So Elías lotqai liỹa ỹovira'a so Acab
1Ca co'na' mashic shi'gom na' mashic ỹoxe'ueque saua tres ñaxari, ca ñi qara'gaxala' ỹilen so Elías, 'naaco':
—Mo'e', quirepegue' ñi Acab, ma' ỹim mashic sahotaque sa'ue ca ỹaxat quena 'laua.
2Ca' so Elías eec, quepegue' so Acab. Quiyi Samaria ỹaatqajam 'xoico' so nqopaaxa. 3Ca' so Acab roỹaxana so Abdías só'maq neloxoỹaq quiyi la'a'. Qam so Abdías ỹaatqajam huejlec ñi qara'gaxala'. 4Chaqai co'na' aso nashi Jezabel relaataxanlec quiyim qaỹalauat na lca'acsec letaxaỹaxaquiripi ñi qota'olec, ca so'maxare ỹoxojñi so cien qomyipi, ca ỹasectaxajñigui na lavinñi, ca' dos nqai'ne' naua lapooqote', nañoxotouguilo nqai'en saua dos lauaco. Ime, ca' ỹaante'em na loq. 5Ca' so Acab 'naaco' queso Abdías:
—Qolaq, souoxonaq na qana'laua, sa'ajnaq ná'ogue na ñaachipi chaqai na lachiuguellipi, sha'apiguito' 'ue ca qaranataxat 'uaqapi, qaiyi ñaqai queeta nca'leetauec na shipiguiripi chaqai na que'laipi. No'me', ca' nilliviñi ná'ogue na qoloipi.
6Ca' chaqaida 'neeta, ca co'na' que', ca neuagaxachirigui yí'maq 'laua ỹahosaque ỹouoxone'. Ca' so Acab eec, quegue so nayic, chaqai so Abdías quegue so liỹa nayic. 7Ca co'na' mashic queso nayic, ca' so Elías naxata'guit so Abdías. Ca co'na' no'uenegue, ca ỹa'dooto naua le'cootal so'maxare. Ca 'naaco':
—¡Ca' chaqaiqami'o' ná'maq qami' ỹa'gaxala' Elías!
8Ca' so Elías 'naaco':
—Ajá'a, chaqaỹim.
Chaqai 'naaco' queso'maxare:
—Mo'e', 'ñirapega ca na'coochi' quiyim ỹim seuete'e najo.
9Ca' so Abdías 'naaco':
—¿Negue' cá'maq 'neeto' ca ỹasauaxaset quiyim yayaañichiguit so Acab quiyim yalauat? 10Da ỹa'qaatec 'qaachigui ñi qara'gaxala', ñí'maq rashiilqui' qota'olec, quiyim so ña'co' ỹaatqajam qaica quet cá'maq 'laua quiyim se relaataxanlec quet quiyim qaimitaque qami'. Ca quena' qohinac qaica qami' queca 'laua, ca so'maxare 'ue da lepagaxallic renataxan quiyim llic se qaỹanata qami'. 11¡Qam nagui, ca' yilachi'sac quiyim shinapega ca ña'co' quiyim viise'e najo! 12Qam sqoue quiyim ma' cocho'qui' ỹoxe'oga qami' caỹim, ca' so ne'espíritu ñi qara'gaxala' re'xachi' ma'le, ca' se sa'den ca 'itegue. Ca ma' sa'ue la'xaỹaxac so Acab, ca noma' se ỹanata qami' so'maxare, ca yalauat ma'le. Najo relaachiqui' shi'gue na' ñaqai ne'necoqui' chaqai'en se neme imaqachintac ñi qara'gaxala'. 13Ca' ¿peeta'a se qara'qaataxano' qami' na'le quedá'maq so'uet na' aso nashi Jezabel ỹahotaque nalauajñi so letaxaỹaxaquiripi ñi qara'gaxala' qota'olec? Ca' ỹim na'le soxojñi so cien qomyipi, dos saua nqañoqotqate' nqaishin, cincuenta so sellaugui quiñi 'óna lauac, ca' saante'em na loq. 14Ca ¿nagui vi'saque quiyim shic, ca' shinapega so ña'co' quiyim viise'e najo? ¡Ca yalauat ma'le!
