So Husai se ipaguigui nqai'en da la'qaatec so Ahitofel
1Co'na' ime, ca' so Ahitofel 'naaco' queso Absalón:
—'Maxariñite' quiyim llapoonta' ca doce mil quiyim ñalliripi, ca' chaqaina na pe, ca' shic sedaanaque ca David. 2Ca ma' tot qaica ca la'ñaxac chaqai isot, ca' se'laxatejlec quiyim shiga'a. Ca' cá'ogue ca qomyipi liỹaatac, cá'maq 'eet ma'le, ma' no'chi. Ca' ỹim qaica ca liỹa salauat ma'le, qaicaata ca nashi David. 3Ime, ca so'uet quiyim cá'ogue ca qomyipi pilot qami', 'nejem aca 'aalo quena' chita'gue 'on, ca' pilliguit ca loua. Ma' dá'maq qami' vi'saque quiyim ileu so 'oonoqui' ỹale, ca ma'le, ca' ná'ogue na qomyipi 'ue ca leuagaxa.
4Ca co'na' 'xaỹa'pegue dajo so Absalón, ca' ỹaatqajam ỹa'maxarenta chaqai sá'ogue so lotauaripi quesó'maq llaalqaipi so Israel. 5Qam so Absalón qai'neeta relaataxane'oga so Husai, só'maq arquita le'ec, quiyim qai'neeta ỹo'uet ca la'qaatec. 6Ca co'na' so Husai ỹoviro, ca' so Absalón ra'qaataxano' quedá'maq na'deenaxac so Ahitofel. Ca 'naaco':
—¿'Nesam chaqaido' nqaishinaq, loqo'm 'e'? Ca' qami' ¿negue' ca 'ñirac nagui?
7Ca' so Husai 'naaco' queso'maxare:
—Nagui, ca 'eco' se ỹa'maxañi da na'deenaxac so Ahitofel. 8Ma' qami' 'yiiñite' quiyim so qataa'i' chaqai so nalliripi 'ñaaxaiquipi, ca' nagui peeta'a ỹaatqajam ro'ootari' 'ec aca layoraxai late'e hueuec quiyim qarouootaxana'gue ca llaalec. Chaqai qai'neeta so qataa'i' ỹaatqajam naỹa'gue da nalauataxac, ca' re'qoota quiyim se ỹalequetaugui ca liỹaripi quiyi pe. 9Ca' nagui peeta'a 'ue ca hueetaho'gue lauac loqo'm 'ue ca liỹa hueeta'gue nañoxotetañi. Ca noma' 'ue canchaqaica qara'xaỹaque, ca chaqa'ma' 'vii caua nallichi' noxonqa, chaqai sqoue quiyim 'ue ca la'deenataxanaxac quiyim noxonec na nallichi'ipi. 10Ca vire'to' ma' neualñi cá'maq paguec 'ñaaxaic 'neetari' ca sauaxaic leta'a quena nallichi'ipi, ỹaatqajam neualñi ma'le, ma' ná'ogue na Israel llaalqaipi ỹa'deenta quiyim so qataa'i' chaqai so nauegaxauaripi ỹaatqajam 'ñaaxaiquipi. 11Ca' nagui, ca' saqata qami' quiyim lapooñireta' quet ná'ogue ná'maq ñaqa 'ue llaalqaipi so Israel quiyi Dan queda rapiguim, chi ỹovireta'a ná'maq neetalec yi Beerseba queda 'guiñi, ma' ỹaatqajam 'xoic 'nejem na lo'uaxanaxa hueeto'ot na lahi aso huaaxai, chaqai quiyim chaqaiqami' ná'maq qaỹa'guelec ma'le queca lauataq. 12Ca ma'le, ca qolaxau'a so qataa'i' quecanchaqai neeta'ñi. Ca' ñahiquinqachiguiñi 'ec nqaishinaq ana 'ỹa' quena' taalec ana 'laua. Ca ma'le, ca' qaica ca qohit cá'ogue qanomachichiguiñi, ca'maxare chaqai ca nalliripi. 13Chaqai no'm 'ue ca nañoxotougui quenaua na'aate', ca ná'ogue na Israel llaalqaipi sahoqote'e qarañic, ca ñosaqtaxauec na lapoxonaxat cajo na'a', ca senaxasoxo'ñigui so ñaachi, ca' qaica ca ño'ueenaxatqañi qa'.
14Ca' so Absalón chaqai sá'ogue so llaalqaipi so Israel ỹa'maxarenta da la'qaatec so Husai, ma' sqai 'nejem da la'qaatec so Ahitofel. (Ma' ñi qara'gaxala' chaqai 'negue quiyim se ipacqajñigui da 'maxaraic na'deenaxac so Ahitofel, ma' ỹahotaque quiyim taalec nqai'en dá'ogue dajo so Absalón.)
