2 Timoteo 1

₁Aỹim Pablo, ỹacone'oga aỹim ñi qota'a, ma' ỹauaaque quiyim aỹim lelaatec so Jesucristo, quiyim sa'xatetac da nca'laxa shi'gue ỹachaxantac. Qam dajo nca'laxa ỹacoñiguit cá'maq mashic na'deetau'a so Cristo Jesús. ₂Ma' qami' ỹauochaxat ỹaalec Timoteo, selata qami' anajo ỹerecse, ma' sahotaque quiyim coñichiguit ca qouagaxa, chaqai ca ne'xorenataxanaxa, chaqai ca na'maxa chicqo'ot ñi qota'olec chaqai ñi qara'gaxala' Jesucristo.

₃Quiyi pe chaqai yi na'xa'a quena' ñqouagaxaintac, ca' so'leenta'oga qami'. Lotqai saantacot da ña'aachic ñi qota'a ñí'maq so'ueeteta'pe naua la'qaatqa, chaqai quiyim sa'deenta quiyim qaica ca ỹasauaxaset quiñi'maxare. Ca' chaqaida dá'maq 'neeta só'maq 'auaxaic ita'allipi. ₄Quena' so'leente'te da noỹenaxaqui', ca sahotaque quen quiyim seuañiraxaua', qaiyi paguec no'qaachigui aỹim queca ñitoonaxac. ₅Chaqai quena' so'leente'te dá'maq 'maxaraic rpi'ỹaxaqui'. Dajo no'uen npi'ỹaxac 'aue'tot aso rcomeena'e' Loida chaqai aso qachii'i' Eunice, ca' nagui sa'deenta quiyim hueeto'ot qami' qai'neeta dajo npi'ỹaxac.

₆Vichiguiño' nagui saqata qami' quiyim nelouec nqai'ñi' da lo'ueenataxanaxac ñi lame ñi qota'a queca na' sashil-lec qami'. ₇Ma' ñi qota'a se nañaanoxorom ca nqolonaxa, ta'ta'a da nquesaxanaxa, ne'xorenataxanaxa, chaqai ỹaatqajam sa'deenaq quiyim qaretelalta'. ₈Vichiguiño' se rpocoqoirelec quiyim 'xachisac so qara'gaxala' Jesús, chaqai se rpocoqoirelec aỹim quiyim qaycoñiretari', sasoualec so'maxare. Ta'ta'a quiyim lliquirau'a ca ne'xoric quiyim sohiralec da na'qaatec chicqaugui da nca'laxa, quecá'maq taachi'ñi da rquesaxanaxa'e' chicqo'ot ñi qota'a. ₉Ñi'maxare nca'laxaterec qomi' chaqai roỹaxanalo qomi' quiyim saanqot da qanachaalataxac. Qam mesqaida quiyim 'ue ca lo'yaxanec qaro'ueenataxanaxac, qam dajo chaqai 'ne'teguelo qomi' ñi'maxare, ma' ỹauoteguelo qomi', ma' mashic ña'daqatau'a so qara'gaxala' Cristo Jesús. Shi'co' qare'xoren ñi qota'a na' saqa'leca na 'laua. ₁₀Ca' dajo le'xorenataxanaxa ñi'maxare ỹachaxan nagui, qam quiichigui nqai'en da loviraxac so qarca'laxaqui Jesucristo, só'maq napacalec da lquesaxanaxa so nelauaxa. Chaqai ỹachigoxochichigui da na'qaatec chicqaugui da nca'laxa, ca' chaqaida dá'maq re'oq nqai'en da nca'laxa tot ishit quiyim qaỹosogui.

₁₁Ñi qota'a ỹanagui quiyim aỹim la'qaataxanqajnec quiyim sa'xatetac dajo na'qaatec. Chaqai ỹamaxailec quiyim sapaxaguin na mesqai judío laseripi. ₁₂Ca' chaqaida dá'maq 'em 'ue da i'xoric. Qam se ypocoqotac, ma' sa'deenta só'maq hueeto'ot da ñaquitaxac. Chaqai ỹaatqajam sa'deenta quiyim so'maxare 'ue da lquesaxanaxa quiyim netela'a aỹim quedá'maq pataxailec, ỹovireta'guit nqai'en cá'maq pa'aatec na'xa'a.

₁₃Quiiterelco' dá'maq llicyaxac dá'maq qami' saanem no'uen napaxaguinataxanaxac, chaqai quiisaugui da npi'ỹaxac chaqai da ne'xorenataxanaxa ma' qomi' qoỹaanema, ma' ña'daqatau'a so Cristo Jesús. ₁₄Richilliro'o' dá'maq mashic pataxalec qami' ñi qota'a quiyim loqoira'a. Ca' qami' ỹotauan so Espíritu Santo só'maq mashic qomi' hueeto'oto.

₁₅Qam mashic 'yiiñi' quiyim yalat yá'ogue yi na'ñi yi 'laua Asia, ỹalequetero saua Figelo chaqai so Hermógenes. ₁₆Ca' ñi qara'gaxala' taalec nqai'en ca le'xorenataxanaxa na lauo' laseripi so Onesíforo, ma' so'maxare 'xoic la'ñaaqataxanaxac caỹim, chaqai se npocoxolec aỹim ma' ỹim ncoñiiteguesec. ₁₇Ta'ta'a quiyim imitetaque aỹim, chi ỹovireta'a quiyim ỹanachiua' na' hueeta'gue na Roma. ₁₈Ca' ñi qara'gaxala' ỹotauan ma'le quiyim ỹacoñiguit da le'xorenataxanaxa quecá'maq pa'aatec na'xa'a. Chaqai qami' mashic 'yiiñite' 'xoic lotaanaxanaxac coqomi' na' seuqata'gue na Efeso.