1 Samuel 18

₁Ca co'na' ime quiyim so David retaqata'pegue' so Saúl. Ca' so Jonatán 'ec ỹaatqajam lqaỹa so David chaqai ỹaatqajam ỹauotegue, chi ỹovireta'a quiyim 'ec chaqaiso nauotalta'. ₂Qam so Saúl, ca' chaqaiso sojo na'xa'a, ca' icona quiyim lelaatec, ca' sqai ỹaxanec quiyim pil queca la'a' ca leta'a. ₃Ca' so Jonatán chaqai so David ỹaandec da la'qaategue' quiyim se neme quiyim ỹaatqajam nauochaxaua', ma' so Jonatán ỹaatqajam lauochaxat so David 'ec nqai'en dá'maq chi nachaalataxac. ₄Chaqai so Jonatán naqate'e so napoxoqui chaqai so lachiimec ỹantañi, ca' ỹaanem so David, chaqai so lecat, chaqai aso lo'xoshic, chaqai so nosaataxaqui.

₅Ca' quiyi, ca' re'oq quiyim so David qaica ca lqalanec quená'ogue ná'maq qailarelec queso Saúl, vichiguiño' so Saúl ỹano quiyim la'gaxala' so liỹa nalliripi nalauataxairipi. Ca' dajo ỹaatqajam qaỹa'maxarenta queso nalauataxairipi chaqai so nashillipi queso Saúl.

₆Qam co'na' rapil so nalauataxairipi co'na' ime quiyim so David ỹalauat so filisteo, ca so 'aallipi quena na'aateripi quiyi Israel ca'guit so nashi Saúl, ro'ueenaxantagui chaqai rasotetac, ỹaatqajam 'ue da netoonaxac, ỹahote'e ana lasaquinata chaqai ana latoina. ₇Ca co'na' ro'ueenaxantagui chaqai rasotetac so 'aallipi, ỹopilaxateta'gue da la'qaatec, 'naaco' quen:

₈Ca' quedajo, ca' se ỹa'maxagui lauel nqai'en so Saúl. Ca co'na' ro'o, ca 'naaco':

—So David imaalec nqohin quiyim ỹalauat so diez mil qomyipi, qam caỹim, ca qaisauate' saua mil. Ca ¡saqa'leca cocho'qui', ca' qoỹano nashi!

₉Ca queco'na'le, ca' so Saúl 'ue da na'xaỹaxa queso David.

₁₀Ca' queso liỹa nete'e, ca' so ne'ec lecmaxaic chicqo'ot ñi qota'olec ỹoiquentac so Saúl. Ca' so'maxare mashic 'ec lecmaxaic neetaugui so lauo'. Ca' so David iviiquetapigui aso liviigue, ma' chaqai 'neetari'o' quen, qam so Saúl lo'qoota'a aso laqui. ₁₁Ca nanorec aso laqui so Saúl, ma' ỹahotaque ỹa'dac so David, liỹaho nqai'en ñi 'imec lahi. Qam so David dos ỹaho'te llic aso laqui so Saúl.

₁₂Ca' so Saúl no'cha'a so David, ma' ñi qara'gaxala' ỹotauantac so David, qam ñi qara'gaxala' tot ỹotauan so Saúl. ₁₃Vichiguiño' noỹootec nqai'en, ca' ỹanagui quiyim la'gaxala' so mil nalliripi. Ca quena' reloqouec chaqai quena' rapil, so'maxare 'auetauec. ₁₄Ca ma' qaỹotauantac so David quiñi qara'gaxala', ca' ỹaatqajam 'ue nqai 'negue quená'ogue ná'maq ỹo'uet. ₁₅Vichiguiño' so Saúl no'cha'a so'maxare, ma' ỹa'ajantac quiyim noquiiquetashiguim. ₁₆Qam quiyi Israel chaqai quiyi Judá ỹaatqajam nqo'ta so David, ma' chaqaiso só'maq lashi quena' taauec chaqai quena' rapilo quena' nalauat.