1 Samuel 28

₃Ca' queco'na'le, ca' so Samuel shi'co' ileu, ca sá'oco' so llaalqaipi so Israel noỹenteguelco' so'maxare. Ca co'na' ime, ca' qaishinñi quiyi Ramá yí'maq na'a' chi ne'xaỹoqsoqo'. Qam so Saúl ỹo'daauco' na'le quiyi na'laua ná'maq richaauec nqai'en da 'ueenataxac chaqai na ima'guit quiyim retaxaỹa'pegue' na nqui'i.

₄Ca' so filisteoipi lapoonta' so nalliripi, ca' quepegue' yi Sunem, ca na'ñi. Chaqai so Saúl qai'neeta lapoonta' sá'ogue so Israel llaalqaipi. Ca' na'maxajñi, quepegue' aso quemaralec ladocai quiyi Gilboa. ₅Qam co'na' iuana so nalliripi so filisteoipi, ca' no'chi, ma' ỹaatqajam 'ue da lichic. ₆Co'na'le, ca inato' ñi qara'gaxala', qam ñi qara'gaxala' sqai saachiguit so'maxare quiyim chicqochigui nqai'en ca le'guemataxac, loqo'm so nenatec qa'oqui' Urim, loqo'm quena letaxaỹaxaquiripi ñi'maxare. ₇Vichiguiño' 'naaco' queso lotauaripi nashillipi:

—Michiỹaque maca 'aalo quiyim ishit retaxaỹa'pegue' na nqui'illipi. Ca ma'le, ca shicpegue', ca' sa'ue ca inataxanaxac.

Ca' so lotauaripi nashillipi 'naaco':

—Quiyi Endor 'ue añi 'aalo ishit quiyim nauego na nqui'illipi.

₈Ca' so Saúl ỹoỹoota'a da no'ueenataxac, ma' ỹoqa'alo saua ỹañiñi loho. Ca' ỹa'vii saua dos nauegaxaua'. Ca co'na' pe, ca' quepegue'o' aso 'aalo, ca 'naaco':

—Aỹim sahotaque quiyim 'xachi' cá'maq ñaqai naata caỹim, chaqai quiyim ỹaxañiraque ca lqui'i cá'maq sahotaque quiyim naviquiro.

₉Ca' aso 'aalo 'naaco' queso'maxare:

—Qami' 'yiiñite' dá'maq ỹo'uet so Saúl na' ỹo'daauec quena la'a' ná'maq richaauec nqai'en da 'ueenataxac chaqai na retaxaỹa'pegue' na nqui'i. ¿Chi'neco' ma' vi'saque quiyim ypa'xañichiguit cá'maq 'em quiyim qayalauat ma'le?

₁₀Qam so Saúl ỹaanec da la'qaatec quiñi qara'gaxala', 'naaco':

—Saanec nagui da ỹa'qaatec quiyim 'qaachigui ñi qara'gaxala' quiyim qaica ca qohinegue qami' ma'le quedajo.

₁₁Ca' aso 'aalo 'naaco':

—¿Negue' cá'maq vi'saque quiyim soỹaxanaque?

Ca' so Saúl 'naaco':

—Ỹaxañiraque noviro nqai'ñi' ca lqui'i so Samuel.

₁₂Ca' aso 'aalo chaqa'ma' iuañi'chiguit so Samuel, ca' ỹaualaq. Ime, ca 'naaco' queso Saúl:

—¿Chi'negue ma' yayiñi'? ¡Ma' chaqaiqami' ná'maq qami' Saúl!

₁₃Qam so nashi Saúl 'naaco' caso'maxare:

—Totaxan ro'chi'i'. ¿Negue' só'maq huañita nagui?

—Seuane'ta so nqui'i nenoxonshiguim chicqotaugui na 'laua —'naaco' aso 'aalo. ₁₄Ca' so Saúl renataxano', 'naaco':

—¿Negue' ca 'neeta ca no'ueenataxac ca'maxare?

Ca' aso 'aalo 'naaco':

—Na ỹale ỹaatqajam qo'xoic, na'maxare ỹahote'e na lapo'.

