1Ca' vichiguiño' 'maxaraic quiyim 'xañiñi ná'ogue na se no'uen, ná'ogue na na'maachic, chaqai sqai dos caua ra'deenataxanaxagohi, chaqai se pa'guiñitac ca riỹahi, chaqai sqai qamiri la'axaqa lo'o'. 2'Ñiitam ca noctoqui' chita'gue ne'qaañi, ỹaatqajam na'ñaxachii daañitaque caua no'i' se re'xoguilo qaica ca lalecte' quiyim iỹaxate' qamiri, ca' ma'le, ca 'ue ca rca'laxahi, 3no'm ỹaatqajam llic 'yiiñii quiyim huagaxaraic so qara'gaxala'.
So Cristo 'neetari' ca qa' nca'leetauec
4Ca vichiguiño' nqo'ñiu'a so qara'gaxala' Jesús, 'ñiita'gue ca qa' nca'leetauec. Sojo qa' só'maq lañijnec na'le so qomyipi, qam ñi qota'a nca'au'a chaqai 'xoic lovic nqai'en. 5Ca' qamiri qai'neeta 'ñiitari' ca qa' nca'leetauec, ca 'xañiỹac ñi qota'a quiyim ỹouene' qamiri, ca ro'ueenataxanalo qamiri queca lo'ueenaxanaxaqui se re'xogui, chaqai quiyim letaxaỹaxanqajanqa qamiri na qomyipi quiyim taxaỹa'pegue', quiyim nañaañi'tot ñi qota'a. Ca' 'ỹaañitapego na rachitaxanataxanaxachii se re'xogui, chicqochigui so Jesucristo, acá'maq ishit icoñi'chiguit ñi qota'a. 6Vichiguiño' naua naneresañi la'qaatqa ñi qota'a qai'neeta 'nerac:
Ỹim sellaañigui na Sión ñi 'óna
ñí'maq 'ec qa' nollaañi ca 'imec;
ñijo qa' ica'acsec chaqai 'xoic da lovic.
Cá'maq huelec ñi'maxare, ca' se nayiloxontac.
7Caqamiri ma' mashic viilec, ca' sojo qa' chalego da lovic, qam quená'maq sqai huelec, ca' ipaquichigui ma'le dá'maq naneretañi la'qaatec ñi qota'a:
So qa' ỹañijno' na'le so 'imec lo'ollipi,
ca ỹovira'a quiyim chaqaiso só'maq nollaañi ca 'imec.
8Chaqai qai'neeta ipaquichigui dá'maq 'naac:
Ñi qa' nepoxolaxanaxala',
chaqai ỹo'uet quiyim 'ue ca huaañi.
Ma' saua'maxare repoxolaxane' co'na' se na'xaỹaxanta da na'qaatec. Qam dajo chi qohinegue quiñi qota'a quiyim 'neeta so qomyipi.
Ná'maq lalamaxareteripi ñi qota'a
9Qam qamiri ỹaatqajam qamiri ni'ic lca'acsec ñi qota'a, chaqai qamiri letaxaỹaxanqajanqa nqai'en na qomyipi quiyim taxaỹa'pegue' ñi'maxare ma' qota'a, chaqai co'teete' nqai'ne' qamiri chaqai qamiri lalamaxarete'. Ca dajo 'ne'tegue caqamiri, qaiyi 'xachii' nauá'maq chalego loyaague' lo'ueenataxanaxaco ñi qota'a, ñí'maq roỹaxana'alo qamiri na' viitaugui so napalaxa quiyim noxoñiu'a dá'maq chalego loyac lauaq ñi'maxare. 10Quesom sqai ỹalequetauguilo qamiri ñi qota'a, qam nagui, ca' ỹalequetauguilo qamiri ma' mashic qamiri lalamaxarete'. Quesom qaica ca i'xorenta'pe qamiri, qam nagui i'xorenta'pe qamiri ñi qota'olec.
