2 Timoteo 4

₁Ca' dajo ỹaqataxac saanem qami' nagui ỹaatqajam ỹauanchiguilo qomi' nagui ñi qota'a chaqai ñi qara'gaxala' Jesucristo, ma' nac ma'le quiyim nachaxan quiyim nashi, ca' imit na qomyipi quená'maq nca'leetauec chaqai ná'maq mashic ileu. Ca 'xoic da ỹaqataxac caqami', ₂quiyim ỹaatqajam 'xachi' da na'qaatec, nquipichira'pegue' quiyim 'ue ca redaaqachi' chaqai 'eno'm qaica ca redaaqachi'. Vire'ta quiyim shichi' ca qom, chaxañi' ca lo'maxac, qachita, chaqai ỹaatqajam neualaxaviñire'e' quiyim paxaguiñi'. ₃Ma' 'uo' ma'le ca na'xa'a quiyim na qomyipi tot ishit na'ñaxachiguit cá'maq no'uen napaxaguinataxanaxac. Ta'ta'a quiyim quelec da chi lqo'itaxanqachic, ca' ỹahotaque quiyim 'xoic ca napaxaguinatqo' quiyim qaỹapaxaguinegue qaicaata cá'maq nqo'ta 'xaỹa. ₄Ca' ỹapoguilo naua lque'la lauaco, qaiyi sqa 'xaỹa dá'maq ỹaatqajam llic leloxoỹaxac, ca' huelec ná'ogue nanchaqaina la'xaỹaxac. ₅Qam qami' ỹaatqajam na'maxachite', chaqai na'ñaxachichiguit da re'xoriqui', quirelec 'xachisac da na'qaatec chicqaugui da nca'laxa, repaquiterelco' da ro'ueenataxanaxaqui'.

₆Ma' da ñachaalataxac mashic qoỹaanot ñi qota'a, 'nejme' caua neuo' quiyim qaỹocorelec aca ncopatoxonaxalate, ma' mashic tot ladoc ca ñachaalataxac. ₇Ma' mashic somat quiyim ñco'uaateguelec da ỹo'ueenataxanaxac, chaqai somat da ñalliquinaxac. Ỹaatqajam llo'qoochiguiñi da npi'ỹaxac. ₈Ca' nagui nauaantaiguit ca ñishiue' quedá'maq lalamaxa da ñachaalataxac, qam dajo nañaañim so qara'gaxala' Jesús quecajo na'xa'a, só'maq se ỹo'maac quiyim imit ca qom. Qam mesqaỹimeta nañaañim, ma' qai'neeta ỹaanem ná'ogue ná'maq 'xoic lqo'iichi queca loviraxac.

₉Ỹaatqajam se naỹaloxoriñi' quiyim naquirepegue' najo, qaiyi ñauane'e' qami'. ₁₀Ma' so Demas yalat, ma' ỹapacqajnauec na lqo'itaxanqachic quená'maq huelec najo, ca' taigue da Tesalónica. Chaqai so Crescente taigue da Galacia, chaqai so Tito taigue da Dalmacia. ₁₁Chaqaiñiita ñi Lucas ñaq iỹaatac. Daañiraco' ca Marcos, ca naviquisa'pegue' ma'le, ma' ca'maxare ishit yotauan queda qaro'ueenataxanaxac. ₁₂Ca' so Tíquico selategue da na'a' lodegaxat Efeso. ₁₃Ca ma' naqui', ca' quiyi Troas ne'xachi' aca ipooto, spo'aana'ñi na'le yi la'a' ca Carpo. Chaqai ne'xachi' ma'le caua ñilere, chaqai cauá'maq ỹaatqajam ỹeraxanaxalate.

₁₄Ca lecat lo'o leenaxat Alejandro ỹaatqajam 'xoic na se no'uen 'ne'tegue caỹim, qam so qara'gaxala' ishiueten ma'le dá'ogue dá'maq 'ne'tegue caỹim. ₁₅Qam qami' rovichiro'o' so'maxare, ma' so'maxare ỹaatqajam se nqo'ta da na'qaatec sa'xatqatac.

₁₆Na' ñaqai chita'gue so'uet da itaxaỹaxac quiyim setaxaỹa'pegue' na nashillipi, qaica ca yotauan quiyim retaqalec aỹim. Ná'ogue yalat, qam no'uen quiyim ñi qota'a se ra'igui dá'ogue dajo. ₁₇Qalaxam ñi qara'gaxala' Jesús yotauan, ca ỹo'uet ca ỹa'ñaxac quiyim yipaquejlec quiyim sa'xat da na'qaatec chicqaugui da nca'laxa, qaiyi 'xaỹa dajo ná'ogue ná'maq sqai judioipi. Ca' chaqaida 'neeta quiyim so qara'gaxala' nca'laxatec aỹim quesó'maq toxonaxai. ₁₈Chaqai quepaqataxanlec aỹim quená'ogue ná'maq se no'uen, chaqai ỹoxojñi aỹim, qaiyi sovirau'a ca lo'ueenataxanaxac hueeto'ot na piguim. Ma' so'maxare hueeto'ot dá'maq qaremaqajnataxanaxac qaica lqodoc. Ajá'a, ca' chaqaida 'neeta dajo.

₁₉Selata da iquinaxanaxac aca Prisca chaqai ca loua Aquila, chaqai ca lauo' laseripi ca Onesíforo. ₂₀Ca' ca Erasto no'ueena'ñi yi Corinto, chaqai ca Trófimo ño'ueenaqta'ñi yi Mileto, ma' ralolaxaic. ₂₁Riỹalli'saco' quiyim na'itquena ma' saqa' novi' ca no'oomaxa. Ilata qami' da liquinaxanaxac ñi Eubulo, Pudente, Lino, chaqai añi Claudia, chaqai ná'ogue na qarqaỹaripi.

₂₂Ñi qara'gaxala' Jesucristo ỹalequetauguilo qamiri, chaqai ñi qota'a ỹaanema qamiri da no'uen qayicyaxaguii. Ajá'a, ca' chaqaida 'neeta dajo.