Ca na'le, ca' so Saúl chaqa'ma' ỹa'den quiyim chaqaiso so Samuel. Ca chaqa'ma' ỹa'chi'iñi naua le'cootal quena 'laua, ỹoviraxata'guit na latap na 'laua. ₁₅Ca' so Samuel 'naaco' queso'maxare:

—¿Chi'negue ma' yitaxañi'sac, vi'saque quiyim ñoviro?

Ca' so Saúl 'naaco':

—Sai'c, 'xoic da ỹachitachic, ma' se yayaxanac na filisteoipi, chaqai ñi qota'olec mashic yalat, tot ỹa'ue ca ỹa'xaỹaxac chicqochigui nqai'en na letaxaỹaxaquiripi, loqo'm ca ne'guemataxac. Vichiguiño' soỹaxane qami', qaiyi choxochi' cá'maq shinta'gue ca so'uet.

₁₆Ca' so Samuel 'naaco' queso'maxare:

—Qam ¿chi'negue ma' yinachi'sac, ma' ñi qara'gaxala' shi'gue ca'e qami'? Ca' nagui, ca npa'guenaxaua'e' ñi'maxare. ₁₇Ñi qara'gaxala' ỹo'uet nagui caqami' dá'maq sa'xat na'le na' ñaqai aỹim letaxaỹaxaqui. Nagui, ca' rouootaxana'gue dá'maq lo'ueenataxanaxac ỹaanem qami' na'le quiyim qami' nashi, ca' ỹaanem ca nauegaxaua'e' David. ₁₈Ma' qami' se na'xaỹaxañita na'le da la'qaatec ñi'maxare, chaqai sqai pacqajñirigui quiyim nomachichiriñi lauachi' na Amalec llaalqaipi. Ca' chaqaida dá'maq 'em ỹo'uet dajo caqami' nagui ñi'maxare. ₁₉Chaqai ñi qara'gaxala' qai'neeta ỹaanec ma'le na Israel llaalqaipi chaqai qami' quiyim noxonec quena filisteoipi. Ca' nete'e qami' chaqai naua qachaalaxahi' viita'ñi najo seueta'ñi qai'neeta. Chaqai ñi qara'gaxala' ỹo'uet quiyim qai'neeta na Israel nalliripi noxonec ma'le quena filisteoipi.

₂₀Ca' so Saúl chaqa'ma' huaañi ladogoỹalec, ma' no'daxateterec saua la'qaatqa so Samuel. Ca' ileueta. Te'e qam se que'o' queso na'xa'a chaqai queso pe. ₂₁Ca' aso 'aalo co'na' ỹa'den quiyim so Saúl se naỹajan, ca noquiiga'a, ca 'naaco' queso'maxare:

—Najo relaata'e' ỹaatqajam ỹo'uet dá'maq shiilaxañisaque. Ỹim ỹaatqajam saañiguit da lichic da ñachaalataxac, qam ña'xaỹaxanta so'uet dá'maq vi'saque. ₂₂Vichiguiño' nagui ñi'xoresene'tot qami' quiyim na'xaỹaxañiriua' quiyim so'uet ca repetaxanaxachi', qaiyi 'ue ca rquesaxanaxa'e', ca' shichi' qui'.

₂₃Qam so Saúl se ỹa'maxaren que'e. Qam saua nauegaxaua' nashil chaqai aso 'aalo ỹaatqajam 'ue da lepagaxalligue', vire'to' na' qaishit. Ca chaqa'ma' ne'laxashiguim, ca' nqa'xanlec ca nomala'. ₂₄Ca' aso 'aalo, ca' eec, ỹalauat so huaqui llaalec 'uegaxasaq neeta'ñi yi la'a', chaqai ỹaqaulachit so 'aríña. Ca' ỹalataq aso laqaulata qaca aca lalequete pe'taxachigui. ₂₅Ime, ca ỹodou'a so Saúl chaqai saua nauegaxaua' nashil. Ca co'na' ỹomate' ca lqui'ỹaxague', ca niquinto. Ca' chaqaiso so pe, ca' pile'.