1Vichiguiño' se ỹauanapega quiyim qareualtegueñi, ma' ñi qota'a quedá'maq chi lqouagaxa, ca ỹaanema qomi' dajo no'ueenataxanaxac. 2Ná'maq qaỹo'uet, qam qoỹoxotetañi, ca' se seconaxaguit, chaqai ná'maq ỹo'uet ca nayiloxo. Se sayinaxanqatac, chaqai se saỹoxosoxonqasapeguec naua la'qaatqa ñi qota'a. Ta'ta'a quiyim qaidaata dá'maq lliqueta dá'maq sa'xatqatac, ca' canchaqaica quená'ogue na qomyipi qara'deenta, ca' dajo ỹa'ajantac ñi qota'a. 3Qam no'm se re'oq nqohin dá'maq sa'xatqatac na'qaatec chicqaugui da nca'laxa, dajo 'neeta, qam taỹalec ná'maq qomyipi tai'a quiyim palac nqohin. 4Ma' so na'ỹaapec se neuanñi nqai'en da la'deenataxanaxac, ca' sqai huelec, qaiyi se iuana da lauaq dá'maq ỹaatqajam no'uen na'qaatec re'oq nqai'en da lauaq so Cristo, ma' chaqaiso só'maq lqui'i nca'leetauec ñi qota'a. 5Ca' quena' sa'xatqatac dajo na'qaatec, se ña'xatqateguelta' qomi'. Ta'ta'a quiyim sa'xatqatac so Jesucristo quiyim chaqaiso só'maq qara'gaxala'. Qam coqomi', ca shinqac qomi' relaataxahi, quedá'maq le'xorenataxanaxa so Jesús. 6Ma' ñi qota'a ñí'maq nela' aso lcoỹeraxanaxaqui quiyim naviguec na'le queso napalaxa, chaqaiñi ñí'maq naviguec nqai'en aso lcoỹeraxanaxaqui cañi qare'taxanata, qaiyi seuanaxa da lauaq ñi qota'a quena' naviguec quena lashic so Jesucristo.
Da qoyicyaxac quena' qolqatalec da qarpi'ỹaxac
7Qam dá'maq paguec lesega'a hueetagui na qaroshicmaxa, ná'maq 'ec aca chaqai 'ueena 'laua, qaiyi re'oq dá'maq chalego lecaic nquesaxanaxa chicqo'ot ñi qota'a, mesqai chaqai chicqauguilo qomi'. 8Ca 'eno'm 'xoic hueete'ogalo ná'maq sqalanqatac, se ỹauana quiyim se qaỹa'ue ca la'maqa'. Chaqai 'eno'm 'ue na qarachitachic, qam qaiyiita se neme da qanaquitaxac. 9Ca 'eno'm chaqai qaỹocanta'pe qomi', qam se qaỹalate' qomi'. Chaqai 'eno'm qanenaqaiñi qomi', qam se qareleu. 10Canchaqa saxague, qam se'xatqatac quena qaroshicmaxa da lelauaxa so Jesús, qaiyi re'oq qai'neeta coqomi' da nachaalataxac so'maxare. 11Ma' qomi' quiyim ñaq qarca'leetauec, qam naua'que naua na'xata' qariỹaategueñi da lichic quiyim 'ue ca qaralauat sauaxat so Jesús, qaiyi re'oq qai'neeta da nachaalataxac so Jesús quena qaroshicmaxa, ma' na'maxare 'ue ca lqodoc. 12Ca, ma' da nelauaxa ỹo'ueetetac dá'maq chi lo'ueenataxanaxac coqomi', qam da nca'laxa ỹo'ueetetac da chi lo'ueenataxanaxac caqamiri.
13Naua naneresañi na'qaatqa 'nerac: “Seuelec, ca vichiguiño' setaqa.” Ca qomi', ma' chaqaida dá'maq 'neeta da qarpi'ỹaxac, seuaqlec qomi', ca' vichiguiño' sa'xataq. 14Ma' qomi' sa'deenaq ñi qota'a ñí'maq liỹa nca'laxatec na'le so qara'gaxala' Jesús queso lelauaxa, qai'neeta nca'laxaterec qomi' ma'le, 'nejem dá'maq 'ne'tegue na'le so Jesús. Ca' qariỹareta'pe qamiri ma' qarauega'a yí'maq neeta'ñi' ñi'maxare. 15Dá'ogue dajo mashic re'oq, ma' qaỹahotaque ca re'maxahi, qaiyi ma' 'xoic ca icoñiguit ca lqouagaxa ñi qota'a, ca qai'neeta 'xoic ca ỹaanshiguim ca na'aachic ma'le, ma' dajo taỹaugui quiyim qaimaqachin ñi qota'a.
16Vichiguiño' se ỹauanapega quiyim qareualtegueñi. Ma' 'eno'm na qaroshicmaxa noquiiqueta'ta' da lquesaxanaxa, qam na qara'al noquiiquetashiguim naua'que naua na'xata'. 17Ma' dá'maq qare'xoric queda qanachaalataxac cocho'qui' chaqai sqaỹaloq ime'uegue. Ca' chaqaida dá'maq chicqochigui quiyim noviraqtoxoua' da lauaq sqaica ca lqodoc chaqai ỹapacauec, sqai 'nejem na qane'guenaxaquipi. 18Ma' qomi' se ya'ỹoxogui ná'maq re'qoochigui; ta'ta'a ná'maq se re'xogui. Ma' ná'maq re'qoochigui, chita'gue, ca' imeho; qam ná'maq se re'xogui, ca' qaica ca lqodoc.