15Ca' so Elías 'naaco' queso'maxare:
—Ỹim saanot da ỹa'qaatec ñi qara'gaxala', ñí'maq qaica lqalanec ñí'maq so'ueenataxantacot, quiyim chaqaina najo na'xa'a, ca' ñiuane'e' ca nashi Acab.
16Ca' so Abdías idaanaque so Acab quiyim ỹa'ue la'xaỹaxac. Ca co'na'le, ca' so Acab eec quiyim nauane'e' so Elías. 17Ca co'na' iuana, ca 'naaco':
—Ca ¿qami'o' ná'maq vi'saque da leuogoxo na Israel?
18Ca' so Elías 'naaco' queso'maxare:
—Ỹim se itentegueñi nqaishin na qomyipi, ta'ta'a qami' chaqai na nallichi'ipi sauaxat quiyim lachi' na lelaataxanaxaquipi ñi qara'gaxala', ca nqouagaxaiñitot na nadenqatqaipi lqui'illipi ñi nashiilec Baal. 19Ca' nagui, ca' vite ca qomyipi lachi' quiyim lapoonta' ná'ogue na llaalqaipi so Israel cada quemaralec qa' ladocai Carmelo, chaqai so cuatrocientos cincuenta letaxaỹaxaquiripi so nashiilec nqolac Baal, chaqai na cuatrocientos letaxaỹaxaquiripi añi nashiila nqola Asera quená'maq qui'ỹaxantac añi roua'e' Jezabel.
So Elías chaqai so letaxaỹaxaquiripi so Baal
20Ca' so nashi Acab relaataxane'oga sá'ogue so llaalqaipi so Israel chaqai lapoonta' so netaxaỹaxaquiripi cada quemaralec qa' ladocai leenaxat Carmelo. 21Ca co'na'le, ca' so Elías nqo'neu'a sá'ogue so qomyipi, ca 'naaco':
—¿Chi' laquio' 'xañiñi quiyim quiitalgoto naua dos ra'deenataxanaxagohi? No'm ñi qara'gaxala' chaqaiñi ñí'maq ỹaatqajam qota'olec, ca' quiitalec ñi'maxare; chaqai no'm ñi Baal, ca' chaqaiñi oquiitalec.
Qam so qomyipi qaica ca ỹa'xat. 22Ca' so Elías queetalec da letaxaỹaxac, 'naaco':
—Qaỹimeta ỹim letaxaỹaxaqui ñi qota'olec ñaq yca'leetauec. Ca' so Baal, ca ỹovi' cuatrocientos cincuenta na letaxaỹaxaquiripi. 23Ca' nagui, ca 'ỹaañima qomi' caua dos huaqui llaalqa, ca ná'maq letaxaỹaxaquiripi so Baal nca'au'a ca 'óna, ca' ỹalauat. Ime, ca' inaxalec ca qo'paripi, qam se ỹa'ue ca norec pa'aañi. Ca' ỹim qai'neeta salauat ca liỹa huaqui llaalec, ca senaxalec ca qo'paripi, qam qai'neeta se sa'ue ca norec spa'xanañi. 24Ime, ca' nqouagaxaiñiỹot ná'maq rashiilaxahipi ná'maq 'ñiitapega qota'olqaipi, ca' ỹim sashiila ñi ỹa'gaxala'. Ca cá'maq saat, ca nela' ca norec, ca' chaqaica cá'maq ỹaatqajam qota'olec ỹapacauec.
—¡Ajá'a, ỹaatqajam ỹa'maqachiguiñi da 'ñirac! —'naaco' so qomyipi.
