1 Timoteo 1

₁Aỹim Pablo, ỹim lelaatec so Jesucristo. Ca' dajo ñilaataxac chicqo'ot ñi qota'a ñí'maq qarca'laxaqui chaqai so qara'gaxala' Jesucristo só'maq ỹaatqajam qarpe'eet. ₂Qami' Timoteo, 'nejem quiyim qami' ỹaalec, ma' ỹim chigoqchiro'ot da rpi'ỹaxaqui'. Selata qami' ana ỹerecse, ma' yishiitaque quiyim coñichiguit ca qouagaxa, chaqai ca ne'xorenataxanaxa, chaqai da neuagaxa chicqo'ot ñi qota'olec chaqai so qara'gaxala' Cristo Jesús.

₃Sahotaque quiyim qami' ñaqo ñira'ñi na na'a' lodegaxat Efeso, 'nejme' saua liỹa' na'xata' na' saigue da Macedonia, ma' 'uo' na rapaxaguinataxanta'pegue da mese leloxoỹaxac. Vichiguiño' sahotaque quiyim 'ñirapegalo caua'maxare quiyim totqai queesalec quiyim rapaxaguinataxansa'pegue dajo, ₄chaqai sqa taiguit qana'xaỹaxana ca chi na'qaataxanaxac chaqai se neme da no'leentaxanaxac queso 'auaxaic qareta'allipi. Ma' da'maxare ta'ta'a ỹa'ue da co'uaxac qaica ca 'negue, chaqai se ỹotauan ca qom quiyim ỹaqamqata quedá'maq qoỹaanem quiñi qota'a quiyim 'ue da npi'ỹaxac.

₅Ma' dá'maq 'neeta dajo nelaataxanaxac qaỹahotaque quiyim ñi'xoresenaqta'. Qam ca le'xorenataxanaxa ca qom chicqochigui aca le'taxanata co'teeta, chaqai qaica canchaqaica quedá'maq 'neetari', chaqai ca lpi'ỹaxac ỹaatqajam 'chichiguiñi. ₆Ma' 'uo' na mashic ilamqauec quiyi ỹa'maqachiguiñi, ỹo'maqajnac na na'qaatqaipi sqaica ca 'negue. ₇Na'maxare ỹahotaque quiyim napaxaguinataxanaq quiyim rapaxaguinataxanegue na laqataxaquipi ñi qota'a. Qam ỹaatqajam se ỹa'den dá'maq ỹa'xatetac, chaqai dá'maq rapaxaguinataxanta'pegue, 'neetapega quiyim ỹaatqajam chaqaida leloxoỹaxac.

₈Sa'deenqata quiyim na laqataxaquipi ñi qota'a ỹaatqajam ỹa'maqachiguiñi, quiyim ỹaatqajam qaipacqajanchigui ca leloxoỹaxac. ₉Ma' sa'deenqata quiyim na naqataxaquipi qaỹo'uet, qam sqa taalec nqohin ca ỹo'ueetetac ca ỹa'maqachiguiñi. Da naqataxac qaỹo'uet, qam taalec cá'maq pa'guenaxanaxaic, chaqai na se na'xaỹaxan, chaqai na hualoxonaq, chaqai na sauaqhuaic, chaqai na sqaica ỹauaaque ñi qota'a chaqai ná'maq mashic icoñiguit da na'qaatec, chaqai na ỹalauat ca leta'a loqo'm aca late'e, chaqai quená'ogue na lauataxanaxai. ₁₀Na naqataxaquipi imit ca qom nocachita'piguit aca ỹoqa'a 'aalo loqo'm hueeta'piguit ca chi nallishiua, chaqai ca rocacha ca liỹa, chaqai quena 'maatqaiquipi loqo'm ca ỹa'xat ca i'taxajñi qam la'maachic. Na naqataxaquipi imit ỹovira'oga ná'ogue ná'maq se na'xaỹaxana ná'maq ỹaatqajam 'maxaraic napaxaguinataxanaxac. ₁₁Ma' dá'maq ỹaatqajam 'maxaraic napaxaguinataxanaxac ỹaatqajam nachiñi'chiguit da na'qaatec chicqaugui dá'maq ỹapaguec loyac nca'laxa, dá'maq chicqo'tot ñi qota'a ñí'maq qaimaqachintac. Ca' da'maxare ỹamaxailec quiyim sa'xatetac.

₁₂Saanot da ña'aachic ñi qara'gaxala' Jesucristo, ñí'maq nañaañim da ña'ñaaqataxac quedajo, ma' ỹa'den quiyim yaqamqata, ca' pataxailec da lo'ueenataxanaxac. ₁₃Ỹo'uet dá'ogue dajo caỹim, se ỹo'leenta'a quiyim shi'gue taateguelec nqaishin na ỹa'qaatec se no'uen, socantac chaqai seshiuentac. Qam ñi qota'a ma' ỹaatqajam i'xoren aỹim, ma' saqa' seuelec so Jesús, chaqai ỹaatqajam se sa'den dá'maq so'ueetetac. ₁₄Vichiguiño' da lqouagaxa so qara'gaxala' ỹaatqajam 'xoic lecaic caỹim, chaqai liỹa da npi'ỹaxac chaqai da ne'xorenataxanaxa hueetauguilo qomi', ma' ña'daqatau'a so Cristo Jesús.

₁₅Ca' dajo dá'maq ỹaatqajam lliquetam, chaqai qaica quet cá'maq sqai huelec quiyim so Cristo Jesús naỹa na 'laua, ma' ỹahotaque quiyim nca'laxatec na qomyipi hualoxonyipi, qam quena'maxare, ca' ỹim ná'maq ỹapacauec da iualoxonqaishic. ₁₆Qam qaiyiita ñi qota'a yi'xoren, qaiyi caỹim 'auaxaic ỹachaxan so Jesucristo quena qomyipi da leualaxavic lodegaxat. Ma' ỹahotaque quiyim aỹim laloqojnaxanaxat, qaiyi ca qom quiyim ma' huelec so Jesús, ca' ỹacoñiguit da nca'laxa sqaica lqodoc. ₁₇Ca vichiguiño' se neme quiyim semaqachinaq ñi qota'olec ñí'maq qarashi qaica lqodoc, ñí'maq tot ileu, chaqai se qaiuana, chaqai qaica 'nejem, chaqai 'deenaxanqachaqaic. Ajá'a, ca' chaqaida 'neeta dajo.

₁₈Timoteo, ma' qami' ỹaalec, ca saanem qami' da ỹaqataxac, qaiyi loquirelec yí'maq no'uen queda rpi'ỹaxaqui' chaqai qaica canchaqaica quedá'maq 'ñiite'. Pacqajñiterelco' ma'le da na'qaatec caqami' chicqaugui na'le na la'qaataxanqajanqaipi ñi qota'a. ₁₉Ma' mashic 'ue na ilamqauec, ca'e da lpi'ỹaxac, ma' sqai quelec lauel dá'maq ỹa'maqachiguiñi la'deenataxanaxac. ₂₀Ca' chaqaida 'neete' saua Himeneo chaqai so Alejandro. Ca vichiguiño' saua'maxare saañiguita so na'ỹaapec, qaiyi sqai queesalec quiyim i'neesac ñi qota'a quenaua la'qaatqa.