1 Reyes 22

₁Ca' quesaua tres ñaxari qaica ca lauataq na Siria laseripi se nalauate'e' na llaalqaipi so Israel. ₂Qam na' ime'ueque saua tres ñaxari, ca' so Josafat nashi quiyi Judá quepegue' ra'piicha so Acab só'maq nashi quiyi Israel. ₃Ca' so Acab 'naaco' queso lotauaripi nashillipi:

—Qamiri mashic 'yiiñita quiyim yi Ramot qotoiquenatec, yí'maq huaugui yi 'laua Galaad. Ca ¿chi'neco' ma' se liỹa souootaxanqa'gue quiñi nashi Siria le'ec?

₄Ca inato' so Josafat:

—¿Shichi' qarotauañi' quiyim qolaxau'a yi na'a' Ramot huaugui yi 'laua Galaad?

Ca' so Josafat 'naaco':

—Ỹim chaqai na ñalliripi chaqai na neetashiguim quena shipgaq sqoshaaqata'guit qami' chaqai na nallichi'ipi. ₅Qam 'au nataxañi' quecá'maq 'neeta ca la'qaatec ñi qara'gaxala'.

₆Ca' so nashi quiyi Israel lapoonta' so qota'olec letaxaỹaxaquiripi. Quiyim sá'ogue, ca ipala'tegue cuatrocientos. Ca renataxano', 'naaco':

—¿Peeta'a 'maxaraic shiga'a yi Ramot huaugui yi 'laua Galaad, loqo'm 'e'?

Ca saua'maxare 'neraco':

—Oquira'a, ma' ñi qara'gaxala' ỹaanem qami' quiyim qadoxonqui'.

₇Qam so Josafat renataxano', 'naaco':

—¿Qaico' ca liỹa letaxaỹaxaqui ñi qara'gaxala' quenajo quiyim senataq qai'neeta?

₈Ca' so nashi quiyi Israel 'naaco' queso Josafat:

—Ajá'a, ñaqa 'ue ñi 'oonoqui', 'maxaraic quiyim senataq quecá'maq 'naac ñi qara'gaxala'. Ñi'maxare leenaxat Micaías, llaalec so Imla. Qam ỹoquiiaxat ñi'maxare, ma' se ỹauanapega quet quiyim no'uen ca taalec nqai'en aỹim, ta'ta'a na se no'uen.

Qam so Josafat 'naaco':

—Sqai 'ñirac dajo.

₉Ca' so nashi Acab chaqa'ma' roỹaxana so lotaua nashi, ca ila', 'naaco':

—¡Mo'e', 'ñirapega quiyim chaqa'ma' nanaho'quena ca Micaías, cá'maq llaalec so Imla!

₁₀Ca' so nashi quiyi Israel chaqai so Josafat nashi quiyi Judá mashic ỹansañi saua lo'goxonqate' nalauataxaqui' chaqai nqa'xantañiguilo saua nashil nqa'xanaxaqui', neesa'ñi so quesalaxa naloote'oga yi ñigo quiyi Samaria. Ca sá'ogue so netaxaỹaxaquiripi ỹa'xatetac na leuanaxanaxaquipi, reloqoto'oto saua nashil. ₁₁Ca' so Sedequías só'maq llaalec so Quenaana ỹo'ueete'o' saua lasote lecachi. Ca netenegue da la'qaatec, 'naaco' quen:

—¡Da la'qaatec ñi qara'gaxala' 'neetasa': Do'isa'alo nauajo nasote ma' quira'a yi Siria laseripi, ca' nomachichiriñi ma'le!

₁₂Ca sá'ogue so netaxaỹaxaquiripi dá'ogue dá'maq ỹa'xatetac 'naaco' quen queso nashi:

—Oquira'a yi na'a' Ramot huaugui yi 'laua Galaad, ca huegaxañi' ma'le, ma' ñi qara'gaxala' ỹaanec ma'le quiyim qadoxonqui'.

₁₃Ca só'maq nelaatec quiyim i'guena'a so Micaías co'na' ỹovita, ca 'naaco':

—Yá'ogue yi netaxaỹaxaquiripi dá'ogue da la'qaatec quena' 'ue da ỹa'xatem ñi nashi. Vichiguiño' ñi'xoresene'tot qami' quiyim no'ueenaxachi' ca ra'qaataxanaxaqui', 'nejem yi liỹaripi.

