Da lo'ueenataxanaxac so Josías na' nashi quiyi Judá
1So Josías co'na' ỹovite' ocho ñaxari, ca' qoỹano quiyim nashi. Chaqai ỹovite' treinta y un ñaxari quiyim nashi quiyi Jerusalén. Ca' aso late'e leenaxat Jedida, so'maxare llaale so Adaía na'ñi yi Boscat. 2Naua lo'ueenataxanaxaco ỹaatqajam ỹa'maxarente' ñi qara'gaxala', ma' queetalec dá'maq lo'ueenataxanaxac so David chaqai so 'auaxaic leta'allipi, ỹaatqajam sqa ỹoxouec.
Qaiuanejlec aso lere hueetalec so laqataxaquipi so Moisés
3Ca co'na' ỹovi' dieciocho ñaxari quiyim nashi so Josías, ca' so nashi ilara'a ñi lauo' ñi qara'gaxala' so neraxanaq leenaxat Safán só'maq llaalec so Azalía chaqai laual so Mesulam. 'Naaco':
4—Mo'e', quirepegue' ca Hilcías cá'maq lashi na netaxaỹaxanqajanqaipi. Ca' 'ñirapega quiyim lapoonta' aca nam qanodou'a ñi lo'ueenaxanaxaqui ñi qara'gaxala', aná'maq ỹacoñiguit na lasom lo'ollipi chicqaugui na qomyipi. 5Ca' ỹaanem ná'maq qaipataxalec da lo'ueenataxanaxac quiyim idaanlec ñi lauo' ñi qara'gaxala', qaiyi ishiueten ná'maq ro'ueenataxantac quiyim ỹa'maxajñi ñi lauo' ñi qara'gaxala': 6ná'maq qo'paq lo'ollipi, chaqai ná'maq rapaxaguinataxanta'pegue na no'ueenatqaipi, chaqai 'imec lo'ollipi, chaqai qai'neeta qarishiujnaxanaque na qo'paq chaqai na qa', qaiyi qanaparen añi no'ueenaxanaxaqui. 7Chaqai qai'neeta 'ñirapega quiyim se naloqochin aná'maq nam qoỹaanema, ma' ỹaatqajam qamaxaraqa.
8Ca' so Hilcías só'maq lashi na netaxaỹaxanqajanqaipi ra'qaataxana so Safán, só'maq neraxanaq, quiyim iuanejlec aso lere lomalate' naua naqataxaco quiñi lauo' ñi qara'gaxala'. Ca' ỹaanem aso lere, ca' so Safán retaqalec. 9Ca co'na' ime, ca' so Safán eec quepegue' so nashi, ca ỹa'xatem dajo, 'naaco':
—Qami' qarashi, na relaataxai'ipi shi'gue cata' nqai'en so lecat plata hueetaugui ñi no'ueenaxanaxaqui, ca' ỹaanouguilo sauá'maq qaipataxalgoto quiyim qaỹa'maxajñi ñi no'ueenaxanaxaqui quiñi qara'gaxala'.
10Ca' so Safán qai'neeta 'naac queso nashi quiyim so netaxaỹaxanqajnec Hilcías shi'gue ỹaanem aso lere, ca' retaqalec so Safán, 'qaatac nqai'en so nashi. 11Ca' so nashi na' 'xaỹalo saua naqataxaco hueesalec aso lere, ca nasectaqta'ahi saua loho queda nqui'ic. 12Ca chaqa'ma' ỹilen so Hilcías, chaqai so Ahicam só'maq llaalec so Safán, chaqai so Acbor só'maq llaalec so Micaías, chaqai so Safán só'maq neraxanaq, chaqai so Asaías só'maq lotaua so nashi, 'naaco':
13—Mohi, nachii ma'le ñi qara'gaxala', nataxañilec aỹim quecá'maq shinta chaqai quená'ogue na qomyipi quena Judá quená'maq hueetalec najo lere qaiuanejlec; ma' ñi qara'gaxala' 'eco' ro'ỹalo qomi', ma' so 'auaxaic qareta'allipi se na'xaỹaxana ná'maq hueetalec anajo lere, chaqai se ỹo'uet ná'ogue ná'maq qoỹeretalec anajo lere.
14Ca' so Hilcías, Ahicam, Acbor, Safán chaqai so Asaías querepegue' aso 'aalo qota'olec letaxaỹaxaqui Hulda, loua so Salum, llaalec so Ticva chaqai laual so Harhas, neloxoỹaq queso nooỹac lomala' queso no'ueenaxanaxaqui. So Hulda na'ñi yi liỹa 'imqaipi quiyi Jerusalén. Ca na' qaitaxaỹaxanac, 15ca' aso'maxare 'naaco':
—Dajo dá'maq 'naac ñi qara'gaxala' qota'olec quena Israel: 'Ñiỹapega ca ỹale cá'maq relarii quiyim yinachii, 16ca' ỹim na'gaxala' shinac: Ỹim selata ma'le da chalego lichic najo 'laua chaqai quená'ogue ná'maq neetalec, quiyim sepacqajanchigui ma'le sá'ogue so ỹa'qaatqaipi hueetalec asojo lere, só'maq retaqateguelec ñi nashi na'ñi yi Judá. 17Ma' na'maxare yalat na'le, ca ỹavigaxatetac na lichiinaxanaxat quiyim ỹaantacot na nashiilec nqolaquipi, ca' ỹaatqajam yo'ooqochit quená'ogue ná'maq ỹo'ueetetac. Ca vichiguiño' 'eco' ỹachipina'a da ỹonogoxonaxac quenajo 'laua, ca da'maxare qaica ca nemanñi nqai'en. 18'Ñiỹapega ma'le ñi nashi quiyi Judá, ñí'maq nelate' qamiri quiyim nachii ñi qara'gaxala', quiyim ñi qara'gaxala' ñí'maq qota'olec quena Israel qai'neeta 'naac: Ma' qami' na'xaỹaxañita, 19chaqai ma' 'ue da rachitachiqui', ca nañaañitot aỹim na' 'qa'italo naua ỹa'qaatqa quedá'maq silliitalec na 'laua chaqai quená'ogue ná'maq neetalec, taỹa'a quiyim qanopoxoỹaxajñi chaqai quiyim qaỹa'ue da nouaxanaxaset, chaqai quiyim nasectaxachira'ahi naua qatoohi', chaqai seuanchigui qami' quiyim noỹiñi', vichiguiño' ỹim qai'neeta ña'xaỹaxana qami'. Ỹim na'gaxala' shinac dajo. 20Ca vichiguiño' saanem qami' quiyim no'uen ca lqodoc aca rqauaxagui'i', ma' ỹovita ca rqodoqui' chaqai llapooñiguit ma'le qami' so 'auaxaic qata'alli'ipi. Ca' sqai huañita ma'le ca iqa'viic ma' novita najo 'laua.
Ca' saua lelaatqa so nashi pile' na' 'ue da qohinapegalo.
