatqa, chaqai tot qaỹouen da na'deenaxanaxa. ₉Ma' 'ue na hua'ñi na sa'deenaq, chaqai 'ue na hua'ñi quiyim sa'xataxai' naua la'qaatqa ñi qota'a. ₁₀Qam ma' ỹovita quiyim dá'ogue sa'deenaq, ca' palac ma'le ná'maq se nalogoñi.

₁₁Ca na' ñaqaỹim noctoqui', da itaxaỹaxac, ỹa'deenataxanaxac, chaqai da ỹa'ajanaxanaxac shintari' quiyim aỹim noctoqui'. Qam na' sovita quiyim mashic aỹim ỹale, ca' saxanñi da shintari' na' ñaqaỹim noctoqui'. ₁₂Ca' chaqaida 'nejem nagui 'ue ná'maq seuanaxa, qam napalalec 'ec aca na'ỹoxolate quiyim i'telqatalec. Qam ma' ỹovita ca na'xa'a, ca seuanaxa ỹaatqajam ná'ogue re'qojlec. Ca' nagui saqa' nalogoñi dá'maq sa'den, qam ma'le ma' ỹaatqajam ná'ogue sa'deenta, 'nejem quiñi qota'a ỹa'den aỹim. ₁₃Ca' chaqaida, quiyim da npi'ỹaxac, chaqai da quitaxac, chaqai da ne'xorenataxanaxa qaica ca lqodogue'; qam dá'maq ỹapacauec quedaua tres, dá'maq ne'xorenataxanaxa.