1 Tesalonicenses 4

₁Ca nagui qamiri qarqaỹa', ñi'xoresenqa'toto chaqai saqataxalo qamiri, sahoqota'ahi da leenaxat so qara'gaxala' Jesús, quiyim quiijlec da leloxoỹaxac dá'maq sapaxaguinaxaque qamiri, qaiyi qaỹa'maxarente' qamiri quiñi qota'a, ca chaqaida dá'maq quiitalec, nqo'neetauec nqai'ñii.

₂Ma' ỹaatqajam 'yiiñita ná'maq qaraqataxaquipi saanqaema qamiri. Da'maxare sachigoxotqo'tot so qara'gaxala' Jesús. ₃Ma' dá'maq ỹahotaque ñi qota'a quiyim ỹaatqajam nañaañi'tot ñi'maxare, chaqai qaica ca lapaatapi'ñi' aca se loua caqamiri. ₄Queca 'óna qom ỹouen quiyim ỹa'den ỹa'ue aca ỹaatqajam loua, chaqai netelalta', chaqai quiyim ỹauotegue aca loua. ₅Se ỹa'maxañi quiyim ỹahotaque chi i'en aca 'aalo, se no'uen da lqo'iichi, 'nejem na qomyipi saqa' iuanapega ñi qota'a. ₆Ca' qaica ca napacalec chaqai rayinaxanta'gue dajo queca lqaỹa, ma' so qara'gaxala' Jesús ỹaatqajam ỹouaxan ná'ogue ná'maq ỹo'ueetetac dajo. Ca' dajo dá'maq shi'gue sa'xatqatac quiyim rovichiỹa'guit. ₇Ma' ñi qota'a roỹaxanalo qomi' quiyim co'teeta nqai'en da qanachaalataxac, vichiguiño' se ỹa'maxañi quiyim ñapio'xotaq da qanachaalataxac. ₈Ca' vichiguiño' quiyim 'ue ca se ỹacoñiguit dá'maq napaxaguinataxanaxac, ca ca'maxare mesqaica ca chaqai qom ca se icoñiguit, ma' chaqaiñi ñí'maq qota'a ñi se icoñiguit, ñí'maq ỹaanema qomi' so Espíritu Santo.

₉Ca' da leloxoỹaxac quiyim qaỹauotegue ca nqaỹa npi'ỹaxaua, ca tot ỹouen quiyim shiriñi, ma' chaqaiñi ñí'maq qota'a rapaxaguiñiigue quiyim rauochigue ca riỹahi. ₁₀Ma' chaqaida dá'maq 'ñiita'gue quen quená'ogue na qarqaỹaripi na'gue da Macedonia. Qam qamiri qarqaỹa', ñi'xoresenqatouguilo qamiri quiyim da re'xorenataxanaxahi quiitalec, nqo'neetauec nqai'ñii. ₁₁Nquipichiỹa'pegue' quiyim qaicanqaida caqamiri, quiñi 'óna quelolta'pegue' cá'maq chi lalamaxaret, chaqai ỹaconta'pegue' cá'maq chi lo'ueenatec. Ca 'eda dá'maq qaraqataxac na'le, ₁₂qaiyi ná'maq saqa' icoñiguit da na'qaatec lo'yaxanec nqai'en da na'qaataxaguii, chaqai qaica ca viñitaque.

₁₃Qamiri qarqaỹa', se sa'maxarenaq quiyim sqa 'yiiñii dá'maq 'neeta quená'maq mashic ileu, qaiyi sqa chigohita 'ñiitam ná'maq liỹa ma' sqaica ca naquitaxac. ₁₄Ma' quiyim qomi' seuaqlec quiyim so Jesús ileu qam liỹa nca'leuec, ca' qai'neeta seuaqlec quiyim ñi qota'a liỹa nca'laxatec ma'le ná'maq queeta'ñi' quiyim huelec so Jesús, qaiyi liỹaatac so'maxare.

₁₅Quedá'maq chi la'qaatec so qara'gaxala' Jesús se'taxataxañi dajo: Coqomi' ma' ñaqai qarca'leetauec ma' novi' so'maxare, se sa'auaq quená'maq mashic ileu. ₁₆Ma' chaqaiso só'maq qara'gaxala' Jesús ma'le renotec quena piguim, naquetagui da lquesaxanaxa da nelaataxac, chaqai naquetagui da loỹaxanaxac ca lashi na chicqashiguim qota'a lelaatqaipi, chaqai da lelamaxa aca npe'te, ma' qaipe'taxanlec nqai'en najo ñi qota'a. Ca' ná'maq queeta'ñi quiyim huelec so Cristo, ca' liỹa nca'leuec nqohin. ₁₇Ime, ca lotqai qoqomi' ma' ñaq qarca'leetauec, ca qai'xate' qomi' salecqatougui so'maxare quena naueguelec quiyim ñauanaxaguit so qara'gaxala' Jesús queda pa'aashiguim. Ca' quiyi, ca qaica lqodoc quiyim qariỹaatac so'maxare. ₁₈Vichiguiño' quiñi 'óna caqamiri ỹotauanegue ca liỹa dajo na'qaatec.