Dá'maq 'neeta ca no'ueenataxac na la'gaxalateripi ná'maq mashic icoñiguit da na'qaatec
1Dajo dá'maq ỹaatqajam lliqueta: Quiyim 'ue ca ỹahotaque quiyim la'gaxala' ná'maq mashic icoñiguit da na'qaatec, ca ỹaatqajam no'uen no'ueenatec yí'maq ỹahotaque ỹo'uet. 2Vichiguiño' quiyim cá'maq la'gaxala' ná'maq mashic icoñiguit da na'qaatec se ỹa'maxañi quiyim se no'uen cá'maq na'qaataxac. Chaqaidaata quiyim 'oono'lli' nqai'en aca loua, chaqai ỹaatqajam ỹa'maxate'tegue da llicyaxac, nelootec, chaqai qaica ca taỹapegueu'a. Ỹaatqajam se ishit quiyim se idaañiguit quet ca namaqategueri', chaqai ỹaatqajam ỹa'den da lapaxaguinataxanaxac. 3Chaqai mese ne'taaxai, chaqai mesqai 'aueteguelec ca lauelgaxanaxac. Chaqai mesqai queetalec quiyim imitete'e aca lauegue. Ta'ta'a quiyim huagaxaraic, chaqai hualaxauaic, chaqai se imitete'e aca lauegue plata. 4Chaqai ỹa'den quiyim ra'ilec ca la'a', chaqai ỹapaxaguin ca llaalquenaxanaxac quiyim 'xaỹaxanaxaraic chaqai ỹa'maxate'tegue ca liỹa. 5Ma' no'm 'ue ca se ỹa'den ỹashaxan ca lomashaxac, ca ¿negue' ca 'neeta'gue quet quiyim ỹashaxantac ná'maq mashic icoñiguit da la'qaatec ñi qota'a? 6Se no'uen quiyim na'gaxala' ca chita'gue icoñiguit da na'qaatec, 'neeto' ỹovira'a quiyim nemaqajan, ca' qanaqajñi queso se no'uen, ca 'nejem da ỹovirau'a nouaxanaxaset na'le so na'ỹaapec. 7Qai'neeta quiyim no'uen da na'qaataxac 'maxaraic quená'maq saqa' icoñiguit da na'qaatec, qaiyi ỹaatqajam 'ue nqai 'negue nqohin, qaiyi se ilamqa'ñigui aca loqoinaxanaxaqui so na'ỹaapec.
Da 'neeta ca no'ueenataxac ca lotaua ca na'gaxala'
8Qai'neeta na lotauaripi ca na'gaxala' ỹouen quiyim no'uen da na'qaataxac, chaqai se rayinaxan quecá'maq ỹa'xat, chaqai se ne'taaxai, chaqai sqai queetalec quiyim imitete'e aca lauegue. 9Chaqai ỹaatqajam quejlec dá'maq qaỹachaxanem lliqueta dá'maq qomi' seuaqlec, chaqai qaica canchaqaica quedá'maq 'neetari'. 10Chaqai 'au qai'guen, no'm qaica ca na'qaataxac se no'uen, ca qaigueme ishit lotaua nqohin ca na'gaxala'. 11Chaqai aca 'aalo qai'neeta ỹaatqajam no'uen da na'qaataxac. Mesqai la'axaqa lo'o', chaqai sqa ỹaaquioxoi, chaqai ỹaqamqata quená'ogue na lo'ueenataxanaxac. 12Ca lotaua ca na'gaxala' ỹaatqajam 'oono'lli' aca loua nqai'en, chaqai ỹa'den idaanlec ca llaalquenaxanaxac chaqai ca lomashaxac. 13Ma' ca lotaua ca na'gaxala' quiyim lo'yaxanec ca lo'ueenataxanaxac, ca ỹovireta'a quiyim qaimaqachin, chaqai se netelalec quiyim ỹa'xatetac da lpi'ỹaxac chicqo'ot so Cristo Jesús.
Dá'maq se re'xogui leloxoỹaxac quecá'maq 'neeta cá'maq seuaxalec
14Sahotaque qaỹaloq seuana qami', qam selata qami' najo ỹerecse, 15qaiyi no'm sqaua' sovi', qam 'yiiñite' cá'maq no'uen no'ueenataxac queca 'óna quena llaalqaipi ñi qota'a, ná'maq qohinac mashic icoñiguit da la'qaatec ñi qota'a ñí'maq ỹaatqajam nca'leetauec, ma' na'maxare nolliitañi dá'maq ỹaatqajam llic leloxoỹaxac chaqai quepaqataxanteguelec. 16Ca' sqaica ỹoqolliguit dá'maq se re'xogui leloxoỹaxac dá'maq seuaxalec ỹaatqajam chalego lecaic:
Ñi qota'a na' nachaxan, qam ỹaatqajam chaqaida dá'maq re'qoochigui no'ueenataxac na qom;
dá'maq shi'gue ỹa'xat so Espíritu Santo quiyim só'maq ỹaatqajam no'uen ỹale,
chaqai qaiuanchigui quená'ogue na chicqashiguim qota'a lelaatqaipi.
Chaqai qaỹa'xatem ná'ogue na ỹoreta'oguit qomyipi,
chaqai 'ue na huelec quená'ogue na 'laua,
chaqai qaicoñi'chiguit queda piguim.