25Ca' so Elías 'naaco' queso letaxaỹaxaquiripi so Baal:
—Coñiu'a ca 'óna quenaua huaqui llaalqa, ca 'au 'maxachiñi, ma' paguec qamiri 'xoic. Ime, ca' nqouagaxaiñiỹot cá'maq rashiilliguii 'ñiitapega qota'olec, qam sqa vii ca norec.
26Ca' so qomyipi ỹacona'a só'maq huaqui llaalec qoỹaanem, ca ỹa'maxajñi. Ca' queso nete'eta, chi ỹovireta'a so na'xa'a lavinñi ỹaualqatacot ỹashiilatac so Baal, 'naaco' quen:
—¡Baal, saachichiguita qomi'!
Ca 'uo' quen na nenojshiguim, ỹaqaletentac aca lo'ueenata ncopatoxonaxalate, qam qaica ca qara'xaỹaque na'qaatec. 27Ca co'na' na'xa'a lavinñi, ca' so Elías chi i'neetac so qomyipi, 'naaco' quen:
—Paguec nichiñigue da raualaxaguii, ma' qamiri 'ñiỹac quiyim qota'olec ca'maxare. Ma' sqoue quiyim 'ue ca queloltapega, loqo'm 'ue ca imeeteguelec, loqo'm ỹouoiguiri'ca. ¡Chaqai no'm laqata, ca' qanqo'xon!
28Ca' so qomyipi queetalec quiyim ỹaualqatagui, chaqai nichaqateguelta' quena lecat chaqai ana laqui, chi ỹovireta'a quiyim nachilliguilo naua leuo'. 29Qam chi ỹovireta'a quiyim napacalec so na'xa'a lavinñi, qam so qomyipi ñaqai queeta ỹaualqatagui, chaqai nenotetashiguim 'ec hualoxonyipi, chi ỹovireto'o' ca laloqo'o' quen quena' qoỹaano, ca' qaỹavigaxat ca nachitaxanataxanaxat. Qam ¡qaica ca qara'xaỹaque quiyim saachiguit so qomyipi! 30Ca co'na'le, ca' so Elías 'naaco' quesá'ogue so qomyipi:
—Noquiiguiuo quenajo.
Ca sá'ogue so qomyipi noquiigo queso'maxare, ca so'maxare lotqai no'xonshiguim aso ncopatoxonaxalate quiyim qanqouagaxainot ñi qota'olec shi'co' qai'guenaxajñi. 31Ca co'na'le, ca' so Elías ỹaconalo saua doce qari, ipaquichigui nqai'en da ỹorete' saua llaalqa so Jacob, só'maq ñi qota'olec ỹanco' quiyim leenaxat Israel. 32Ca' quesauajo qari, ca ro'ueenataxanalo quiyim no'xonshiguim aso ncopatoxonaxalate quiyim qanqouagaxainot ñi qota'olec. Ime, ca' ỹo'uet so ni'ỹac ỹovira'ta' quenaua lahil aso'maxare. Da lecaachigui so ni'ỹac ỹovi' veinte litros. 33Ca na' ime ỹa'maxajñi so qo'paripi, ca ỹalauat so huaqui llaalec, ca' illaalec so qo'paripi. 34Ca co'na' ime, ca 'naaco' queso qomyipi:
—No'xataxachiiguilo caua cuatro nehomal queca huaxaỹaq, ca' qaỹocorelec yi huaqui llaalec chaqai yi qo'paripi.