₁₄Ca' so Micaías 'naaco' queso'maxare:

—¡Ỹim saanot ñi qara'gaxala' da ỹa'qaatec quiyim cá'maq nañan ñi'maxare, ca chaqaica sa'xat!

₁₅Ime, ca so'maxare ỹovira'a so nashi, ca qainato', qohinaco':

—Micaías, ¿peeta'a 'maxaraic quiyim qolaxau'a yi Ramot huaugui yi 'laua Galaad, loqo'm 'e'?

Ca' so Micaías 'naaco':

—Mohi, nalauachii'e', ca qadoxoñiguii, ma' ñi qara'gaxala' shi'gue ỹaanem qami' quiyim qadoxonqui'.

₁₆Qam só'maq nashi 'naaco' queso'maxare:

—¡Mashic 'xoic shinac caqami' quiyim 'ỹaañitot ca ra'qaachiqui' ñi qara'gaxala', ma' ỹim yipaquetaque cá'maq lliqueta la'qaatec ñi qara'gaxala', ca 'xachirim!

₁₇Ca' so Micaías 'naaco' queso'maxare:

₁₈Ca so Acab 'naaco' queso Josafat:

—¡Cha'ma' shi'gue shinac caqami' quiyim dajo ỹale se ỹauana lo'yaxanec ca ỹa'xat coqomi', ta'ta'a na se no'uen!

₁₉Ca' so Micaías lotqai 'naaco':

—Quedá'maq 'ñirac nagui, ca' na'xaỹaxañita dá'maq la'qaatec ñi qara'gaxala': Seuana ñi qota'olec nqa'xantañigui añi nqa'xanaxaqui quiyim nashi, chaqai ná'ogue na lelaatqaipi piguim laseripi ra'iito'ot, hueeta'gue da loic chaqai da nemaq. ₂₀Ca' ñi qara'gaxala' renataxano', 'naaco', nega'ỹo' ca quepegue' ñi Acab quiyim 'naapega quiyim queu'a nalauate'e' yi Ramot huaugui yi 'laua Galaad, qaiyi chaqaiyi hua'ñi ma'le. Ca 'uo' quen na 'ue da ỹa'xat chaqai na liỹa lotqai ỹa'xat da liỹa. ₂₁Ca 'uo' so nelaatec piguim le'ec ỹovira'a ñi qota'olec quiyim so'maxare 'naac ỹo'uet ma'le dajo. Ca' ñi qota'olec inato' so'maxare quiyim negue' cá'maq 'neeta'gue quiyim ỹo'uet. ₂₂Ca' so nelaatec piguim le'ec 'naaco' quiyim na'majan nqai'en na netaxaỹaxaquiripi queso nashi. Ca' ñi qara'gaxala' 'naaco' queso'maxare quiyim ỹo'uet da na'maachic. Ca 'naaco' queso'maxare quiyim eec ỹo'uet da'maxare. ₂₃Ca nagui, ca 'yiiñi' quiyim ñi qota'olec ỹa'maxarenta quiyim so na'maachic hueetaugui ná'ogue na letaxaỹaxaquiripi, ma' ñi'maxare chaqai 'negue ỹo'uet quiyim na'laañi qami'.

₂₄Ca co'na'le, ca' so Sedequías só'maq llaalec so Quenaana nqo'neu'a so Micaías, ca' ỹouaxañigui na lashic. Ca 'naaco':

—¿Negue' cá'maq taigue ca ne'espíritu ñi qota'olec caỹim quiyim retaqaugui qami'?

₂₅Ca' so Micaías 'naaco' queso'maxare:

—'Yiiñi'o' ma' chi ỹovi' ca na'xa'a quiyim nañoxochisegueñi quenaua 'imqa.

₂₆Ca co'na'le, ca' so nashi quiyi Israel relaataxanlec, 'naaco':

—¡Coñilec da Micaías, coñiri, ca' viguiu'a ñi Amón ñí'maq neloxoỹaq quena na'a', chaqai so Joás só'maq ỹaalec! ₂₇'Ñiỹapegalo quiyim ỹim shinac quiyim qoỹanaugui añi ncoñiitaxanaxaqui, chaqai sqailligueme' qaiqui'ỹaxan, qainaata na pan chaqai na huaxaỹaq, toco' ma' yapil yo'ueenta.

₂₈Qam so Micaías lotqai 'naaco':

Chaqai liỹa 'naac:

—¡Qamiá'ogue, 'xahichigui dajo nagui!

