So Bernabé chaqai so Saulo ỹaconchiguit da lo'ueenataxanaxague' quiyim netaxaỹa'
1Quená'maq mashic ỹacoñiguit da na'qaatec neeta'ñi yi na'a' Antioquía mashic 'uo' na qota'a letaxaỹaxaqui chaqai na napaxaguinataxanaq. Quesaua'maxare 'uo' so leenaxat Bernabé, chaqai so Simón (na'aamataxat Hueraic) chaqai so Lucio, Cirene le'ec, Manaén (naquetashi'me' nauegaxaua so Herodes só'maq nashi quiyi Galilea) chaqai so Saulo. 2Ca 'uo' so na'xa'a co'na' saua'maxare lapoota'ta', qaỹo'ueentac ñi qara'gaxala' chaqai sá'ogue qaica que'e. Ca' so Espíritu Santo 'naaco':
—Qaỹoỹoote'ogalo ñaua Bernabé chaqai ñi Saulo, soỹaxanalo, ma' 'ue da sahote'e lo'ueenategue'.
3Ca co'na' ime da nqouagaxainaxac chaqai da nqopaaqachitaxac so qomyipi, ca' qaỹashil-lgoto saua'maxare, ca qailate'.
Saua Jesús lelaatqa ỹodo' da na'qaatec queda Chipre
4Ca co'na' qailate' queso Espíritu Santo so Bernabé chaqai so Saulo, ca taategue da Seleucia. Ca' quiyi, ca renoterougui aso qom lahi' huaxaỹaqse, querepegue' aso delec, leenaxat Chipre. 5Ca co'na' ỹovijta yi lanatqa' aso qom lahi', leenaxat Salamina. Ca' quiyi, ca tarougui naua lapoxoqui' na judioipi, ca ỹa'xatesac da la'qaatec ñi qota'olec. Ca' so Juan Marcos qai'neeta rotaanaxantac, nauequetecto saua'maxare. 6Ca co'na' nomachishiguim queesagui yi Chipre, ca chi ỹoviresa'a yi na'a' Pafos. Ca hua'ño'yi, ca natendalec so judío le'ec, leenaxat Barjesús. Ca so'maxare pi'xonaq 'maatqaic, 'naaco' quen quiyim letaxaỹaxaqui ñi qota'a. 7Sojo pi'xonaq neeto'ot so nashi, leenaxat Sergio Paulo. Sojo ỹale ỹaatqajam 'deenaxanqachaqaic. Ca' sojo nashi relaataxan quiyim qaroỹaxane'ogalo saua Bernabé chaqai so Saulo, ma' ỹahotaque na'xaỹaxana ca la'qaatec ñi qota'a. 8Qam so pi'xonaq 'uo' da liỹa leenaxat Elimas, se ỹaqamaxate' saua'maxare, ma' ỹahotaque quiyim se na'xaỹaxan so nashi. 9Ca' so Saulo chaqai qai'neeta leenaxat Pablo, no'qaachigui queso Espíritu Santo, ca ỹaatqajam ra'i'tot. 10Ca 'naapego':
—¡Qami' 'maatqaic chaqai qami' hualoxonaq, qami' na'ỹaapec llaalec, chaqai npa'guenaxaua ná'ogue na lo'yaxanec! ¿Chi'neco' ma' naxachisa'piguit dá'maq no'uen llicyaxac ñi qara'gaxala'? 11Ca' nagui rouaxañi' ñi qara'gaxala'; ca 'vio' caua na'xata' qami' qai'laq, sqai huañita ca lauaq añi ra'aasa.
Ca chaqa'ma' se neuanñi, hueetaugui so napalaxa, ca ipootete'era quiyim ỹahotaque 'ue ca icoñiguit ada laua. 12Ca co'na' so nashi ỹauanchigui dajo, ca' huelec, ma' 'xoic da le'laxa queda napaxaguinataxanaxac qaỹa'xatetac so qara'gaxala' Jesús.
So Pablo hueese'e yi na'a' Antioquía huaugui yi 'laua Pisidia
13So Pablo chaqai saua nauegaxaua' renoterougui aso qom lahi' huaxaỹaqse quiyi Pafos, ca taategue da Perge hueetaugui yi 'laua Panfilia. Ca' quiyi, ca' so Juan Marcos totqai eec, ca pilegue da Jerusalén. 14Ca co'na' ncopa, ca que', quere'e yi Perge, ca querepegue' yi na'a' Antioquía hueetaugui yi 'laua Pisidia. Ca' quiyi queso na'xa'a co'mataxaqui, ca inoxondougui añi lapoxoqui na judioipi, ca nqa'xañiñi. 15Ca co'na' ime qaretaqalec aso lere hueetalec na naqataxaquipi chicqo'ot so Moisés, chaqai aso lerecse so 'auaxaic qota'a letaxaỹaxaquiripi, ime, ca saua la'gaxalate' añi napoxoqui 'uo' so ila' quiyim 'naapegalo saua Pablo:
—Qamiri ỹaqaỹa', no'm 'ue ca ralamqataxanaxaguii, ca 'ñiỹapega na qomyipi nagui.
