1 Corintios 16

₁Qam quiyim 'viichii aca rotaanaxanqachii queca qarqaỹaripi qarpi'ỹaxauaripi, ca qaỹadenaxachichigui da ỹapaxaguinataxanaxac na' saanem ná'maq mashic icoñiguit da na'qaatec neeta'ñi yi' 'laua, leenaxat Galacia. ₂Ca quena' ỹovire'oga ca 'auaxaic na'xa'a cayi semana, ca' quiñi 'óna caqamiri ỹa'ue aca ỹoỹoote'oga cacá'maq chi nalootau'a. Ca' ỹa'maxat, qaiyi se qaỹo'uet quiyim 'ue aca qalapon notaanaxanqate ma' sovitalo qamiri. ₃Ca ma' sovitalo qamiri, ca' sa'vii caua qomi' selajtegue da Jerusalén quecauá'maq qomi' qanca'au'alo caqamiri. Ca' sa'ue aca ỹerecse, ca' i'xate' aca rotaanaxanqachii quiyi qarqaỹaripi neeta'anyi. ₄Chaqai no'm qaỹouen quiyim ashic, ca' ñauequetecto ma'le caua'maxare.

₅Queda ỹicyaxac sahotaque shiquejlec ma'le yi 'laua, leenaxat Macedonia, ca ma' ime, ca saigue ma'le da Corinto. ₆Sqoue sa'vii na'xata' sentauguilo qamiri, loqo'm ná'ogue na no'oomaxa sentauguilo qamiri. Ca ma' ime, ca' qamiri shichii yotauañii caca yinotaxaqui quecá'maq saigue ma'le. ₇Ma' ỹim se sa'maxaren quiyim 'eco' chaqai sajalgoto qamiri. Ta'ta'a quiyim sa'vii caua na'xata' sentauguilo qamiri, no'm ỹasene'tem aỹim da ỹicyaxac ñi qara'gaxala'. ₈Qam sahotaque sena'ñi na Efeso ỹovireta'oga ca na'xa'a, leenaxat Pentecostés. ₉Ma' quena'maxare qaica ca yo'taxat quiyim so'ueenataxan, qaiyi 'xoic ca huelec so qara'gaxala', qam 'xoic na npa'guentac.

₁₀Ca no'm ỹovitalo qamiri ca Timoteo, nquipichiỹa'pegue' quiyim ỹa'maqachiguiñi nqai'ñii quiyim neetauguilo qamiri. Qaica ca huapigui lauel nqai'ñii, ma' ca'maxare qai'neeta ro'ueenataxantac queda lo'ueenataxanaxac so qara'gaxala', 'nejem aỹim. ₁₁Vichiguiño' 'maxaraic quiyim qaica ca liỹoqa'piguit ca'maxare. Ta'ta'a quiyim otauañii queda llicyaxac, qaiyi qaicanqaida, ma' ỹim ñauaantaque ma' liỹareta'pe caua liỹa' qarqaỹa', qaiyi ñauañiguita.

₁₂Qam so qarqaỹa Apolos ỹaatqajam yipaca'a quiyim queguelo saua liỹa' qarqaỹa' quepegueto qamiri, qam sqai eec nagui. Qam eeco' ma' 'ue ca ledaaqa'.

₁₃Ỹaatqajam nelohitec, chaqai na'ñaxachii'tegue da rpi'ỹaxaguii. Na'maxachita, 'ñiitari' ca ỹale quesaxanaxaic. ₁₄Quená'ogue ná'maq 'viichii ỹaatqajam quiichigui nqai'ñii da re'xorenataxanaxahi.

₁₅Ca' nagui qamiri ỹaqaỹa', mashic 'yiiñita na llaalqaipi ca Estéfanas ná'maq 'auaxaic icoñiguit da na'qaatec quená'maq na'ñi yi 'laua, leenaxat Acaya, chaqai mashic ỹaanec da la'qaatec quiyim ỹotauan na qarqaỹaripi ná'maq mashic icoñiguit da na'qaatec. ₁₆Qam sahotaque quiyim qamiri na'xaỹaxañii'ta ca qom 'neete'm saua'maxare, chaqai ná'ogue ná'maq rotaanaxantac chaqai ro'ueenataxantac. ₁₇Qam nagui ñitoontac, ma' novite' yaua Estéfanas, Fortunato chaqai ñi Acaico. Ma' yaua'maxare ỹo'ueete' ná'maq sqai shichii 'viichii, ma' sqaicaua qamiri. ₁₈Ỹaatqajam nqo'naxatec da na'ñaaqataxac da ñachaalataxac, chaqai qamiri qai'neeta. Ca' qaỹa'deena'alo caua qomi' 'neete'm saua'maxare.

₁₉Na mashic icoñiguit da na'qaatec neeta'ñi na Asia ilatalo qamiri da liquinaxanaxac. Aquila chaqai Priscila chaqai na mashic icoñiguit da na'qaatec lapooqo' yi la'a' saua'maxare, caua'maxare ỹaatqajam 'xoic da liquinaxanaxac nelatalo qamiri, ma' qamiri lpi'ỹaxaua'. ₂₀Ná'ogue na qarqaỹaripi ilatalo qamiri da liquinaxanaxac. Ca' ñi 'óna nqo'goq ma'le ca liỹa quiyim niquine'e', chaqai ỹaatqajam ne'xorenta'.

₂₁Aỹim Pablo selatalo qamiri da iquinaxanaxac, sahote'e ana chi ñapoquena quiyim shiriñi.

₂₂Ca no'm 'ue ca se nqo'ta so qara'gaxala' Jesucristo, ca ca'maxare hueetalec da chalego lecaic nouaxanaxaset. ¡Qami' qara'gaxala', ma'le sqaỹaloq rapilli'!

₂₃Ca' so qara'gaxala' Jesucristo ỹaanema qamiri ma'le ca no'uen qayicyaxaguii. ₂₄Qamiá'ogue qamiri selatalo da i'xorenataxanaxa chicqo'ot so Cristo Jesús. Ajá'a, ca' chaqaida 'neeta dajo.