₂₉Ca chaqaido' da 'neeta so Acab nashi quiyi Israel chaqai so Josafat nashi quiyi Judá que', nalauatere'e' yi na'a' Ramot quiyi 'laua Galaad. ₃₀Ca' so nashi quiyi Israel 'naaco' queso Josafat:

—Ỹim ma' saugui na lauataq, qam se ñichoxot, ca' qami' ñi'riño' naua ỹoho.

Ca' chaqaida 'neeto' na'le so nashi quiyi Israel na' taugui so lauataq, qam se nichoxot. ₃₁Qam so nashi quiyi Siria 'naapego' so treinta y dos lotauaripi nashillipi reloqota'a so nahoglenaipi lauataxaqui quiyim se nalauate'e' canchaqaica, ta'ta'a cá'maq nashi quiyi Israel. ₃₂Ca co'na' so nashillipi queso nahoglenaipi lauataxaquiripi co'na' iuane'ta so Josafat, ca' qohintapega quiyim chaqaiso so nashi quiyi Israel, ca' qanahiquinchiguiñi quiyim qanalauate'e'. Ca' so Josafat ỹaualaq roỹaxantac quiyim qaỹotauan. ₃₃Ca' so qomyipi co'na' ỹa'den quiyim sqaiso so nashi quiyi Israel, ca' totqai quelec quiyim nalauate'e'. ₃₄Qam so 'óna chi ỹahinec aso lo'xoso, ca taachiguilo naua lqodoco saua nalauataxaqui' so nashi quiyi Israel, ca' que'maaxaic. Ca' so nashi 'naapego' so lahoglena lo'o quiyim ỹoỹootec aso lahoglena:

—Shaxañirec ana qarahoglena, chaqai naqachirec aỹim quena lauataq, ma' ỹaatqajam ỹim que'maaxaic.

₃₅Ca' so lauataq ỹaatqajam chalego lquesaxanaxa queso na'xa'a, ca' so nashi qanachaalataxantañi caso lahoglena quiyim qareloqota'guit so Siria laseripi. Qam na' lavit, ca' ileu, ca na leuoripi i'paxañigui so lco'ỹaxala' aso lahoglena. ₃₆Ca co'na' mashic sham inoxonñi aca ra'aasa, ca qaỹa'ue la'xaỹaxac so nalliripi, qohinaco':

—¡Quiñi 'óna pila'a ca la'a' quecá'maq chi na'laua, ₃₇ma' yi qarashi mashic ileu!

Ca' so nashi qaỹodo queda Samaria. Ime, ca' qaishinñi. ₃₈Ca co'na' ime, ca' qaỹauegaxasom aso nahoglena cañi huaxaỹaq lahi' quiyi Samaria, yí'maq nachilqa'o' quen ana 'aalo nanatqa lo'o'. Ca' so pioxoripi colli' saua leuo' so Acab. Ca' taachigui dá'maq 'naaco' na'le ñi qara'gaxala'.

₃₉Ca sá'ogue so na'qaataxac chaqai ná'maq ỹo'ueeto' na'le so Acab chaqai quesó'maq lauo' lodegaxat chicqaugui ana loue ana ladocoloue chaqai na na'aateripi no'xonshiguim qoỹeretalec aso lere naneraxalate sá'ogue so nashillipi quiyi Israel. ₄₀Ca co'na' ileu so Acab, ca' qoỹano quiyim nashi so llaalec Ocozías.

₅₁Ca' quesaua diecisiete ñaxari ro'ueenataxantac so nashi Josafat só'maq nashi quiyi Judá, ca so Ocozías, só'maq llaalec so Acab, taañi ro'ueenataxan quiyim nashi quiyi Israel, neeta'ñi yi Samaria. Ca' nashi quesaua dos ñaxari. ₅₂Qam ỹo'uet dá'maq se no'uen quiñi qara'gaxala', ma' ỹo'uet dá'ogue dá'maq ỹo'ueetetac na'le so leta'a Acab chaqai aso late'e Jezabel, chaqai so Jeroboam só'maq llaalec so Nabat, só'maq ỹo'uet quiyim 'ue ca lasauaxaset na llaalqaipi so Israel. ₅₃Chaqai so'maxare huelec so nashiilec nqolac Baal, chaqai nqouagaxainot, 'nejem dá'maq 'ne'tegue na'le so leta'a. Vichiguiño' ỹaatqajam ro'o nqai'en na'le ñi qara'gaxala' ñí'maq qota'olec queso Israel.