Ỹaatqajam 'ueenataxañiỹot ñi qota'a
11Qamiri ỹaqaỹarolqa, ñi'xoresentouguilo qamiri, 'ec ỹoqa'a ca chigoxoỹa'gue nqaishin, quiyim sqai quii'uegue da se no'uen lamaanaxanqachic na roshicmaxahi, ma' na'maxare nco'uaata'pegue' da nachaalataxaguii. 12Ỹaatqajam 'maxaraic nqai'ñii da no'ueenataxaguii, na'maxachita quiyim lliguitaugui ná'maq saqa' iuanapega ñi qota'a. Qaiyi ná'maq se no'viiñi naua ỹa'xateta'pe nagui caqamiri, 'ec 'xoic nqai'en ca rasauaxashichii, ca' iuana ma'le dá'maq 'maxaraic 'viichitac, ca' imaqachin ma'le ñi qota'a ma' ỹovita ca na'xa'a quiyim ñi'maxare imit na nasauaxaset quená'ogue najo.
13Ma' mashic viilec so qara'gaxala', ca se napaguiỹalec ná'ogue na ỹanashiguim na qomyipi quiyim lashillipi, paguec cá'maq lashi na nashillipi ma' paguec lecaic yi loma', 14loqo'm na nashillipi quená'maq lelaatqaipi ca'maxare, quiyim ỹa'ue ca nouaxanaxaset ná'maq se no'uen ca ỹo'ueetetac, chaqai imaqachin ná'maq ỹo'ueetetac ca ỹa'maqachiguiñi. 15Ma' ñi qota'a ỹahotaque quiyim qamiri 'viichii ca ỹa'maqachiguiñi, qaiyi qaica ca lligo ca la'qaatec ná'maq qaica ca ỹa'den chaqai na hualoxonyipi.
16'Ñiitari' ca qom quiyim chi nanoiquentac, qam sqai 'ñiitari' ca nanoiquentac quiyim ỹo'uet ca se no'uen. Ta'ta'a quiyim 'ñiitari' caua ỹaatqajam la'aqa ñi qota'a. 17Qaica ca napaguiỹalec, 'maxachii'tegue ná'ogue na qomyipi. Chaqai 'xoriñii ná'maq mashic icoñiguit da na'qaatec. Ro'chiỹa ñi qota'a, chaqai se napaguiỹalec ca lashi na nashillipi.
Qara'ijlec da le'xoric so Cristo
18Ca ná'maq nelaatqaipi ỹaatqajam na'xaỹaxane'ta na na'cororipi, mesqainaata ná'maq huagaxaraic chaqai quiyim ichiretac ca qom, qam qai'neeta cá'maq 'co' quiyim nocqaic. 19Ma' paguec la'maxa queca qom quiyim na'ñaxachiguit ca le'xoric quecá'maq qohinta'gue quiyim ỹa'deentapega ñi qota'a. 20Ma' no'm qamiri 'ue ca 'viichii se no'uen, ca' chaqaica ca ñiichigui quiyim qaỹo'uet ca nouaxanaxashichii, ca' sqaica quet cá'maq 'negue quiyim na'ñaxachiita'piguit. Qam no'm 'ue ca re'xoriguii quiyim 'viichitac cá'maq ỹa'maqachiguiñi, ca' na'ñaxachiguit, ca' dá maxasa' ỹaatqajam ỹa'maxarenta ñi qota'a. 21Ma' chaqaida dá'maq 'em roỹaxanalo qamiri ñi qota'a, ma' so Cristo 'ue da le'xoric sauaxate' qamiri quiyim ỹachaxan da leloxoỹaxac, qaiyi quiijlec da llicyaxac so'maxare. 22Ma' so'maxare qaica ca lasauaxaset, chaqai se ỹauanapega 'ue ca ỹayin. 23Co'na' qaishiuentac so'maxare, se rishiuenaxan; co'na' qaỹahotaque da le'xoric, qam so'maxare se ra'xalenataxan. Ta'ta'a quiyim nañaantacot ñi qota'a ñí'maq se ỹo'maac quiyim nimit ca nasauaxaset. 24Chaqaiso so Cristo i'xat sá'ogue so qarasauaxaset hueetaugui nqai'en so loshicmaxa, i'xatashiguim na' qaipateno queso npatenaxala', qaiyi le'en saxanaxañi da nasauaxaset, ca qolaxalec da 'maxaraic chaalataxac. So'maxare coñirqata, qaiyi remiiuec qamiri. 25Ma' qamiri quesom 'ñiitari' aca qagreta ỹo'meetajlec, qam nagui, ca' pilliỹot so Cristo só'maq ỹa'den netela'alo qamiri, 'neetari' ca neloxoỹaq cana qagreta, chaqai reloqota'a da nachaalataxaguii.
