2 Tesalonicenses 2

₁Ca' nagui qamiri qarqaỹa', quedá'maq loviraxac so qara'gaxala' Jesucristo ma' novi' lapooñiguita qomi' so'maxare, ca saqataxalo qamiri ₂quiyim mesqai chaqa'ma' dalaxachii ca ra'deenataxanaxaguii, chaqai se ro'chii no'm 'ue ca na'qaatec 'ec chicqo'ot so Espíritu Santo, chaqai no'm 'xahitapega na na'qaatqaipi, chaqai no'm 'ue aca nelaata 'ec chicqo'toto qomi', ỹa'xatetac quiyim mashic novi' ca na'xa'a loviraxaqui so qara'gaxala'. ₃Qam sqai 'xañiigue ca nayinaxaguii, ma' ma' saqa' ỹovita cajo na'xa'a, ca novi' ma'le ca npa'guenaxac ñi qota'a. Ma'le, ca' re'oq ca ỹale sauaqhuaic cá'maq tai'a quiyim ỹaatqajam ime nqohin. ₄'Eca cá'maq pa'guenaxaua, ma' nachajñi, ca' npa'guene'e' ná'ogue ná'maq ỹodootac da leenaxat ñi qota'a, chaqai ná'maq qanqouagaxaintacot, chaqai ỹovireta'a quiyim nqa'xanlec ca qouagaxainqa' quena' qanqouagaxainot ñi qota'a. Ca' chaqaica cá'maq 'ec qota'a, chaqai 'naac chaqaica cá'maq qota'a.

₅¿Sqo 'lliinchiỹo' na' llaq salequetauguilo qamiri chaqa'ma' shi'gue sa'xatetac dajo? ₆Ca' nagui qamiri 'yiiñita dá'maq nolliitañi cajo ỹale sauaqhuaic quiyim saqa' nachaxan, toco' ma' ỹovita ca laloqo'. ₇Ma' dá'maq hualoxonqaishic se re'xogui mashic shi'gue ro'ueenataxantac, qam chi nauaanta'a quiyim qanaqat dá'maq nolliitañi. ₈Ca' ma'le, ca nachaxan cajo ỹale sauaqhuaic, qam so qara'gaxala' Jesús ỹalauatañi ma'le, ma' pe'tot quena lacat chaqai da lauaq da loviraxac. ₉Da loviraxac cajo ỹale sauaqhuaic naquetaugui da lo'ueenataxanaxac so na'ỹaapec. Ca ma' novi', ca ỹaatqajam 'xoic lquesaxanaxa, ca ỹo'uet na netanqaipi chaqai na sqa iuanapega, qam chi lachoxonataxanaxac. ₁₀Ro'ueenataxana ná'ogue na se ỹa'maxañi, ma' ỹahotaque ỹayin na qomyipi ná'maq tai'a da nouaxanaxaset sqaica lqodoc, ma' mashic se icoñiguit dá'maq na'qaatec lliqueta, ca' qaiyi nca'leuec. ₁₁Vichiguiño' ñi qota'a ỹaxanegue da lo'maxac, ca' ỹo'uet quiyim huelec da na'maachic, ₁₂qaiyi ỹaatqajam lodegaxat ca nouaxanaxaset ná'ogue ná'maq se nqo'ta dá'maq ỹaatqajam lliqueta na'qaatec. Ta'ta'a quiyim paguec nqo'ta dá'maq se no'uen.

₁₃Qam qomi' se neme quiyim saanqatecshiguim qana'aachic quiñi qota'a caqamiri, ma' qamiri qanauochaxaua' qarqaỹa' queso qara'gaxala'. Ma' ñi qota'a nca'au'alo qamiri na' ñaqa 'avichiguiñi, qaiyi rca'lliuec. Qam dajo nca'laxa chicqo'ot so Espíritu Santo só'maq 'em quiyim qamiri lalamqate' ñi qota'a, chaqai chicqochigui nqai'en dá'maq ỹaatqajam llic na'qaatec dá'maq viilec. ₁₄Ca' chaqaida dá'maq 'em quiyim ñi qota'a roỹaxanalo qamiri, ma' ỹahotaque quiyim coñiguit da nca'laxa chicqochigui nqai'en da na'qaatec sa'xatqatac, qaiyi viriỹau'a da lauaq so qara'gaxala' Jesucristo.

₁₅Vichiguiño' qamiri qarqaỹa', na'ñaxachii quiilec chaqai se couahi'e naua qarapaxaguinataxanaxaco ỹaatqajam qamiri saanqaima, loqo'm quena' sahoqote'e qarelaata. ₁₆Ca' chaqaiñi ñí'maq qara'gaxala' Jesucristo chaqai ñi qota'olec, quedá'maq lqouagaxa, ca qare'xoren, ca' sqaica lqodoc nqai'en da la'maxa qouel chaqai da 'maxaraic qanaquitaxac, ₁₇chaqaiñaua ñauá'maq ỹa'ñaxate' naua re'taxanatahi chaqai rotauañigue quiyim shichii, quiyim 'xachii, chaqai quiyim 'viichii ná'ogue ná'maq ỹa'maqachiguiñi.