1Na' ỹovirerec saua ocho ñaxari, ocho shiriguiri, chaqai nueve na'xata' quiyim nashi so Sedequías, ca' so nashi Nabucodonosor liỹa sá'ogue so nalliripi quiyim quepegue' nalauate'e' yi Jerusalén. Ca' nahiquinchiguiñi, ca renojñi quiyi naloote'oga, ca quenaua lahil ỹo'ueete' naua lliquishiguim quiyim nalauate'e'. 2Ca qanahiquintañi yi Jerusalén, chi ỹovireta'a quiyim diez ñaxari nashi so Sedequías, qam ñaqai queeta qanahiquintañi. 3Ca na' ỹovirerec saua tres shiriguiri chaqai ocho na'xata' queso liỹa ñaaxa, ca' ỹaatqajam 'xoic na nqopaaxa quiyi na'a'. Na qomyipi mashic qaica ca ỹa'ic. 4Ca co'na'le, ca' qaỹo'uet so lauac so lapooque' yi na'a', 'eno'm so caldeoipi nahiquinchiguiñi. Ca' so nashi chaqai sá'ogue so nalliripi 'eet, ca'e yi na'a' queso pe, queete'uegue so lasom ñiichiguiñiguilo saua dos lquepaqataxanqate', queso nayic quiichiguiñiguilo yaua nashi lanaxanqate', queso nayic taỹa'oga yi ca'megue quiyi lachiugue Jordán. 5Qam so alliripi caldeoipi ỹocan so nashi Sedequías, ca ỹoviralec queso ca'megue quiyi Jericó. Sá'ogue so nalliripi ỹalatañi so'maxare, ca' neuagaxatac. 6Ca' so caldeoipi iconlec, ca' ỹauega so nashi quiyi Babilonia neeta'ño' yi Ribla leseeque'ta yi Hamat. Co'na'le, ca so Nabucodonosor ỹa'ue da nouaxanaxaset so Sedequías. 7Ca' ỹaatqajam iuanchigui nqohin na' qaichaxauec so lqahic so llaalqaipi. Ca' so Sedequías qarelaataxanlec quiyim qanaqate' saua nqote', ca qaicoñi', ca qaỹaueguegue da Babilonia.
Qanopoxoỹaxajñi so no'ueenaxanaxaqui quiyi Jerusalén
8Ca na' ỹovirerec saua dieciocho ñaxari, cuatro shiriguiri, chaqai seis na'xata' quiyim nashi quiyi Babilonia so Nabucodonosor, ca' so lotaua Nabuzaradán, lashi so nalliripi, ỹovira'a yi Jerusalén. 9Ca' copata'a aso no'ueenaxanaxaqui, chaqai so lauo' so nashi, chaqai sá'ogue so 'imqaipi quiyi na'a', ỹaỹajanta ná'maq lauo' na choxoraiquipi ỹalliripi. 10Ca' so alliripi caldeoipi liỹaatac, ỹamaxañi so nquepaqataxanaxat quiyi Jerusalén. 11Ime, ca' so Nabuzaradán ỹauec so qomyipi queda Babilonia, quená'maq no'ueenaxaic quiyi na'a' chaqai só'maq huaxau'a na'le so nashi quiyi Babilonia, chaqai so liỹaripi ỹoreta'oguit na ỹa'den. 12Ca' 'ue na no'ueenaqtañi quená'maq paguec 'xoraic, qaiyi nasauquetac na 'uva loma' chaqai naua no'ueenaxari.
13Ca' so caldeoipi ỹopoxoỹaxachigui na nouenec bronce hueetaugui añi no'ueenaxanaxaqui: naua nojnaxal, chaqai ná'maq na'deetalgoto saua'maxare, chaqai aso huaxaỹaq lahi' late'ogue'. Ca sá'ogue qaỹodo'gue da Babilonia. 14Qai'neeta qai'xat so lo lahiripi, chaqai na ne'maxasoxonaxat quena lo, chaqai na ncoỹeraxanaxaqui lo'o, chaqai na reconec lodegaxat, chaqai ná'ogue ná'maq liỹa nouenqaipi bronce quiñi no'ueenaxanaxaqui. 15Chaqai so lashi so nouaataxanyipi i'xat sá'ogue so poqo lahi' chaqai aso 'taxaqui late'ogue' chicqaugui na 'oro chaqai na lecat plata. 16Ca' saua dos nojnaxal chaqai aso huaxaỹaq lahi' late'ogue' relaataxanlec na'le so nashi Salomón quiñi no'ueenaxanaxaqui, da lesallaxa se qanaloqochin. 17Cañi 'óna nojnaxa paguec ocho metros da ladogaxa, chaqai qaỹa'ue na bronce quena lo'lo paguec dos metros da ladogaxa, lepajlec nqohin na bronce qaỹa'ue na no'ueetaxat 'ec ana granada. Ca' saua dos nojnaxal nishiiquiaxaua'.
