So Salomón rashiilaxanaque da la'deenec quiñi qota'olec
3Ca' so Salomón ỹaatqajam nqo'ta ñi qara'gaxala', chaqai ỹaatqajam quejlec na laqataxaquipi so leta'a David, chaqai chaqaiso só'maq ỹo'ueetetac ana lachitaxanataxanqate ỹavigaxatetac hua'ñi yi 'laua qoỹoqoshi'megue qouagaxainqa'. 4Ca 'uo' quena' so'maxare quepegue' yi Gabaón, ca ỹo'uet aso ỹavigaxat lachitaxanataxanqate, ma' so 'laua qoỹoqoshi'megue ỹaatqajam choxoraic qouagaxainqa'. Ca vire'to' na' ỹovi' mil aso lachitaxanataxanqate quiyim qaỹavigaxat.
5Ca 'uo' so pe quiyi Gabaón, ca' ñi qara'gaxala' nachaxana so'maxare, viichigui nqai'en so lelaxac. Ca 'naaco':
—Ỹaxañiraque nagui cá'maq viñisaque, ca' saanem qami'.
6Ca' so Salomón 'naaco':
—Qami' ỹaatqajam re'xorenachiqui' yi ita'a David yí'maq relaachiqui', ma' yi'maxare ipacqajanchiguilo naua ra'qaataxahi', ca no'uen da nachaalataxac, chaqai ỹalamrete' naua la'deenataxanaxaco caqami'. Vichiguiño' ỹaatqajam 'xoriñi', chaqai vite na 'oonoqui' llaalec quiyim naalec nqai'en da lo'ueenataxanaxac quiyim nashi, 'nejem dá'maq 'ñitetegue aỹim quesaua na'xata'. 7Ca' qami' ỹa'gaxala' qota'olec, ñi'ralec aỹim quiyim senalec da lo'ueenataxanaxac so ita'a David, ca 'eno'm ñaqaỹim ne'necoqui' chaqai qaica ca sa'den. 8Qam nagui aỹim seloqota'a na qomyipi ná'maq rca'acshiqui'. Ca' najo qomyipi ỹaatqajam 'xoic, sqaica ishit naloqochin. 9Ca' 'ỹaañitem aỹim aca 'deenaxanqachaqai ne'taxanata, qaiyi seshit seloxoỹa'a na qomyipi, chaqai qaiyi sa'den cá'maq no'uen chaqai ca se no'uen. Ma' ¿negue' quet cá'maq ishit quet reloxoỹa'a na ỹaatqajam 'xoic qomyipi ralamaxarichi'?
10Ca' ñi qara'gaxala' ỹa'maxarenta dá'maq rashiilaxanaque so Salomón. 11Ca 'naaco' queso'maxare:
—Ma' shiilaxañiraque ca ra'yiinqui', qaiyi se qalañiralec quiyim 'ue ca na'xaỹaxañita, chaqai quiyim loqoira'a na ỹale, ca sqa shiilaxañiraque quiyim ladoc ca nachaalataxaqui' chaqai quiyim 'ue ca resallaxa'e' loqo'm quiyim qanalauajñi na npa'guenaxaua'e'ipi, 12ca' ỹim saañiraxarom ná'maq shiilaxañisaque: saanem qami' da na'deenaxanaxa, qaiyi qaica ca qalañiralec, ca' qaiyi qaica ca 'nejem qami' queso 'auaxaiquipi chaqai na co'uaataxanaxaiquipi. 13Chaqai qai'neeta saanem qami' da nesallaxa chaqai da remaqachiqui', ná'maq sqai shiilaxañiraque, qaiyi quedá'ogue da nachaalataxaqui' qaica ca nashi 'nejem qami'. 14Ca no'm pacqajñichirigui dá'maq sahotaque, chaqai quiyim pacqajñichiriguilo naua ỹaqataxaco chaqai naua ilaataxanaxaco, 'ñitetegue dá'maq 'ne'tegue na'le so qataa'i' David, ca' saanem qami' dá'maq ỹaatqajam ladoc chaalataxac.