16Ca' so Pablo ne'laxashiguim, nanojshiguim ada laua, ỹahotaque quiyim so qomyipi i'maqajlem. Ca 'naaco':
—Na'xaỹaxañiua', qamiri Israel laseripi chaqai ná'maq ỹa'den no'cha'a ñi qota'olec: 17Ñi qota'olec quena qomyipi Israel laseripi, ñi'maxare chi lca'acsec so 'auaxaic qareta'allipi chaqai ỹo'uet quiyim noquiiguec so qouo' laseripi co'na' ñaqai neeta'ñi yi ỹoqa'a 'laua Egipto. Ca co'na' ime, ca naqatec, ca'e nqai'en yi 'laua, ỹahote'e da lquesaxanaxa. 18Ñi qota'olec na'ñaxachiguita naua'que naua se no'viiñi queso qomyipi na' neetalec yi 'laua qaica qom quesaua cuarenta ñaxari, 19chaqai ỹo'daauec so siete ỹoreta'oguit qomyipi neeta'ñi yi 'laua Canaán, ma' ỹahotaque ỹaanem yi 'laua so 'auaxaic qareta'allipi. 20Ime, ca' ỹoiquentac quesá'ogue so cuatrocientos cincuenta ñaxaripi, ỹahote'e la'gaxala' queso qomyipi nimiitaxanaq quena nasauaxaset, ỹovireta'a na' 'ue so letaxaỹaxaqui ñi qota'a, leenaxat Samuel. 21Ca' so qomyipi rashiilaxanaque quiñi qota'olec ca lashi quiyim idaaneguelec so'maxare. Ca' ñi qota'olec ỹa'ue quiyim lashi nqai'en so Saúl, llaalec so Cis, chicqaugui so lauo' so Benjamín, ca' nashi cuarenta ñaxari. 22Ca co'na' ime, ca naqat quiyi loma' so Saúl, ca ỹaanem quiyim nashi so David. Ca' queso'maxare, ca' 'naaco': “Ỹanataxat ñi David, llaalec so Isaí, ñi ỹale maq sa'maxarenta, ma' ỹo'uet ma'le cá'maq sahotaque.” 23'Uo' so ỹale quesó'maq ỹaatqajam ỹachigoxotaugui so llaalqaipi so David, leenaxat Jesús. Ca' chaqaiso so qoỹanagui quiñi qota'olec quiyim lca'laxaqui na Israel laseripi, ma' shi'gom ỹa'xateta'guit quiyim ỹa'ue. 24Qam na' saqa' novi' so Jesús, ca' so Juan ỹapaxaguintac ná'ogue na qomyipi Israel laseripi, 'neetapega quiyim ỹalate' naua se no'viiñi lanatqa, ca' qanachilaxan. 25Chaqai co'na' ipalata'a ca lqodoc aca lqauaxaqui so Juan, ca 'naaco': “Ỹim mesqaỹim cá'maq pe'taxañitaque quiyim aỹim; qam 'ue na coỹaretailec. Ca' ỹim quena'maxare sqa saiguit quiyim sosoorec naua lequeete' naua lapelate'.”
26Qamiri ỹaqaỹarolqa, llaalqaipi so Abraham, chaqai ná'ogue ná'maq no'cha'a ñi qota'olec: qomá'ogue taỹauguilo da na'qaatec chicqaugui da nca'laxa. 27Ma' só'maq neeta'ñi yi Jerusalén chaqai so lashillipi se ỹa'den negue' só'maq Jesús, chaqai se ỹa'deene' naua retaqateguelgoto lerecse' saua 'auaxaiqa letaxaỹaxaqui' ñi qota'a quena' ỹovire'oga yi na'xa'a co'mataxaqui. Ca' na' iconlec so Jesús quiyim ỹalauat, ca ỹaatqajam ipaquichigui nqai'en nauá'maq naneresañi na'qaatqa. 28'Eno'm quiyim qaica cá'maq 'neeta quet cá'maq ỹasauaxat quiyim qaỹalauat, qam qaiyiita qaỹashiila so Pilato quiyim relaataxanlec qaỹalauat. 29Qam cana' qaỹo'uet dá'ogue dá'maq naneretañi na'qaatec, ca' qanaqajñi queso npatenaxala', ca qaishinñi. 30Qam ñi qota'olec liỹa nca'leuec nqai'en. 31Ca' so Jesús 'xoic saua na'xata' nachaxantapegalo sauá'maq nauegaxaua' na' eec, chicqochi'ñi yi Galilea, taigue da Jerusalén. Ca' nagui chaqaisaua sauá'maq ỹa'xatesac so'maxare quena qom.
