1 Reyes 19

₁Ca' so Acab ra'qaataxana aso loua Jezabel dá'ogue dá'maq 'neeto' na'le so Elías chaqai dá'maq 'ne'teco' na'le na' ichaxauec na lqahic sá'ogue so letaxaỹaxaquiripi so Baal. ₂Ca' aso Jezabel ỹa'uo' so lelaatec quiyim 'naapega so Elías:

—¡No'm qami' Elías, qam ỹim, ỹim Jezabel! Ca' na qarashiilqaipi nqolaquipi ỹa'ue ca ñouaxanaxaset lodegaxat, no'm nete'e ma' 'nejem nagui sqai shi'ntegue qami' dá'maq 'ñitetegue so lauachi' netaxaỹaxaquiripi.

₃Ca' so Elías retan quiyim chalego lecaic dá'maq hueetalec. Chaqai quiyim nca'laxatec dá'maq chi nachaalataxac, ca' eec taigue da Beerseba yí'maq huaugui yi 'laua Judá. Ca' quiyi, ca' po'an so lelaatec. ₄Ime, ca' eec queetalec yi 'laua qaica qom. Ca queeto' 'óna na'xa'a, vire'to' na' nqa'xanñi ne'tot aca qo'paqo'lli'. Ca chalego' da lishoxo quiyim ileu. Ca 'naaco':

—¡Liyi dajo, qami' ỹa'gaxala'! ¡Lqodoc nqai'ñi' ana ỹaqauaxaqui, ma' sqai paguec ỹim 'maxaraic quesaua ita'al!

₅Ca co'na' ime, ca' nenanñi hue'tot aso qo'paq. Ca' chaqai laqachiguiño', qam 'uo' so novi' piguim le'ec, ca' ỹa'deuo na lahi, ca 'naaco' queso'maxare:

—Ne'laxachirishiguim, qui'i'.

₆Ca' so Elías quenoxontaco', ca iuane'to' quiyi na'xanqa' aso naqaulata ratooxoi chaqai aso 'taxaqui no'qaachigui queso huaxaỹaq. Co'na'le, ca' ne'laxashiguim, ca' que'e chaqai ne'et queso huaxaỹaq. Ca co'na' ỹa'at, ca lotqai liỹa nenanñi, laq. ₇Qam so nelaatec piguim le'ec lotqai novita, ipootau'a, ca 'naaco' queso'maxare:

—Ne'laxachirishiguim, liỹa qui'i'. 'Anta, paguec leseguegue da 'ira'gue.

₈Ca' so Elías ne'laxashiguim, ca' que'e chaqai ne'et. Ca' sojo loq ỹa'ue da lquesaxanaxa quiyim liỹa eec cuarenta na'xata' chaqai cuarenta piri, chi ỹovireta'a da Horeb dá'maq qota'olec nquemaralec qa' ladocai. ₉Ca co'na' ỹovita, ca taho'gue so lauac, ca hueetaho'gue 'óna pe. Qam ñi qara'gaxala' ỹovira'a so'maxare, ca 'naaco':

—Elías, ¿negue' cá'maq 'ñi'sa'pegue quenajo?

₁₀Ca so'maxare 'naaco':

—Ỹaatqajam paguec da ỹauochaxa caqami', qami' ỹa'gaxala', qami' qota'olec qaica qalañirac, ma' na llaalqaipi so Israel totqai quelec da na'maqataxaqui', chaqai nopoxoỹaxajñi ana ncopatoxonaxalate quiyim qanqouagaxainot qami', chaqai qaỹahote'e na lecat quiyim qanalauajñi na retaxaỹaxaqui'i'ipi. Ca mashic qaỹimetam yo'ueenañi, qam nagui qaimitetaque aỹim qaỹahotaque qayalauat.

₁₁Ca' ñi qara'gaxala' 'naaco' queso'maxare:

—Nenoxoñirec, ca nachaachiriñi, ca seloxoiqa'ajta' canajo qa'.