Ime, ca lotqai dos relaataxan quiyim pilalec qaỹocorelec. Ca' so qomyipi chaqaida 'ne'tegue. 35Ca' so huaxaỹaq i'paxanlec nqai'en aso ncopatoxonaxalate chaqai so ni'ỹac qai'neeta no'xa. 36Ca co'na' ỹovita ca laloqo' quiyim qoỹaano aca nachitaxanataxanqate, ca' so qota'a letaxaỹaxaqui, leenaxat Elías, nqo'neuo. Ca' ỹaatqajam netenegue da la'qaatec, 'naaco':
—¡Qami' ỹa'gaxala', qami' qota'olec queso qareta'a Abraham, Isaac chaqai so Israel: nachaxañi' nagui quiyim qami' qota'olec queso qareta'a Israel, chaqai quiyim yilachi', vichiguiño' so'uet dá'ogue dajo ma' qami' ná'maq yilachi'! 37¡Saachichiguit aỹim, qami' qara'gaxala', qaiyi ná'ogue najo qomyipi ỹa'den quiyim qami' qota'olec ỹapacauec chaqai quiyim vi'saque quiyim qaropilot qami'!
38Ca queco'na'le, ca' noviriñi so norec chicqo'ot ñi qara'gaxala', ca' ỹavigaxat so nachitaxanataxanaxat chaqai so qo'paripi, vire'ta so qaripi chaqai so namoxoỹaxa, chaqai ncollishiguim so huaxaỹaq hueeta'ñigui so ni'ỹac. 39Ca' so qomyipi co'na' iuanchigui dajo, ca sá'ogue ỹa'chi'iñi naua le'cootal, ỹoviraqta'guit na latap na 'laua. Ca 'naaco':
—¡Ñi qara'gaxala' ỹaatqajam qota'olec ỹapacauec, ñi qara'gaxala' ỹaatqajam qota'olec ỹapacauec!
40Ca co'na'le, ca' so Elías 'naaco' queso qomyipi:
—¡Coñilec ná'ogue na letaxaỹaxaquiripi ñi Baal! ¡'Neeto' 'ue ca qohit!
Ca' qaiconlec so qomyipi, ca' so Elías ỹauega yi ñaachi, leenaxat Cisón, ca' ichaxauec ñi lqahic sá'ogue.
So Elías nqouagaxain quiyim 'ue ca ỹaxat
41Ca co'na' ime, ca' so Elías 'naaco' queso Acab:
—Mo'e', qui'i' chaqai ni'chi, ma' mashic tot qoỹoxoguit na ỹaxat.
42Ca' so Acab eec, ca' que'e chaqai ne'et. Qam so Elías quiishi'megue ada qa' ladocai Carmelo. Ca nqa'xanñi, ỹoviraqta'guita naua le'cootal ñi lashic. 43Ca co'na'le, ca 'naaco' queso lelaatec:
—Mo'e', ra'irelec ana huaaxai.
Ca so'maxare eec, ca ra'iitalec aso huaaxai. Ca 'naaco':
—Qaica ca seuana.
Qam so Elías 'naaco':
—Siete nqai'ñi' pilac quiyim ra'irañigui ana huaaxai.
44Ca co'na' mashic ỹovi' siete ra'ajnaxanaxaso'ma aso huaaxai, ca 'naaco':
—¡'Ue yi naueguelec re'oq chicqotañigui ana huaaxai lecaatoqui' na qanapoquena lauel!
Ca co'na'le, ca' so Elías 'naaco' queso'maxare:
—Mo'e', quirepegue' ca Acab, ca 'ñiraco': Coñichiro aca rahoglena'e', ca' qui', 'ase' no'm ỹovichiraxalec na ỹaxat.
45Ca' so Acab renojñigui aso lahoglena, ca quepegue' yi Jezreel. Ca co'na'le, ca' chi navirichiguiñi na' novi' so naueguelec chaqai so nonot, ca' ỹaatqajam lodegaxat so ỹaxat. 46Ca co'na'le, ca' so Elías qaỹa'ue da lquesaxanaxa quiñi qara'gaxala'. Ca ỹa'maxachiñi saua loho, ca eec, ne'guenta, taigue da Jezreel, ca 'au ỹovi' queso Acab.
