Ñi qara'gaxala' roỹaxana so Samuel
1Ca' so ne'nec Samuel queetalec da lo'ueenataxanaxac quiñi qara'gaxala' hueeta'ñoto naua lelaataxanaxaco so Elí. Ca' quesauajo na'xata' ỹaatqajam qaica ca qom qoỹaanem ca la'qaatec quiñi qara'gaxala', chaqai ỹaatqajam 'ue da lovic ca qom qaỹa'ue ca leuanaxanaxac. 2Qam ỹovito' so na'xa'a quiyim so Elí tot qailligueme' neuanñi, laqato' hueetaugui ca lauo'. 3Ca' so Samuel qai'neeta nenantañi, hueetaugui aso lo'ueenaxanaxaqui ñi qara'gaxala', hueeta'ñi yi neeta'ñi aso lahi' saua laqataxaco ñi qota'olec. Qam aso ncoỹeraxanaxaqui quiñi no'ueenaxanaxaqui ñaqai queeta ỹaviquetaugui. 4Co'na'le, ca' ñi qara'gaxala' roỹaxanegue da leenaxat so'maxare, 'naaco':
—¡Samuel!
—¡Aỹim, najo seueta'ñi! —'naaco' so'maxare.
5Ime, ca' ne'guentau'a ca hueeta'ñi so Elí, ca 'naaco':
—Ỹim ñovira'a qami'; ¿negue' cá'maq vi'saque ma' ỹaxañiriua'?
Ca' so Elí 'naaco':
—Ỹim se soỹaxana qami'. Pilliriri' nenañiriñi.
Ca' so Samuel pilri', ca' liỹa nenanñi. 6Qam ñi qara'gaxala' lotqai liỹa roỹaxana, 'naaco':
—¡Samuel!
Ca' so Samuel ne'laxashiguim, ca quepegue' so Elí, ca 'naaco':
—Ỹim ñovira'a qami'; ¿negue' ca vi'saque ma' ỹaxañiriua'?
Ca' so Elí 'naaco':
—Ỹim se soỹaxana qami', qami' ỹaalcolec; pilliriri' nenañiriñi.
7Ca' so Samuel saqa' ỹa'den da lavillaxac ñi qara'gaxala', ma' ñi'maxare saqa'leca ca ỹachaxanem so'maxare. 8Qam ñi qara'gaxala' na' ỹovi' quiyim tres roỹaxana so Samuel, ca so'maxare quepegue' so Elí quiyim 'naac:
—Ỹim seuete'e najo; ¿negue' ca vi'saque?
Ca' so Elí retan quiyim chaqaiñi ñi qara'gaxala' ñí'maq roỹaxana so ne'nec. 9Ca' so Elí 'naaco' queso'maxare:
—Mo'e', nenañiriñi. Ca ma' roỹaxan ñi qara'gaxala', ca 'ñiraco': Taxahi', ma' najo relaachiqui' na'xaỹaxantapega qami'.
Co'na'le, ca' so Samuel pilri', ca' nenanñi queca loma'. 10Co'na'le, ca' ñi qara'gaxala' novita so'maxare, ca' hua'e, ca lotqai roỹaxana queda leenaxat, ipacqajanchigui dá'maq 'avichiguiñi loỹaxanaxac, 'naaco':
—¡Samuel! ¡Samuel!
Ca so'maxare 'naaco':
—Taxahi', ma' najo relaachiqui' na'xaỹaxantapega qami'.
11Ca' ñi qara'gaxala' 'naaco':
—Ỹim 'ue ca so'uet ma'le quena Israel llaalqaipi, ca ná'ogue ná'maq 'xaỹa da'maxare ỹaatqajam 'xoic lqui'ic nqai'en da'maxare. 12Ca ma' ỹovita cajo na'xa'a, sepacqajanchigui quiñi Elí dá'ogue dá'maq shinac quena llaalqaipi. 13Ma' shi'gue shintapega ñi'maxare quiyim sa'ue ma'le ca nouaxanaxaset quedá'maq ỹo'ueetesac se no'uen naua llaalqa, ca ñi'maxare shi'gue ỹa'den. Ma' naua llaalqa se no'uen da ỹa'xate' taalec nqai'ne' aỹim, qam ñi'maxare se quepaxate' quiyim nelaxalo. 14Ma' mashic saanec da ỹa'qaatec taatougui nqaishin na llaalqaipi ñi Elí quiyim dá'ogue da se no'uen ỹo'ueetetac sqai pal, 'eno'm qaỹavigaxat ca nachitaxanataxanaxat quiyim qoỹaanot aỹim.
15Ca co'na' ime dajo, ca' so Samuel liỹa nenanñi ỹovira'guit so liỹa nete'e, ca' ỹauachiguilo naua lasomi' ñi no'ueenaxanaxaqui quiñi qara'gaxala'. Ca' so Samuel no'chi quiyim ỹa'xat da leuanaxanaxac queso Elí. 16Qam so Elí roỹaxana so'maxare, ca 'naaco':
—¡Qami' ỹaalcolec Samuel!
Ca so'maxare 'naaco':
—Aỹim, seuete'e najo.
17Ca' so Elí inato' so'maxare, 'naaco':
—¿Negue' cá'maq 'neeta ca la'qaatec ñi qara'gaxala' caqami'? Ñi'xoresene'tot qami' quiyim cá'ogue 'xachi', qaica ca 'xochiriñi. ¡Ca' ñi qota'olec rouaxañi', no'm 'ue ca 'xochiriñi quecá'ogue cá'maq ỹa'xat caqami' ñi qara'gaxala'!
18Ca' so Samuel ỹaatqajam ỹa'xate'tem sá'ogue so na'qaatqaipi so Elí qaica ca ỹoxojñi. Ca' so Elí 'naaco':
—¡Ỹaatqajam chaqaiñi ñi qara'gaxala'! ¡Ca' chaqaiñi ñi'maxare ỹo'uet cá'maq ỹaatqajam ỹa'maqachiguiñi!
19Ca' so Samuel noquiiquetashiguim da ladogaxa, ca' ñi qara'gaxala' ỹaatqajam ỹotauan so'maxare, chaqai ipaquichiguilo nqai'ne' naua la'qaatqa. 20Chaqai sá'ogue so Israel llaalqaipi ỹa'den quiyim so Samuel ỹaatqajam llic letaxaỹaxaqui ñi qara'gaxala', chicqochi'ñi yi Dan queda rapiguim, chi ỹovireta'a yi Beerseba queda 'guiñi. 21Ca' ñi qara'gaxala' lotqai liỹa nachaxan hua'ñi yi Silo, ma' chaqaiyi hua'ño' na' nachaxana so Samuel quiyim ỹa'xat da la'qaatec.