Ca co'na'le, ca' ñi qara'gaxala' quelec yi'maxare, ca 'uo' so nonot lodegaxat ỹaatqajam quesaxan, ca nconaxaterec naua lahil aso qa' ladocai chaqai ná'maq qa' ropoqogui nqai'en, qam ñi qara'gaxala' sqai hueetagui so nonot. Ca co'na' ime'uegue so nonot, ca lotqai i'loxol na 'laua, qam ñi qara'gaxala' sqai hueetaugui so le'loxolaxa na 'laua. ₁₂Ca na' ỹoxe'uegue so le'loxolaxa na 'laua, ca' 'ue so norec, qam ñi qara'gaxala' sqai hueetaugui so norec. Qam na' ime'uegue so norec, ca' qara'xaỹaque so nelamaxa ỹolaauetam chaqai nesatete'uegue. ₁₃Ca' so Elías co'na' 'xaỹaque so'maxare, ca' ỹapogui na lashic queso lapo'. Ca' nenoxonec, ca' hueete'e na lahi ñi ñigo queso lauac. Co'na'le, ca 'xaỹaque so nivillaxac 'naaco' queso'maxare:

—Elías, ¿negue' cá'maq 'ñi'sa'pegue quenajo?

₁₄Ca so Elías 'naaco':

—Ỹim ỹaatqajam chalego da ỹauochaxa caqami', qami' ỹa'gaxala', qami' qota'olec qaica ca qalañirac, ma' na llaalqaipi so Israel totqai quelec da na'maqataxaqui', chaqai qai'guenaxajñi ana ncopatoxonaxalate quena' qanqouagaxainot qami', chaqai qaỹahote'e na lecat quiyim qanalauajñi so retaxaỹaxaqui'i'ipi. Ca' qaỹimetam yo'ueenañi, qam qaimitetaque aỹim qaỹahotaque qayalauat.

₁₅Co'na'le, ca' ñi qara'gaxala' 'naaco' queso'maxare:

—Mo'e', pilli', pillitetegue na qayiqui' quiyi 'laua qaica qom quiyi Damasco. Ca ma' vichi', ca cochirelec ñi'ragui quiyim nashi ñi Hazael, qaiyi nashi quiyi 'laua Siria; ₁₆chaqai ñi Jehú ñí'maq laual ñi Nimsi, qaiyi nashi quiyi Israel; chaqai cochirelec ñi Eliseo, ñí'maq llaalec ñi Safat ñí'maq na'ñi yi na'a' Abel-mehola, qaiyi itaxaỹaxaqui ma'le taalec da ro'ueenataxanaxaqui'. ₁₇Ca' quedajo ma'le, ca cá'maq qohit queca lecat ñi Hazael, ca ỹalauat ñi Jehú, chaqai cá'maq ỹit ca lecat ñi Jehú, ca ỹalauat ñi Eliseo. ₁₈Ca' ỹim ño'ueenaxatañi ma'le quiyi Israel ca siete mil qomyipi se ỹa'dooto naua le'cootal ñi Baal chaqai se nqo'goq.

₁₉Ca' so Elías eec, ca iuanejlco' so Eliseo rasaugaxantac, ỹa'queetalec so veinticuatro ñii'lolaipi, ca' chaqaiso so'maxare ỹashaxantac sauá'maq co'uaataxante'. Ca' so Elías ỹalamaxateta'a so Eliseo, ca' ipeguenlec so lapo'. ₂₀Ca' so Eliseo chaqa'ma' ỹaxanec so ñii'lolaipi, ca' ne'guenta, co'uaategue so Elías. Ca co'na' ỹovi', ca 'naaco':

—Qouaquiric, ñaqai cocho'qui' ñqo'goxe' yaua ita'al, ca spoyiguine'. Ca ma' ime, ca' shiguegue qami'.

Ca' so Elías 'naaco':

—Ajá'a, mo'e', qui'. Qam ma'le, ca' cocho'qui' ñaqai o'lliinchira'a dá'maq shi'ntegue caqami'.

₂₁Ca' so Eliseo queho, ca' icona'alo saua dos ñii'lola, ca ỹalauate'. Ca só'maq qo'paq neetaguilo quena' qaro'ueenataxañiguilo ỹouaxañigui, ca' ỹouen quiyim co'i so la'at. Ca' qui'ỹaxan so qomyipi. Ca na' ime, ca' so'maxare co'uajlec so Elías, ca ro'ueenataxanot.