So David 'ue da la'xaỹaxac, ca' qohit
15Ca co'na' ime dajo, ca' so Husai ra'qaataxanalo saua netaxaỹaxanqajanqa Sadoc chaqai so Abiatar queda na'deenaxac so Ahitofel queso Absalón chaqai queso qo'xoiquipi quiyi Israel, chaqai quedá'maq chi la'qaatec so'maxare ỹaano. 16Ma' ỹahotaque quiyim chaqa'ma' qaỹa'ue la'xaỹaxac so David quiyim sqai hueetalec so nalo'ojta' 'laua quiyi 'laua qaica qom, ta'ta'a quiyim taita'gue da liỹa laseego so lachiugue Jordán, qaiyi se qaỹalauat so'maxare chaqai so nalliripi.
17Ma' so Jonatán chaqai so Ahimaas hueesa'ñi yi En-rogel quiyim qaica ca no'chiisaque quecá'maq quiyim qaiuanalo quiyi na'a', ca 'uo' aso nelaata ỹa'ue la'xaỹaxague' saua'maxare. Ca saua'maxare chaqa'ma' que', ỹahote la'xaỹaxac so David. 18Qam qaiyiita 'uo' so ne'nec iuanchiguilo, ca' ỹa'ue la'xaỹaxac so Absalón. Ca' saua'maxare 'ue da liỹalqa' quiyim ỹovirera'a ca 'imec quiyi Bahurim, ca' saua'maxare taari'nquio' aso ni'ỹa na'ñi yi nasoxoc. 19Ca co'na' ime, ca asó'maq loua só'maq la'a' yi'maxare ỹa'ue so lapooque' aso ni'ỹa, ca' ỹocorelec queso trigo shi'gue nac lovi. Ca' dajo qaica ca ỹa'den. 20Ca co'na' ỹovirero saua lelaatqa so Absalón, inate' aso 'aalo:
—¿Negue' ca hueesa'gue ca Ahimaas chaqai ca Jonatán?
—Naquetetquenajo, ca' ỹalamaxateraxaso'ma aso lachiugue —'naaco' aso 'aalo.
Co'na'le, ca' saua lelaatqa so Absalón que' idaandaque, qam na' se ỹanajta, ca' pile' queda Jerusalén. 21Ca co'na' mashic ỹoteguelo, ca' so Ahimaas chaqai so Jonatán nenoxoñishiguim caso ni'ỹa. Ca' lotqai que', ne'guente', ỹahote la'xaỹaxac so nashi David. 'Nerapega quiyim chaqa'ma' na'maxajñi, ca' pacta aso lachiugue, ma' so Ahitofel talaxanco' quiyim qoyiga'a. 22Ca co'na'le, ca' so David chaqai so liỹaripi chaqa'ma' na'maxajñi, ca' pacta aso lachiugue Jordán. Ca na' chi richilecna, ca' sá'ogue mashic ỹovijta queda laseego.
23Ca co'na' so Ahitofel retan quiyim so na'deenaxac se ipaguigui nqohin, ca' ỹo'uejlec so lalo 'ashin, ca' quepegue' yí'maq na'a' chi ne'xaỹoqsoqo'. Ca co'na' ime na'maxate'e' só'maq chaqai llaalqaipi, ca' chi coñitot na lqosot, ca' chi nalauatalta'. Ca co'na' ileu, ca qaishinñi'ñigui aso lahi' so leta'a.
So David ỹovita yi Mahanaim
24Ca' so David ỹovito' yi na'a' Mahanaim, co'na' so Absalón ỹapacta aso lachiugue Jordán, liỹaatac sá'ogue so Israel llaalqaipi. 25Ca' so Absalón ỹano' so Amasa quiyim la'gaxala' so nalliripi, ỹana'ñi yi loma' so Joab. Ca' so Amasa leta'o' so chicqaugui na llaalqaipi so Ismael, leenaxat Itra. Ma' so'maxare ỹaatqajam ledeco' na'le aso late'e Abigail. Aso Abigail llaale so Nahas, chaqai lqaỹa aso Sarvia, late'e so Joab.
26Ca' so Absalón chaqai so llaalqaipi so Israel nco'matec quiyi 'laua Galaad. 27Ca' so David co'na' ỹovita yi Mahanaim, ca qoyica'guit queso Sobi, llaalec so Nahas, so'maxare na'ño' yi Rabá, huaugui yi na'laua so llaalqaipi so Amón; chaqai queso Maquir, llaalec so Amiel, so'maxare na'ño' yi Lodebar; chaqai queso Barzilai, na'ño' yi Rogelim, huaugui yi 'laua Galaad. 28Ca' qaỹodo'oga so lacanqaipi so David, chaqai so nquiỹoxoquiripi, chaqai so 'ueenallipi 'laua, chaqai na trigo, cebada, 'aríña, chaqai nasoolec ala nelooteguese, chaqai na poroto leenaxat habas, lentejas, 29rapic li'i, chaqai na qaỹa'ñaaqajanta' quena huaca chaqai ana qagreta lo'i', qaỹauaaque loq so David chaqai so nauegaxauaripi. Ma' 'neetapiguio' lauel so qomyipi quiyim ma' chicqa'oga yi 'laua qaica qom, ca' isot, qopat chaqai 'xoic laquip.
