Ma' liỹa rapil so qara'gaxala'
1Qamiri ñauochaxaua' ỹaqaỹa', najo aná'maq co'uaataxanaxai ỹerecse selatalo qamiri; quenaua dos ilaata sahotaque quiyim ỹaatqajam 'yiiñitapegalo nauajo ỹaqataxaco. 2Se couahi'e dá'maq la'qaategue' quesom sauá'maq letaxaỹaxanqajanqa ñi qota'a, chaqai da laqataxac so qara'gaxala' chaqai qarca'laxaqui Jesús dá'maq ỹapaxaguinque qamiri sauá'maq lelaatqa so'maxare.
3Qam qamiri se couahitaque ma'le dajo: ma' quecaua co'uaataxanaxaqa na'xata', ca' 'ue ma'le ca qomyipi i'neetac ma'le dá'maq coñiguit na'qaatec, ma' queeta'pegue' dá'maq se no'uen 'ueenataxac. 4Ca inate' qamiri ma'le: “¿Negue' cá'maq 'neeto' cá'maq qaỹachaxantac caqamiri quiyim liỹa novi' ca Cristo? Ma' shi'gue na' ileu so 'auaxaic qareta'allipi, ná'ogue chaqaidaata dá'maq 'neetari' shi'gue na' ñaqai chita'gue qaỹo'uet na 'laua.” 5Ma' na'maxare se ỹa'maxaren quiyim hueetapigui lauel quiyim na piguim shi'co' 'ue nallaaqo', chaqai quiyim queda lelaataxanaxac ñi qota'a ñaxatec na 'laua quena huaxaỹaq, chicqochigui nqohin na huaxaỹaq. 6Chaqai qai'neeta chicqochigui nqohin na huaxaỹaq queca nqodoc na' i'paxanlec nqai'en na 'laua, ca ná'ogue ná'maq hueetalec ana'maxare nimiichiguiñi nqai'en. 7Qam ná'maq piguim chaqai na 'laua ñaqa 'vii nagui, naua'maxare tai'alo nqohine' ca norec, qam qaiyiita chicqochigui da la'qaatec ñi qota'a. Cajo norec ỹavigaxate' ma'le naua'maxare, ma' ỹovita ca na'xa'a quiyim qaimit ná'ogue najo, ma' qaỹomat ná'ogue na hualoxonyipi.
8Qam qamiri ỹaqaỹa', 'neeto' lotqai couahitaque quiyim quiñi qara'gaxala' 'ec 'oonoqui' na'xa'a caua mil ñaxari, chaqai caua mil ñaxari 'ec 'oonoqui' na'xa'a. 9Mesqaida quiyim ñi qara'gaxala' sqaua' ipacqajñigui cá'maq ỹachaxantac, ma' 'ue ná'maq 'naac dajo. Ta'ta'a quiyim 'ue da leualaxavic nauaantapegalo qomi', ma' se nqo'ta quiyim 'ue ca na'laañi. Ta'ta'a quiyim ná'ogue netogochigui na lauel.
10Qam ca loviraxaqui ma'le so qara'gaxala' ỹovita ma' sqaica ca qaỹahotaque, 'nejem ca cuataxai queetagui yi pe. Ca' ỹaatqajam qaica 'nejem ma'le ca lelamaxa na piguim ma' sogui, chaqai ná'maq hueeto'ot na piguim ỹavic ma'le queca norec, chaqai na 'laua qai'neeta ỹavic chaqai ná'ogue ná'maq hueetalec ana'maxare.
11Ca' nagui mashic sa'deenaq quiyim ná'ogue sogui nqohin ma'le, ca ¡paguec quet ca reuogoxohi quiyim ỹaatqajam nañaañiỹot ñi qota'a, 'maxaraic nqai'ñii da nachaalataxaguii! 12Ca nauaañita'guit ca na'xa'a loviraxaqui ñi qota'a quiyim imit ná'ogue najo, 'ec sqoỹoxoguit nqai'ñii. Cajo na'xa'a sogui nqohin ma'le na piguim, qaỹahote'e ca norec, chaqai na hueeto'ot na piguim quiguiñi ma'le nqai'en ca norec lauaq. 13Qam qomi' ñauaanqata'guit ca piguim dalaxaic chaqai ca 'laua dalaxaic ỹachaxantac na'le ñi qota'a, cá'maq hua'ñi ma'le quiyim ná'ogue na qomyipi 'maxaraic da no'ueenataxac chaqai huagaxaraic.
14Vichiguiño' qamiri ñauochaxaua' ỹaqaỹa', quiyim ñaq nauaañita'guita cauajo, ca' ỹaatqajam reuogoxohi, qaiyi ma' novi' ñi qota'a, ca natenejlgoto qamiri quiyim 'ue da reuagaxahi, co'teete' naua re'taxanatahi, chaqai qaica ca rasauaxashichii. 15Ca' 'yiiñitapega da leualaxavic ñi qara'gaxala' coqomi'. Da'maxare tai'a da qarca'laxa. Chaqaida 'neeta dá'maq ỹiriñi na'le caqamiri so qanauochaxaua qarqaỹa Pablo na' ỹiriñi da la'deenec chicqo'ot ñi qota'a. 16Quesaua'que saua lerecse ỹa'xatetapeguema qamiri dajo. Qam 'ue na hua'ñi 'xoic da lqalaic quiyim qaỹa'den ca leloxoỹaxac. Ca' vichiguiño' ná'maq qaica ca ỹa'den chaqai na se ra'ñi da lpi'ỹaxac, ca' ỹoqa'a nqai'en ca leloxoỹaxac. Ca' chaqaida 'ne'tegue ná'maq liỹa naneretañi la'qaatqaipi ñi qota'a, qam quiyim 'ne'tegue dajo, ca' chi nqa'viinteguelta'.
17Vichiguiño' qamiri ỹaqaỹa', nagui mashic shi'gue ỹaatqajam 'yiiñita dajo, ca 'maxaraic quiyim richilliỹalta', qaiyi sqai quiita'pegue' da layinaxanaxac na qomyipi hualoxonyipi, qaiyi sqai 'xañiñi dá'maq mashic viilec. 18Qam reuogoxohi quiyim ỹaatqajam paguec huañiỹa so qara'gaxala' chaqai qarca'laxaqui Jesucristo, chaqai nañaqchitaugui da le'xorenataxanaxa. ¡Ca' qaica lqodoc quiyim qaimaqachintac so'maxare! Ajá'a, ca' chaqaida 'neeta dajo.
