So Saúl natena'guit so Samuel
1Ca' queso llaalqaipi so Benjamín 'uo' so ỹale leenaxat Cis, so'maxare llaalco' so Abiel chaqai laual so Zeror. Só'maq 'au lapi' chaqaiso' so Becorat só'maq llaalec so Afía. Ca' so Cis ỹaatqajam 'ue nqai 'negue nqohin. 2So'maxare 'uo' so llaalec ne'nec ỹaatqajam lo'yaxanec, leenaxat Saúl. Quena Israel llaalqaipi qaica ca liỹa 'nejem so'maxare, ma' qaica ca 'nejem da ladogaxa.
3Ca 'uo' so na'xa'a, ca' so Cis na'laaño' so lalo 'ashinyipi. Co'na'le, ca 'naaco' queso llaalec Saúl:
—Na'maxachiriñi, ca daañiraco' ma'le ca 'ashinyipi. Vite ca riỹa'e' quenaua qarelaatqa.
4Ca' so Saúl ỹapaca'ta quiyi 'xoic ana quemaralec qa' ladocai quiyi Efraín, ca que'tegue qai'neeta yi 'laua Salisa, qam se ỹanatalo caua 'ashina. Ca' quejlec qai'neeta yi 'laua Saalim chaqai yi 'laua Benjamín, qam qaiyiita se ỹanatalo. 5Ca co'na' ỹovita yi 'laua Zuf, ca' so Saúl 'naaco' queso liỹaatac lelaatec:
—Qolaq, sopilaq, ma' ca ita'a peeta'a paguec ỹa'deentapigui qomi' queca 'ashinyipi.
6Ca só'maq lelaatec 'naaco':
—Quenajo na'a' lodegaxat 'ue ñi ỹale na'qaataxanaq. Ca ná'ogue na qomyipi ỹaatqajam 'ue nqai 'negue nqai'en, ma' ná'ogue ná'maq ỹa'xat ñi'maxare ỹaatqajam lliqueta. Sha'apiguito' ỹachaxan cá'maq nayic qolqa'tegue ma'le.
7—Hua', qolaq —'naaco' so Saúl—. Qam ¿nega'ỹo' ca qarame ma'le quecajo ỹale? Ma' mashic tot qaica ca pan quenaua qochoxoqui'. Ỹaatqajam qaica quet cá'maq qarame quecajo ỹale ra'qaataxanac.
8Ca só'maq lelaatec 'naaco':
—Ỹim 'ue ayi ñishitetañi ỹamo'lli' chicqaugui ana plata. Saanqaem ma'le ñi ỹale na'qaataxanaq, qaiyi ỹachaxanema qomi' ma'le ca nayic qolqa'tegue.
9(Nallaaqo' co'quena' 'ue ñi quena Israel llaalqaipi ỹahotaque retaxaỹa'pegue' ñi qota'olec, ca 'naaco' quen: “Qolaxapegue' ñí'maq 'ue na ra'ỹaauec.” Ca' chaqaina ná'maq nagui qohinac letaxaỹaxaqui ñi qota'olec, qam quesom quena' qaroỹaxana, ca' qohinac: Ra'ỹaauec nanchaqaina.)
10—Chaqaida nqaishinaq —'naaco' so Saúl—. Qolaxapegue'.
Ca saua'que que', querepegue' ca na'a' neeta'ñi só'maq letaxaỹaxaqui ñi qota'olec. 11Ca co'na' mashic que', taasashi'ma ca na'ñi so na'a', ca 'uo' so natenda'guit nequetegaxaipi idaanaque huaxaỹaq. Ca inate'o' so 'aallipi, 'neraco':
—¿Peeta'a chaqaino' najo hua'ñi quiyim ñauanaxa'e' cá'maq ra'ỹaauec nanchaqaina?
12Ca saua'maxare 'neraco':
—Ajá'a, qam paguec lesega yi na'ñi. Qam riỹalahi, ma' ca'maxare nagui nacpegue' najo na'a', ma' nagui 'ue ca qaỹavigaxat nachitaxanataxanaxat huaalec añi ncopatoxonaxalate. 13Ca ma' viriho, ca chaqa'ma' daañiỹaque, ma' saqa' taashi'megue ada ncopatoxonaxalate, ma' 'ue ca nqui'ỹaxac. Ma' na qomyipi se que'e quiyim saqa' novi' ca'maxare, ma' ca'maxare ỹouen quiyim 'au nqouagaxainlec ca nachitaxanataxanaxat. Ca ma' ime, ca chaqa'ma' que'e ná'maq nalecseripi. Vichiguiño' riỹalaitac nagui, qaiyi neuañiguit ma'le.
