2 Reyes 6

₁Ca 'uo' so na'xa'a so letaxaỹaxaquiripi ñi qota'olec 'naaco' queso Eliseo:

—'Ajñi', ná'maq qouo' senqataugui ỹaatqajam cocho'qui' coqomi'. ₂'Maxariñite' quiyim qolaxapegue' aso lachiugue Jordán quiyim souaxanaq ana qo'paq loỹo, ca' sa'daxañi, ca so'ueetaq ca qouo' quiyi'maxare.

—Mohi, quii —'naaco' so Eliseo.

₃Ca 'uo' so 'naac quesaua'maxare:

—Qouaquiroxoric, qami' qariỹaatac.

—Hua', cha'regue chaqaida qamiri iỹareta'pe —'naaco' so Eliseo.

₄Ca' so Eliseo liỹareta'pe saua'maxare, chi ỹoviretaxaso'ma aso lachiugue Jordán. Ca co'na'le, ca' qaỹouaxan ana qo'paq. ₅Qam 'uo' so 'óna co'na' ỹouaxanteguelec aso qo'paq, ca' naco' aso nqai'pe, ca taañigui ca huaxaỹaq. Ca' ỹaualqo':

—¡'Agai, qami' qanapaxaguinatqo'! ¡Ỹa'uale aso qai'pe!

₆Ca' so Eliseo renataxano', 'naaco':

—¿Nega'ỹo' cá'maq taachi'ñi aca'maxare?

Ca' so 'óna quesaua'maxare ỹachaxan cá'maq taachi'ñi aso'maxare. Ca' so Eliseo ỹouaxanlec so qo'paq, ca' inaxa'ñi yi'maxare, ca' aso qai'pe naỹoxonshiguim.

₇—'Ayi, coñita —'naaco' so Eliseo.

Ca so'maxare iconaxaso'ma aso qai'pe.

₈Ca' so nashi quiyi Siria nalauateta'pegue' so nashi quiyi Israel. Ca co'na' ỹomat quiyim retaqata'pegue' so lashillipi so nalliripi, ca 'uo' ca ỹicapi'ñi quiyim nco'matqa'. ₉Ca co'na'le, ca' so Eliseo ila'o' so la'qaatec queso nashi quiyi Israel quiyim sqai quepegue' yijo 'laua, ma' so Siria laseripi quepegue' yi'maxare. ₁₀Ca' so nashi quiyi Israel ilategue so nalliripi dá'maq ỹica'pegue so qota'olec letaxaỹaxaqui ma' qaỹoden, ca chaqaida 'neetari', ca 'xoico' quen quiyim nañit so nalliripi.

₁₁Ca' quedajo, ca' so nashi quiyi Siria tot ỹa'den ca 'neeta. Ca roỹaxanalo' saua lashil so nalliripi, ca 'naaco':

—¡Ñigo' ñaqai 'qaataxañim peeta'a 'ue ca caqamiri ca qoshiita'guit ñi nashi quiyi Israel!

₁₂Ca 'uo' so 'óna queso nashillipi 'naaco':

—Qaica, qami' qarashi. Qam ñi qota'olec letaxaỹaxaqui, leenaxat Eliseo, neeta'ñi yi Israel, ñiga'ỹo' ñí'maq ỹa'xatem ñi lashi ná'ogue ná'maq 'xachi', vire'ta quena' vi'saugui ñi relaxasoxogui'i'.

₁₃Ca co'na'le, ca' so nashi quiyi Siria relaataxan, 'naaco':

—Nataxañiỹaque negue' cá'maq neeta'gue ca'maxare, qaiyi ma'le, ca' 'ue ca sela' ñalliripi quiyim iconlec.

Co'na'le, ca' qohinaco' neeta'ñi yi Dotán. ₁₄Ca 'uo' so ila' queso nalliripi neetashiguim quena shipgaq, chaqai nahoglenaipi lauataxaqui, chaqai 'xoic so co'ỹaaxaiquipi. Pe co'na' ỹovita yi Dotán, ca nahiquinchiguiñi yi na'a'. ₁₅Ca na' richiguiñi queso nete'etam, ca na' ne'laxashiguim so lelaatec so Eliseo. Ca co'na' nenoxonec, ca iuane'to' so nouaataxanaq nalauataxairipi nahiquinchiguiñi yi na'a'. 'Ue na neetashiguim chaqai ana nahoglena lauataxaqui. Co'na'le, ca eec, ỹa'ue la'xaỹaxac so Eliseo.

—Qam nagui, qami' napaxaguinataxanaq, ¿negue' cá'maq shinqato'?

₁₆Ca' so Eliseo 'naaco':

—Qaica ro'chi'raque, ma' paguec 'xoic ná'maq reloqota'alo qomi' quená'maq qomyipi.

₁₇Ca' so Eliseo nqouagaxainot ñi qara'gaxala' quiyim ỹauachiguilo naua nqote', qaiyi reuanaxan. Ca' ñi qara'gaxala' naviguerec nqai'en naua nqote' so lelaatec. Ca so'maxare iuana quiyim aso quemaralec qa' ladocai no'qajlec quena shipiguiripi qoyintalec chaqai ana nahoglena ỹaviquetaugui nahiquinchiguiñi yi hueeta'ñi so Eliseo.

₁₈Ca co'na' so Siria laseripi co'na' sham queu'a nalauate'e' yi na'a', ca' so Eliseo nqouagaxainot ñi qara'gaxala', 'naaco':

—Sashiila'e' quiyim se neuanñi nqai'ñi' najo qomyipi.

Ca' ñi qara'gaxala' se neuanñi nqai'en so qomyipi dá'maq ỹahotaque so Eliseo. ₁₉Ca co'na'le, ca' so Eliseo 'naaco' queso qomyipi:

—Najo mesqaina ná'maq nayic, chaqai mesqaina najo ná'maq na'a' michitaque. Oquiigue aỹim, ca' ỹim saviguiiỹa ma'le cá'maq ỹale michitaque.

Ca' ỹauega yi Samaria. ₂₀Ca co'na' ỹoviro quiyi'maxare, ca' so Eliseo nqouagaxain, 'naaco': Nagui, qami' ỹa'gaxala', naviguerec nqai'ñi' naua nqote', ca co'na' liỹa reuanaxan so qomyipi.

Ca' ỹa'den quiyim hueetaugui yi Samaria. ₂₁Ca co'na' so nashi quiyi Israel iuana so qomyipi, ca' inato' so Eliseo, 'naaco':

—Qami' ita'a, ¿salauat najo qomyipi?

₂₂Qam so Eliseo 'naaco' queso'maxare:

—'E', sqai lauachi'. ¿Loqo'm chaqai'en lauachi' quena' 'ue ñi qadoxonqui', do'isa'a ca lecat loqo'm ca roviqui'? Qui'ỹaxañi' chaqai ne'taxañi' ma'le najo qomyipi. Ime, ca pilaxachita ca lashi na'maxare.

₂₃Ca co'na'le, ca' qaỹo'uet so lqui'ỹaxac lodegaxat chaqai qane'taxan so qomyipi. Ime, ca' so nashi, ca niquine'e', ca' ỹopilaxat so qomyipi. Ca' so qomyipi pila so lashi. Ca queco'na'le, ca' so Siria laseripi ỹaxanñi quiyim queetapegueu'a quiyi na'laua so llaalqaipi so Israel.