Da naqataxac quená'maq mashic icoñiguit da na'qaatec
1Nagui sa'ue da ỹaqataxac quená'maq la'gaxala' ná'maq mashic icoñiguit da na'qaatec, ma' ỹim qai'neeta ỹim na'gaxala' shintam aqamiri, chaqai sauanchigui dá'ogue dá'maq le'xoric so Cristo, chaqai qai'neeta shinta ma'le saua'maxare ñouanau'a ca lauaq qaỹachaxan ma'le. 2Ỹaatqajam quelolliỹa 'maxachii'tegue ná'maq mashic icoñiguit da na'qaatec ná'maq mashic qaỹauaaque reloxoiqachicshii quiñi qota'a, 'ñiitari' ca neloxoỹaq cana qagreta. Ỹaatqajam rasapchii'ta, 'viichitac dá'maq ỹahotaque ñi qota'a. Mese repaguitaque quiyim qanetenteguelgoto qamiri qarelaritac chaqai se naquichite'e aca plata. Ta'ta'a quiyim rasapchii'ta ca ro'ueenataxanaxaguii. 3Mesqai 'ñiita'gue quiyim 'ec ralamaxarichii acá'maq loxoita'a. Ta'ta'a quiyim viitaque qaỹadenaxachichigui dá'maq 'ñiitari' quecá'maq loxoita'a, 4qaiyi ma' ỹovita quiyim novi' só'maq reloqota'a ná'ogue na la'gaxalateripi ná'maq mashic icoñiguit da na'qaatec, ca' coñiguit cá'maq nishivichii 'ue lauaq, sqai 'nejem aca lishiuetenaxanqate ca chaqai qom, ma' ishit ỹaso 'nejem aca qo'paq laue.
5Ca' chaqai 'neete'm, qamiri ne'naqa, ỹaatqajam na'xaỹaxañii'ta meca 'naac na qo'xoiquipi. Chaqai quená'ogue na qom qaica ca napacqajan queca liỹa. Ta'ta'a quiyim neneequesentecta', ma' naua naneresañi na'qaatqa 'neracsa':
Ñi qota'a quepaxat ca nemaqajnaxai,
qam nqouaguegue ỹotauan ca neneequesenaxai.
6Ca niñiiquishiñii, 'guiñiỹoto naua laua' ñi qota'olec maq sqaica lqalanec, qaiyi ñi'maxare ỹalamaxachiñi qamiri ma' ỹovita ca laloqo'. 7Chaqai ná'ogue ná'maq 'yiiñitapega 'ỹaañiỹot ñi qota'a, ma' ñi'maxare ỹaatqajam 'ue da 'neeta caqamiri.
8Chaqai ỹaatqajam na'deenaxanqachiñii chaqai nelohitec, ma' so npa'guenaxauahi na'ỹaapec ronoqota'pegue', 'neetari' meca sauaxaic leta'a idaantaque quiyim 'ue ca loxonec. 9Qam quepaxachii, ỹaatqajam na'ñaxachilec da rpi'ỹaxaguii, ma' 'yiiñita quiyim na rqaỹairipi quenaua'que naua lahil na 'laua qaidaata dajo ne'xoric da hueetaugui. 10Qam ma' ime quiyim cocho'qui' viriỹa'guit dajo ne'xoric, ca' ñi qota'a nachiñiñi nqai'ne' qamiri, ra'ñichiriñi, quesaxanaxaqa, qaica ỹayogote' qamiri. Chaqaiñi ñi qota'a ñí'maq ỹaanema qomi' dá'ogue da lqouagaxa chaqai roỹaxanalo qomi' quiyim ñouanqau'a da lauaq sqaica lqodoc quiyim ña'daqatau'a so Jesucristo. 11Ca' chaqai ñi'maxare ñí'maq lalamaxaret da lauaq chaqai da lquesaxanaxa se neme. Ajá'a, ca' chaqaida 'neeta dajo.
Dá'maq pa'aatec niquinaxanaxac
12Najo ilaata ỹiriñi nqaishin ñi Silvano ñí'maq ỹaatqajam qamaxaraic ỹaqaỹa. Sqo vito'olqai' naua ỹa'qaatqa, qam saqatalo qamiri chaqai se'taxatetegueñi da nqouagaxahi mashic coñiguit, ca' queda'maxare, ca' ỹaatqajam 'chiñi nqai'en da le'xorenataxanaxa ñi qota'a. Ca' ỹaatqajam quiitalec ma'le dajo.
13Na mashic icoñiguit da na'qaatec neeta'ñi na Babilonia ná'maq qai'neeta mashic lca'acseripi ñi qota'a, ilatalo qamiri da liquinaxanaxac, chaqai qai'neeta ñi Marcos ñí'maq shinta'gue meca ỹaalec. 14Ca' quiyim niquiñiỹata', ca nqo'goxoỹata' chaqai ỹaatqajam ne'xoriñiỹata'.
Chaqai quiyim qamiá'ogue 'ue da ra'maxahi mashic qamiri lalamaxarete' so Jesucristo. Ajá'a, chaqaida 'neeta dajo.