14Ca saua'maxare lotqai que', taasashi'ma yi na'a'. Ca co'na' ỹovirera'a yi na'a', ca natenda'guit so Samuel taata'oga ca na'ñi aca ncopatoxonaxalate.
15Qam quesó'maq 'auaxaic na'xa'a, na' saqa' ỹovi' so Saúl, ca' ñi qara'gaxala' shi'co' ỹa'deenaxanaxanegue so Samuel. 'Naaco':
16—Ma' nete'e ma' chaqaiyi ñiichi'ñi añi ra'aasa, ca ñila' ca ỹale chicqa'a yi 'laua Benjamín. Ca' chaqaica cá'maq cochirelec ma'le quiyim vite lashi na ỹalamqateripi, ná'maq llaalqaipi so Israel. Ca' chaqaica cá'maq nca'laxatec ma'le queda lelaataxanaxac na filisteoipi. Ma' ỹim ỹaatqajam 'ue da i'xorenataxanaxa na' noviro'ot aỹim da lashiilaxanaxac.
17Ca' so Samuel co'na' idaana'guit so Saúl, ca ñi qara'gaxala' 'naaco' queso'maxare:
—Chaqaina najo ná'maq ỹale shintapega, chaqaina ná'maq reloxoỹa'a ma'le na ỹalamaxareteripi.
18Ca co'na' ỹovirera'a ñi lasom yi na'a', ca' so Saúl nqo'neuo queso Samuel, ca 'naaco':
—Qouaquiric, choxochi' ca la'a' cá'maq ỹale ra'ỹaauec nanchaqaina.
19Ca' so Samuel 'naaco':
—Chaqaỹim ná'maq daañisaque. Ỹala'e', 'avisashiguim ma' saxashi'megue añi ncopatoxonaxalate, chaqai qami' iqui'ỹaxaua ma'le quiyi'maxare. Toco' ma' nete'e, ca' sa'xatem qami' cá'ogue cá'maq yinachisa'pegue. Ca ma' ime, ca' qaigueme pilli'. 20Qam quecauá'maq qalohi' 'ashiñi' na'lerañi quesaua tres na'xata', sqaica ca huapigui qavilli', ma' mashic shi'gue qaỹanatalo. Ca dá'ogue dá'maq paguec ỹapacauec nqai'en yi llaalqaipi so Israel ỹaatqajam tajlec qami' chaqai ca rqaỹachi'ipi.
21Ca' so Saúl 'naaco':
—¡Qam ỹim sachigoxougui na llaalqaipi so Benjamín ná'maq paguec sqo vito'olqai' quena llaalqaipi so Israel! Chaqai yaua ita'al ỹaatqajam qaica ca lemaqachigue' quená'ogue na llaalqaipi so Benjamín, sqai 'nejem na liỹaripi. Ca ¿chi'neco' ma' 'xachisac dá'ogue dajo caỹim?
22Co'na'le, ca' so Samuel ỹauego so Saúl chaqai so lelaatec, ca ỹanda'ñi yi loma' ná'maq paguec 'ue ca 'negue, ỹalequetero nqai'ne' queso 'uo' ca treinta qomyipi. 23Ime, ca' so Samuel 'naaco' queso neuooshaq:
—Nodo'iriri' cá'maq la'at saanem qami' cataq shinac na'le quiyim ỹoochisa'oga.
24Ca' so neuooshaq chaqa'ma' naqajshiguim so na'guet no'ueentagui, ca' ỹaanem qui'ỹaxanegue so Saúl. Ca' so Samuel 'naaco':
—'Ena ná'maq qaỹoỹooteta'oga quiyi qaỹauaaque qanoqe'. Ca conta, 'qui', ma' ỹim soỹoote'oga sauaaque qanoqe' nagui quiyim saaltac najo qomyipi.
Ca' so Saúl que'e, lqui'ỹaxaua so Samuel quesojo na'xa'a. 25Ca co'na' renochiñi chicqorashi'megue aso ncopatoxonaxalate naari'ña so na'a', ca chaqa'ma' qaỹa'maxatetañi ca loma' so Saúl hueetalec nqohin ca lelaq ca 'imec. 26Ca' so Saúl nenanñi. Ca na' richiguiñi, ca' so Samuel roỹaxana so Saúl quena lelaq so 'imec. Ca 'naaco':
—Ne'laxachirishiguim, ca' qui', pilli'.
Ca' so Saúl ne'laxashiguim. Ime, ca qaicoỹarauec queso nayic queso Samuel. 27Ca co'na' chicqorashi'ma yi na'a', ca' so Samuel 'naaco' queso Saúl:
—'Aueta nqai'ñi' da relaachiqui', ca' qami' qovire'e lecocho'qui', ma' sahotaque quiyim sa'xatem qami' dá'maq 'naac ñi qota'olec caỹim.
