So David chaqai aso Betsabé
1Co'quena' nosaxa, ca' na nashillipi eec quiyim nalauat. Ca 'uo' so na'xa'a, ca' so David ila' so Joab chaqai so lotauaripi nashillipi chaqai so nalliripi quena llaalqaipi so Israel nalauajñi so llaalqaipi so Amón, chaqai nahiquinchiguiñi yi na'a' Rabá. Qam so David no'ueenañi quiyi Jerusalén.
2Ca 'uo' so avit co'na' ne'laxashiguim so David chicqojlec so lomala', ca taashi'megue na lelaq so 'imec lodegaxat. Ca' chi ỹouootegueri', ca idaanto'o' aso 'aalo ỹaatqajam lo'yaxana nachiltac. 3Ca' so David relaataxan quiyim qarenataxanegue negue' aso 'aalo. Ca co'na'le, ca' qara'qaataxana quiyim aso'maxare leenaxat Betsabé, llaale so Eliam. Qam aso'maxare loua so Urías, hitita le'ec. 4Co'na'le, ca' so David ỹa'vii saua lelaatqa quiyim qaỹauega'a aso'maxare. Co'na'le, ca lapa'ñi'. Ca co'na' ime, ca pile'oga ca la'a'. Ca' aso 'aalo nachiltaco', ma' chita'co' imeuec queso la'aaxa.
5Ca' aso 'aalo chaqa'ma' 'man, ca ỹa'uo' la'xaỹaxac so David. 6Co'na'le, ca' so David ila' so Joab quiyim nauego so Urías, só'maq hitita le'ec. Ca' chaqaida 'ne'tegue so Joab. 7Ca co'na' ỹovira'a so David so Urías, ca' qainatetac quiyim negue' cá'maq 'neetari' so Joab chaqai so nalliripi, chaqai negue' cá'maq 'neeto' na'le so lauataq. 8Ime, ca' qohinapega pile'oga ca la'a', ca' quiỹo' naua lapiaate'.
Ca co'na' ime inoxonec so Urías queso 'imec lodegaxat, ca' so nashi ilarec so no'uen na'ic lachitaxanataxanaxat. 9Qam so Urías sqo pile'oga ca la'a'. Ta'ta'a quiyim lelaqsoqo' so lasom so 'imec lodegaxat, ỹalequetaugui so neloxoỹaripi queso nashi. 10Ca co'na' qaỹa'xatem so David quiyim so Urías sqai pile'oga ca la'a', ca' so David inato' so'maxare, 'naaco':
—¿Chi'neco' ma' sqo pillire'oga ca ra'aachi'? Ma' ỹaatqajam qoỹoqo'tegue da chicqoira'gue.
11Ca' so Urías 'naaco':
—Só'maq lahite' saua lelaataxanaxaco ñi qota'a, 'nejem na nalliripi nalauataxairipi quena Israel chaqai yi Judá, ri'iito'ot na chi na'daañi 'imec. Chaqai 'nejem ñi ỹashi Joab chaqai na nashillipi lotauaripi ñi ỹashi laqauec quen quena no'ueenaxa. Ca ỹim, ca' ¿shicpegue' quet ca ỹa'a', ca' sque'e chaqai ñi'et chaqai ỹapa'ñi' quet aca ỹoua? ¡'E', ma' ñallitalta' quená'ogue ná'maq hueeto'ot ñi qota'olec, qami' ỹashi, quiyim se so'uet dajo!
12Ca' so David 'naaco' queso'maxare:
—Cha'regue nagui ñaq ovire'ena, toco' nete'e, ca' qui'o'.
Ca' so Urías no'ueenañi. Ca ỹovira'guit so liỹa nete'e. 13Ca' so David ỹal quiyim lqui'ỹaxaua chaqai ne'taxaua so'maxare, ca' quiñiuguetqachit. Ca co'na' mashic pe, ca' so Urías, ca' eec, laq, quepegue' yi hueeta'ñi so neloxoỹaripi queso nashi. Qam sqai quepegue' ca la'a'.
14Ca co'na' nete'e, ca' so David ỹa'ue aso lerecse, taỹa'a nqai'en so Joab. Ca na' pilec so Urías, ca' ilategue. 15Ca' caso lelaata lerecse hueetalco' nqai'en da la'qaatec 'neetasa': Ma' taañi ca lauataq, ca' 'auaxañitauo' na Urías. Ime, ca' lachiỹañi, qaiyi ma' natenec, ca' ileu.
