Da na'qaatec queso Cristo na' qaipateno
1Vichiguiño' qamiri ỹaqaỹa', na' sovitalo qamiri, ca sa'qaataxanalo qamiri queda lliqueta na'qaatec chicqo'ot ñi qota'a, qam se souene' naua la'qaatqa na 'ue na ỹa'den, chaqai naua qalaraqa na'qaatqa. 2Qam na' salequetauguilo qamiri sqaica ca liỹa sahotaque sa'den, qaisoota so Jesucristo só'maq qaipateno. 3Ca na' sentauguilo qamiri, sqaica ca iquesaxanaxa chaqai yi'loxolqachit da ỹoqolonaxa. 4Vichiguiño' na' setaqatac sa'xatetac da na'qaatec, qam se sahota'ahi caua 'deenaxanqachaqaic la'qaatqa, qaiyi ma' pi'iỹa'a da na'qaatec, qaisoota chicqo'ot so Espíritu Santo chaqai da lquesaxanaxa ñi qota'a. 5Qaiyi queda rpi'ỹaxaguii mese na'deetalec ca la'deenec ca chaqai qom, chaqaidaata da lquesaxanaxa ñi qota'a.
Ñi qota'a nachaxan chigoxochichigui so Espíritu Santo
6Qam qomi' sa'xataxai' naua letaxaỹaxaco naua 'deenaxanqachaqaqa, qam taỹaugui ná'maq mashic 'chichiguiñi da lpi'ỹaxac. Qalaxam dajo na'deenec sqai huaalecna, chaqai sqa chicqaugui na nashillipi hueetalec najo, ná'maq taata'a quiyim qaỹaloq imeho. 7Qaidaata dajo na'deenec sa'xatqatac, dá'maq se re'xogui chicqo'ot ñi qota'a. Da'maxare chaqaido' da ỹahotaque ñi'maxare na' saqa'leca na 'laua na' ỹahotaque da qarca'laxa sqaica lqodoc. 8Na nashillipi hueetalecna qaica ca ỹa'den dajo na'deenec. Ma' quet ỹa'den, ca se qaipateno so choxoraic qara'gaxala'. 9Qalaxam taachigui dá'maq naneretañi na'qaatec, 'naac:
Ñi qota'a ỹa'maxatetañi quiyim ỹaanem ná'maq nqo'ta ñi'maxare,
quená'maq qaica ca iuana chaqai 'xaỹa,
chaqai vire'ta se ỹa'deentapega.
10Qam dajo ỹa'deenaxanaxanque qomi' ñi qota'a, chicqochigui nqai'en so Espíritu Santo, ma' so'maxare imitetac ná'ogue, chaqai ỹovira'a quiyim ỹa'den ná'maq 'xoic lecaic se re'xogui 'neeta'pegue ñi qota'a.
11Quena qomyipi ¿negue' queto' ca ỹa'den ca hueetagui aca le'taxanata ca liỹa qom? Qaicaata ca'maxare ma' chi no'ueenataxac, ca ỹa'den. Ca 'nejem ca chi no'ueenataxac ñi qota'a, qaicaata ỹa'den ca 'neeta'pegue ñi'maxare. 12Qam qomi' se seconaxaguit ca 'ueenataxac hueetalec najo. Qaisoota so Espíritu chicqo'ot ñi qota'a, chaqaiso so seconaxaguit, qaiyi sa'deenaq cá'maq lqouagaxanaxat ỹaanema qomi' ñi'maxare. 13Qam qomi' quena' sa'xataq dajo quena' sa'xataxai' naua na'qaatqa, ca ỹapaxaguine' qomi' so Espíritu chicqo'ot ñi qota'a, ca' mesqainaua quiyim chi sachigoxotqaugui da chi qara'deenaxanaxa. Qam dajo 'neeta da sa'xataq naua se re'xogui leloxoỹaxaco quiyim sa'xatqaem cá'maq mashic neetagui so Espíritu Santo.
14Ca qom sqai neetagui so Espíritu Santo, se ishit icoñiguit da lo'ueenataxanaxac so ne'Espíritu ñi qota'a, ma' ca'maxare quiyim na'xaỹaxantapega, 'ec nqai'en chaqai mogollishic. Ma' se ỹa'den da'maxare. Ma' quena' qaimitaque ca leloxoỹaxac dajo, ca ipaquetaque quiyim qaỹotauan queso Espíritu Santo. 15Qam ca qom neetagui so Espíritu ishit ra'ỹaauec ná'ogue nanchaqaina, qam ca'maxare qaica ca ishit nimichiguit. 16Ma' yaua naneresañi na'qaatqa 'nerac: “¿Nega'ỹo' ca ỹa'den ca la'deenataxanaxac ñi qara'gaxala' qota'olec? Chaqai ¿nega'ỹo' ca ishit ỹapaxaguin ñi'maxare?” Qam qomi' mashic hueeto'oto da la'deenataxanaxac so Cristo.