15Ca co'na' nelouec so Salomón, ca ỹo'leente'te quiyim chi le'guemataxac dajo. Ca co'na' ỹovira'a yi Jerusalén, ca' quepegue' ca na'ñi aso lahite' saua laqataxaco ñi qara'gaxala'. Ca' ỹa'ue aso ỹavigaxat lachitaxanataxanqate chaqai aso liỹa quiyim pilot ñi qota'olec. Ime, ca' ỹo'uet so lqui'ỹaxac, ca nouante'e' sá'ogue so lotauaripi nashillipi.
So Salomón ỹaatqajam ỹa'den quiyim imit ca nasauaxaset
16Ca 'uo' so na'xa'a, ca qoyicpegue' so nashi quesaua dos 'aalo nanatqa lo'o'. Ca co'na' mashic qareloqoto'ot so'maxare, 17ca 'uo' aso 'óna quesaua'maxare 'naaco':
—Qami' ỹashi, dajo 'aalo chaqai aỹim ñá'ogue ñi 'imec senqataugui. Ca' ỹim sco'o, ca' dajo 'aalo iuora quiyi qara'a'. 18Ca' quesaua tres na'xata', ca ada'maxare qai'neeta co'o. Qam ỹaatqajam qarodaachiguiñom, qaica ca liỹa qom qouora, ca qaica ca qariỹa, qoqometam. 19Ca' 'ue so pe, ca' dajo 'aalo icanagui so llaalec, ca' ileu. 20Ca co'na' pe lauel, ca ada'maxare co'na' selaqata, ca ne'laxashiguim. Ca' ỹacona so ỹaalec ỹapaata'ñi', ca lapa'ñi'. Ca só'maq ileu llaalec illau'e na ỹahi. 21Ca na' nete'etam, ca ñi'laxashiguim, ma' sahotaque sellipaxan so ỹaalec, ca' seuane'ta ileu. Qam na' ỹaatqajam richiguiñi, ca' sa'ajanta, ca' yitan quiyim sqai ỹaalec so'maxare.
22Ca' aso liỹa 'aalo 'naaco':
—'E', ỹim ỹaalec só'maq nca'leetauec, ca só'maq ileu, ca' chaqaiso qachaalqui' so'maxare.
Qam asó'maq 'au retaqa lotqai 'naac:
—'E', qami' qachaalqui' só'maq ileu, ca só'maq nca'leetauec, ca' ỹaalec.
Ca' chaqaida 'neesari' retaqata'ta' reloqoso'ot so nashi. 23Ca' so nashi ra'deenataxantac, ca 'naaco': Dajo 'naac quiyim llaalec dá'maq nca'leetauec noctoqui', ca só'maq ileu, ca llaalec adá'maq liỹa; ¡chaqai adá'maq liỹa chaqaidaata dá'maq la'qaatec!
24Ime, ca' relaataxan, 'naaco':
—¡Nodohiuec ca llicat!
Ca co'na' qanodouec so lecat so nashi, 25ca 'naaco':
—Chaxaiỹa'gue na lavinñi da noctoqui' nca'leetauec. Ca' 'ỹaañim ca lahi añi 'óna, chaqai da liỹa lahi, ca' 'ỹaañim añi liỹa.
26Qam asó'maq ỹaatqajam late'e so noctoqui' nca'leetauec ỹaatqajam 'xoic nqai'en da le'xoric, ca' ỹaatqajam ne'xoresene'tot so nashi, 'naaco':
—¡Yi'xoriñi', sqa lauachi' da noctoqui' nca'leetauec, qami' ỹashi! ¡Ta'ta'a quiyim 'ỹaañitem ada 'aalo!
Qam aso liỹa 'naaco':
—'E', se qanañaañim chaqai se qoỹaanem qami'. ¡'Maxaraic quiyim qaichaxañigui na lavinñi!
27Ca co'na'le, ca' so nashi taañiguilo, ca 'naaco':
—'Ỹaañim adajo 'aalo na noctoqui' nca'leetauec. Sqai lauachii, ma' ada'maxare chaqada adá'maq late'e.
28Ca' sá'ogue so llaalqaipi so Israel ỹa'deeno' dá'maq 'ne'tegue quiyim ỹosogui so co'uaxac so nashi. Ca' 'ue nqai 'negue nqai'en so'maxare, ma' qaiuanchigui quiyim ñi qota'olec ỹaanem so'maxare da la'deenec, qaiyi ỹa'den ca reloqo'tegue ca nasauaxaset.