16Ca' chaqaida 'neeto' na'le co'na' so Joab nahiquinñi yi na'a' ma' ỹahotaque nalauate'e', ca 'auetauo' nqai'en so Urías, taatou'e yí'maq ỹaatqajam hueeta'ñi so 'ñaaxaiquipi. 17Chaxasa, co'na' só'maq qoyiga'a ro'ootaxanlec yi na'a' quiguit quiyim nalauate'e' so Joab, ca 'vio' saua ileue' quesaua nale' so David. Ca' quesaua'maxare, ca ỹalequetaho so Urías qai'neeta qaỹalauat.
18Ca' so Joab ỹa'ue la'xaỹaxac so David ỹaatqajam ỹa'xateta dá'maq 'neeto' na'le so lauataxac. 19Ca' ỹa'ue da laqataxac quesó'maq la'qaataxanqajnec, 'naaco':
—Ma' ime 'qaataxañita ca qarashi quedá'ogue dá'maq 'neeta ca lauataq, 20ca' sqoue quiyim ro'o ca qarashi, ca' renachi': ¿Chi'neco' ma' se rovichii na' quiu'a ca na'a'? Mashic 'ec sqa 'yiiñii quiyim nenaxasoxonec quen na qomyipi queda lahi na nquepaqataxanaxat. 21'Nejem na'le quiyi na'a' Tebes na' qaỹalauat so Abimelec só'maq llaalec so Jerobaal caso 'aalo na' qanenaxa'ña so qa' namoxoiqataxanaxat. ¿Chi'neco' ma' se rovichiỹo' na' viriỹot ca lquepaqataxanaxat ca na'a'? Ca 'ñiraco' ma'le: Ileu qai'neeta yi Urías, yí'maq hitita le'ec, yí'maq nalli'i'.
22Ca' so nelaatec eec. Ca co'na' ỹovi', ca' ỹa'xatem so David dá'ogue dá'maq qohinapego' na'le queso Joab. Ca' so David ro'ỹa so Joab, ca 'naaco' queso nelaatec:
—¿Chi'neco' ma' se rovichiỹo' na' quiu'a ca na'a'? Sqa 'yiiñiỹo' quiyim 'ue quen na nenaxasoxonec queda lahi na nquepaqataxanaxat. 'Nejem na'le quiyi Tebes na' qaỹalauat so Abimelec so llaalec so Jerobaal caso 'aalo na' qanenaxa'ña queso qa' nopoxoiqataxanaxat. ¿Chi'neco' ma' se rovichiỹo' na' viriỹot ca nquepaqataxanaxat?
23Ca' so na'qaataxanqajnec 'naaco':
—Ca só'maq alliripi quiguita quiyim nalauajto qomi' ỹaatqajam 'ue da lquesaxanaxa na' seuqatalec yi no'ueenaxa. Qam sqoshaxanqatau'a ñi lasom yi na'a'. 24Ca' na no'xoshic lo'ollipi nahinaxanec, hueetashi'megue so napoxonaxat. Ca' 'vii saua qaỹalauate' quesaua nallichi'. Ca ỹalequeto qaỹalauat yi Urías yí'maq hitita le'ec.
25Ca' so David 'naaco' queso nelaatec:
—'Ñirapego' ca Joab quiyim sqaica huapigui lauel quedajo, ma' chi no'ueenataxac na lauataq. Qam quiyim queu'a ca na'a', ca paguec na'ñaxat, ca' chi ỹovireta'a quiyim cá'ogue nomachichiguiñi. Ca' qami' 'ñaxachisalec.
26Ca co'na' aso loua so Urías 'ue da la'xaỹaxac quiyim ileu so loua, ca' ỹachicoqochit da lasouaxac. 27Qam na' ime'ueque saua na'xata' lachicoxoqui', ca so David relaataxane'oga quiyim qanauego, ca ỹana'ñi yi la'a', ca chaqa'ma' loua. Ca na'le, ca' co'oon, qam ñi qara'gaxala' se ỹa'maxaren dá'maq 'ne'tegue so David.