Qai'xat so na'ñi yi Judá
18So nouaataxanaq lashi iconlec qai'neeta so Seraías só'maq la'gaxala' na netaxaỹaxanqajanqaipi chaqai so Sofonías netaxaỹaxanqajnec só'maq queetalec da lo'ueenataxanaxac, chaqai saua tres neloxoỹa' quiñi lasom so no'ueenaxanaxaqui. 19Ca' queso qomyipi quiyi na'a', ca' qaiconlec so lashi so alliripi, chaqai saua cinco ỹale' lotaua' so nashi nera'ñi yi na'a', chaqai só'maq ỹapaxaguintac so alliripi, chaqai so sesenta quená'maq ỹaatqajam choxoraic quiyi na'a'. 20-21Ca' so Nabuzaradán ỹauega sá'ogue so nashi quiyi Babilonia neeta'ño' yi Ribla leseeque'ta yi Hamat. Ca' quiyi, ca' so nashi quiyi Babilonia relaataxanlec quiyim qanalauajñi.
Ca chaqaida 'neeta na' qaỹauec so qomyipi na'ñi yi Judá.
So no'ueenañi 'eet taigue da Egipto
22Ca' so Nabucodonosor, só'maq nashi quiyi Babilonia, ỹano quiyim na'gaxala' so Gedalías, llaalec so Ahicam chaqai laual so Safán, quiyim reloxoỹa'a so qomyipi quesó'maq no'ueenaqtañi quiyi Judá. 23Co'na' so nashillipi quiyi Judá chaqai so nalliripi 'ue da la'xaỹaxac quedajo, ca' eec, taigue da Mizpa quiyim retaxaỹa'pegue' so Gedalías. Saua'maxare chaqaisaua saua Ismael, llaalec so Netanías; Johanán, llaalec so Carea; Seraías, llaalec so Tanhumet, na'ñi yi Netofa; chaqai so Jaazanías, llaalec so ỹale na'ñi yi Maaca. Ca saua'maxare que', liỹaresac so nalliripi. 24Ca' so Gedalías ỹaatqajam ỹaanot da la'qaatec so'maxare chaqai so nalliripi, ca' 'naapega quiyim se no'cha'a so nashillipi caldeoipi, ca' no'ueenañi quiyi 'laua quiyim ro'ueenataxanot so nashi quiyi Babilonia, ca' qaicanqaida ma'le.
25Qam na' ỹoxe'ueque saua seis shiriguiri, ca' so Ismael, llaalec so Netanías, laual so Elisama chicqaugui so nashi llaalqaipi quiyi Judá, ỹoviro, liỹaatac so diez qomyipi. Ca sá'ogue imaalec ỹalauat so Gedalías chaqai so judioipi chaqai so caldeoipi liỹaataco' na'le so'maxare quiyi Mizpa. 26Ca co'na'le, ca sá'ogue so qomyipi no'cha'a so caldeoipi, ca' eec, taigue da Egipto, ná'ogue na qo'xoic, noctoqui', chaqai vire'ta na nouaataxanaq lashillipi 'eet.
So Joaquín qoỹaxantauec quiyi Babilonia, ca' qaimaqachin
27Ca na' ỹovirerec saua treinta y seis ñaxari, once shiriguiri, chaqai veintiseis na'xata' quiyim so nashi Joaquín ca'e nqohin yi Judá, viichigui na' nashi quiyi Babilonia so Evil-merodac. Ca so'maxare viichigui lauel quiyim i'xoren so Joaquín, ca naqatec cañi ncoñiitaxanaxaqui. 28Ca ỹa'maxata'tegue chaqai paguec nqai'en da lichoxoric queso liỹa nashillipi ncoñiitaxauaripi neeta'ñi yi Babilonia. 29Ca' quedo' na'le, ca' so Joaquín ishit naqate' saua loho ncoñiitaxaqui', ca ishit lqui'ỹaxaua so nashi quiyim ñaq nca'leetauec. 30Chaqai quiyim ñaq nca'leetauec, ca' so Joaquín naua'que naua na'xata' qoỹaante'em ana louenec laseuete chicqo'ot so nashi quiyi Babilonia.
