2 Samuel 19

_1-2Ca co'na' so qomyipi ỹa'den quiyim so nashi 'xoic da noỹenaxac chaqai naualqategueñi queda lelauaxa so llaalec Absalón, ca' qaỹa'ue la'xaỹaxac so Joab. Ca' chaqaida 'neeto' queso na'xa'a quiyim da loxonaxanaxac so ỹalliripi ñigui da nachicoxo. ₃Ca' sojo alliripi ỹaatqajam nañoxochichiguiñi na' ỹovira'a yi na'a'. So alliripi taatau'a yi'maxare, qam nayiloxontaho, 'ec ná'maq 'eetaxaiquipi qohit queca lauatqa'. ₄Qam so nashi ñaqai queetalec ỹapootagui na lashic, ca' naualqategueñi 'neeta'guesa':

—¡Absalón, ỹaalcolec! ¡Absalón, ỹaalcolec, ỹaalcolec!

₅Ca' so Joab quepegue'o' yi la'a' so nashi, ca 'naapego':

—Qami' qarashi, chaqai viisaque na layiloxo ná'ogue na relaataxai'ipi ná'maq nca'laxatec qami' nagui, chaqai na qachaalaxai'ipi, chaqai na qachaalli'ipi, chaqai rouachi'ipi, chaqai ana reloxoỹaxanata'e'ipi. ₆Qami' qarashi, nagui, ca' choxochi' quiyim qaica ca vi'raque na rotaua'e' nashillipi, ma' paguec 'xoriñi' ná'maq qami' loquiiaxat chaqai roquiiaxachi' ná'maq re'xoriñi'sac. Ca' ỹim nagui yitan quiyim qami' qarashi paguec quet la'maxa nqai'ñi' quiyim nca'leetauec so Absalón, ca 'enquetqai qomá'ogue qarimiichiguiñi. ₇Ca' vichiguiño' nagui paguec la'maxa quiyim qami' nachaachirac, ca' ỹaatqajam 'ñaxachi' ná'maq queeta'pegue' qami'. Ma' se ỹa'maxañi quiyim 'ñiisari' dajo, ma' no'me' nagui, ca' 'qa'ichirigui aỹim chaqai ñi qara'gaxala' quiyim quenajo pe, ca' qaica ca no'ueena'ansop qami' quena qomyipi. Ca' dajo paguec la'aaxa ma'le caqami' qarashi quesá'ogue só'maq se no'uen qohiñiteraxaric na' ñaqai qami' noctoqui', chi ỹovireta'a nagui.

₈Ca co'na'le, ca' so nashi ne'laxashiguim, ca' nqa'xanñi quiñi lasom yi na'a'. Ca co'na' qaỹa'den quesá'ogue só'maq neetaugui yi na'a' quiyim so nashi nqa'xantañi quiñi lasom, ca sá'ogue so qomyipi quepegue' lapoỹau'a.

Qam mashic ime quiyim sá'ogue so llaalqaipi so Israel pila'alo naua la'aate'. ₉Chaqai quesá'ogue so llaalqaipi so Israel so qomyipi ỹaatqajam retaxaỹata', 'naaco' quen:

—Ca qarashi David ro'ootaxanlgoto qomi' na'le queso qanpa'guenaxaua filisteoipi, qam queso Absalón, ca' ca'maxare 'eet, ca'e na qara'a'. ₁₀Ca' so Absalón só'maq sanaxauo na'le quiyim qarashi, qam so'maxare ileuaugui so lauataq. Ca ¿negue' quet cá'maq ñauaanqataque quiyim rapil nqaishinaq ca qarashi David?

₁₁Ca' dajo la'qaatec sá'ogue so llaalqaipi so Israel chi noquiiquetauec, chi ỹovireta'a na' qaỹa'den queso qomyipi neeta'ñi yi la'a' so nashi David. Co'na'le, ca' so nashi ilata da la'qaatec saua netaxaỹaxanqajanqa Sadoc chaqai so Abiatar, 'neetasa':

—Qamiri taxaỹa'pegue' ma'le na lashillipi na llaalqaipi so Judá. Ca 'ñiỹapega quiyim chi'negue ma' qaua' 'naac quiyim sopila'a ñí'maq iuo' 'imec lodegaxat. ₁₂Chaqai 'ñiỹapega quiyim qaica quet cá'maq 'neeta quet quiyim na'maxare co'uaataxanta ca lasaataxac quiyim yopilaxato quiñi iuo' 'imec lodegaxat, ma' na'maxare ỹaatqajam ỹalamaxaret ỹaqaỹaripi cá'ogue cá'maq qareta'a. ₁₃Chaqai selaataxan quiyim qohinapega ca Amasa quiyim ỹim shinac qami' ỹaatqajam qami' idamshaxaua. Ca' vichiguiño' nagui chaqa'ma' sano qami' quiyim qami' lashi na ñalliripi, sana'ñi qami' yi loma' na'le so Joab. Ca no'm se ipaguigui nqaishin da ỹa'qaatec, ca' ñi qara'gaxala' ỹa'ue ma'le ca ñouaxanaxaset.

₁₄Ca' chaqaida 'ne'teco' na'le so David, ca' ishit so ỹalliripi llaalqaipi so Judá. Ca' sá'ogue so'maxare dá'ogue da la'qaatec quiyim rapil so nashi David chaqai cá'ogue ca lashillipi ca nalliripi. ₁₅Ca co'na'le, ca' so nashi na'maxajñi quiyim pil, ca co'na' ỹovita aso lachiugue Jordán. Ca só'maq llaalqaipi so Judá quepegue' yi Gilgal, ca'guit so nashi chaqai quiyim ỹotauan ma' pacta aso lachiugue Jordán. ₁₆Ca' so llaalec so Gera, só'maq chicqaugui na llaalqaipi so Benjamín, na'ñi yi Bahurim, leenaxat Simei, qai'neeta ỹaatqajam 'ue da liỹalaxa quiyim liỹaatac so llaalqaipi so Judá quiyim ca'guit so nashi David. ₁₇Liỹaatac so mil nalliripi quesó'maq llaalqaipi so Benjamín. Ca' so Siba só'maq lelaatec so llaalqaipi so Saúl liỹaatac so quince llaalqaipi chaqai so veinte la'aquipi, 'au ỹoviraxaso'ma aso lachiugue Jordán queso nashi David. ₁₈Ca' so'maxare quiichi'ñigui so napacqajnatec caso lachiugue, ca' ỹotauan so llaalqaipi so nashi David quiyim ỹapacta, ma' ỹahotaque quiyim qaicanqaida queso'maxare.

Ca co'na' so nashi sham pacta aso lachiugue Jordán, ca' so Simei ỹa'dooto' naua le'cootal so nashi. ₁₉Ca 'naaco' queso'maxare:

—Ñi'xoresene'tot qami' ỹashi, quiyim se ra'irigui da ỹo'maxaset chaqai da lasauaxaset najo relaachiqui' queso na'xa'a na' quire'e yi Jerusalén. 'Neeto' lotqai lli'sapigui añi re'taxanata'e' dá'maq shinta na'le. ₂₀Ma' ỹim ña'deenalta' quiyim 'ue da ỹasauaxaset. Ca ỹim ná'maq ña'auetec quena na'xa'a quiyim shica'guit qami' ỹashi quiyá'ogue yi llaalqaipi so José.

₂₁Ca co'na'le, ca' so Abisai, llaalec aso Sarvia, 'naaco':

—'Maxaraic quiyim qaỹalauat da Simei, ma' ỹaatqajam ishiuentac na'le da qarashi dá'maq lca'acsec ñi qara'gaxala'.

₂₂Qam so David 'naaco' quesaua Abisai chaqai so Joab:

—¡Dajo sqa 'iỹapegueu'a, qamiri llaalqa aso Sarvia! ¿Chi'negue ma' yquepaxachitac? Ma' nagui, ca' ỹaatqajam sa'deenta quiyim aỹim ná'maq ỹim nashi quena Israel, vichiguiño' nagui quena na'xa'a qaica ca qaỹalauat quena Israel.

₂₃Ime, ca' ỹalamaxachichigui so Simei, ca 'naaco':

—Saanec da ỹa'qaatec quiyim se qaralauachi'.

₂₄Ca' so Saúl laual, leenaxat Mefi-boset, qai'neeta ca'guito' so nashi. So'maxare shi'co' na' quesó'maq na'xa'a na' reloqouec so nashi, chi ỹovireta'a só'maq na'xa'a na' liỹa noviro quiyim qaicanqaida, so'maxare se quiỹo'o' naua lapiaate', chaqai se nepetegue' saua laqareue, chaqai se quiỹo' saua loho. ₂₅Ca co'na' ỹovita yi Jerusalén quiyim ca'guit so nashi, so'maxare 'naaco':

—Mefi-boset, ¿chi'neco' ma' sqai quitegue aỹim na'le?

₂₆Ca so'maxare 'naaco':

—Qami' ỹashi, ilaatec só'maq yayin chaxasa. Ma' ỹim chisaq, ca' sela' quiyim ỹo'uejlec so iñaxala' 'ashin, ma' sahotaque senalec, ca' shiguegue qami' ỹashi. ₂₇Qam so'maxare ỹaatqajam se no'uen dá'maq imaxalec aỹim quiyim ra'qaataxanem qami' ỹashi. Qam qami' ỹashi 'ñiisari' ca qota'olec lelaatec piguim le'ec. Ca' vichiguiño' nagui, ca' 'viiquiñi'sac cá'maq 'ñiisa'gue cá'maq 'viichi'. ₂₈Ma' ỹim sa'deenta quiyim ná'maq sachigoxougui ita'allipi ta'chiguit quiyim qanalauajñi caqami' ỹashi. Qam najo relaachiqui' ỹaxañire'oga quiyim nouantaho queca rqui'ỹaxalachi', qami' ỹa'gaxala'. Ca' nagui ¿negue' queto' cá'maq liỹa sashiilaxanaque caqami' ỹa'gaxala'?

₂₉Ca' so nashi 'naaco':

—Qaica quet cá'maq liỹa qaỹa'xat. Ma' ỹim shi'gue shinac quiyim qami' chaqai ca Siba nasectaxachiguilo yaua na'lauari so Saúl

₃₀Qam so Mefi-boset 'naaco':

—Paguec la'maxa quiyim ỹomata'ta' ca Siba yaua 'lauari. Ma' caỹim dá'maq ỹapacauec nqaishin quiyim rapillira'a na ra'aachi', qam ro'viiñite', sqaicanqaida.

₃₁Ca' so Barzilai só'maq na'ñi yi 'laua Galaad, so'maxare chicqau'a na'le yi na'a' Rogelim, ca ỹahotaque liỹaatac so nashi quiyim pacta aso lachiugue Jordán, ca ỹa'ue la'xaỹaxac so'maxare. ₃₂Qam so'maxare mashic ỹaatqajam qo'xoỹom, ma' mashic ỹovite' yaua ochenta ñaxari. Ca' so nashi naua'que naua na'xata' hueeta'ñi yi Mahanaim, qam so Barzilai ỹaante'em na louenec, ma' so'maxare ỹaatqajam nesallaxanec. ₃₃Qam so nashi 'naaco' queso Barzilai:

—Qami' iỹaatac ma'le ma' saxague da Jerusalén, ca hua'anyi ma'le, ca' scochiỹa qami'.

₃₄Qam so Barzilai 'naaco' queso'maxare:

—Ỹaatqajam mashic sqo vite' naua na'xata' shiquetauguilo nagui, ca ¿negue' quet cá'maq nishaaque quiyim saigue da Jerusalén, ñauequeta'pegue' qami' ỹashi? ₃₅Ma' mashic sovite' yaua ochenta ñaxari. Vichiguiño' ỹaatqajam tot sa'den ca lo'daxa quiyim 'ue ca sa'ic, loqo'm quiyim 'ue ca ñi'chigui, ca' vichiguiño' se sa'den quiyim lo'daxaraic loqo'm se no'uen, chaqai tot ishit quiyim sa'xaỹa ca lo'ueenec na 'ueenaxanaxaiquipi ỹalliripi chaqai na 'aallipi. Ca' ¿chi'negue queta' remi'relec aỹim cochi'sapiguiỹa', qami' ỹashi? ₃₆Ca' ỹim chaqai chi ñco'uaategue qami' quiyim paquireta ana lachiugue Jordán, qam ¿chi'neco', qami' ỹashi, ma' vi'saque yishivichiñi' quedajo? ₃₇Qam chaqaidaata quiyim sashiila'e' quiyim sopil ma'le queda ỹa'a', ma' sahotaque quiyim chaqaiyi seua'ñi ma' yileu, qaiyi qayishiñi'ñi ma'le cá'maq huera'ñi caua ita'al. Qam qami' ỹashi, dajo liỹa nalli'i', da'maxare chaqai ỹaalec, leenaxat Quimam. Ca qami' liỹaatac da'maxare, ca qami' chaqai 'viiquiñi'sac cá'maq 'ñi'sa'gue queda'maxare.

₃₈Ca' so nashi 'naaco':

—Hua', nagueco' aỹim da Quimam. Ca' da'maxare saanem cá'maq 'maxariñite'. Ca cá'ogue cá'maq ỹaxañiraque caỹim, ca saañiraxarom.

₃₉Ca co'na'le, ca' sá'ogue so qomyipi ỹapacta aso lachiugue Jordán. Ca co'na' mashic ỹapacta so nashi, ca nqo'goq so Barzilai, ca' niquine'e'. Ca co'na'le, ca' so Barzilai pila ca na'ñi ca la'a'. ₄₀Ca' so nashi eec quepegue' yi Gilgal, nauequeta'pegue' so Quimam, chaqai sá'ogue so ỹalliripi llaalqaipi so Judá chaqai 'uo' ca lavinñi na llaalqaipi so Israel.