32Vichiguiño' sahoqotaque qomi' nagui da no'uen ra'xaỹaxaguii quedá'maq shi'gue qaỹachaxantapeguem so 'auaxaic qareta'allipi quiñi qota'olec. 33Ca' qomi' ma' qomi' llaalqa saua'maxare. Ca' nagui ipacqajanchigui ñi qota'olec coqomi' dá'maq shi'gue ỹa'xateta'guit, quiyim liỹa nca'laxatec so Jesús, ma' shi'gue qoỹeretañi quiyi lpa'axaua yi 'auaxaic salmo: “Qami' ná'maq qami' ỹaalec, saañiraxarom nagui da rca'laxa'e'.” 34Ñi qota'olec ỹachaxan quiyim liỹa nca'laxatec so Jesús, qaiyi so loshicmaxa ỹochiỹau'a quiyim tot no'uen, na' 'naac quiyi naneretañi na'qaatec: “Saanema qamiri ma'le dá'maq no'uen na'maxa, dá'maq shinac saanem so David.” 35Vichiguiño' 'naac qai'neeta queso liỹa salmo: “Sqai ỹaxanegue quiyim tot no'uen ca loshicmaxa cá'maq lqo'itaxat lelaatec.” 36Qam llic ma' so David cochiỹa so lauo' co'na' ỹo'uet da la'qaatec ñi qota'olec. Qam co'na' ileu, ca qailla'ñi yi hua'ñi so leta'allipi, ca' so loshicmaxa na'laañi. 37Qam se na'laañi so loshicmaxa só'maq qota'olec liỹa nca'laxatec. 38Vichiguiño' qamiri ỹaqaỹa', qaỹahotaque 'yiiñii dajo, quiyim chaqaiso so Jesús chicqaugui quiyim qaỹapalaxat na nasauaxaseteripi, ca' chaqaida dá'maq sa'xatetapeguema qamiri nagui. 39Ca' chaqaiso chicqochigui quiyim ná'ogue ná'maq huelec so'maxare qaỹapalaxat na lasauaxaset quená'ogue ná'maq lasauaxaset se qaỹapalaxat queso naqataxaquipi chicqo'ot na'le so Moisés. 40Vichiguiño' qamiri rovichiỹari', qaiyi sqa taalec qamiri dá'maq qoỹeretañi na'qaatec queso 'auaxaic letaxaỹaxaquiripi ñi qota'a, co'na' 'nerac:
41'Ajñii, qamiri 'naxanaxaiquipi, 'xoic re'laxahi, chaqai rellivii;
ca' ỹim ma' ỹim qota'olec, so'uet dajo chalego lecaic quenaua na'xatari,
qaiyi no'm 'ue ca qara'qaataxanem caqamiri, qam sqai huelec.
42Ca co'na' so Pablo chaqai saua nauegaxaua' co'na' inoxondec cañi lapoxoqui so judioipi, ca só'maq sqai judioipi ỹashiilo'oto saua'maxare quiyim liỹa retaxahi' quedajo queso liỹa na'xa'a co'mataxaqui. 43Ca co'na' ime so lapoxoc cañi lapoxoqui, ca 'xoico' ca queguelo so Pablo chaqai so Bernabé queso judioipi chaqai só'maq mesqai judío, qam icoñiguit da lapaxaguinataxanaxac na judioipi, ỹa'maxate'tegue chaqai na'maxateta. Qam qaỹaqata quiyim quiichiri'ñigui da le'xorenataxanaxa ñi qota'olec.
44Ca co'na' novi' so liỹa na'xa'a co'mataxaqui, ca lapoỹata' sham yá'ogue yi na'ñi yi na'a', ỹahotaque na'xaỹaxana ca la'qaatec ñi qota'a. 45Qam co'na' so judioipi iuane'ta so 'xoic qomyipi, ca se ỹa'maxaren. Ca' quiyi, ca retaqata'guit da la'qaatec so Pablo chaqai qaishiuentac. 46Qam so Pablo chaqai so Bernabé se no'chirelec da letaxaỹaxague', ca 'neraco':
—Qam 'eco' paguec la'maxa quiyim sa'auaxanaxe' qamiri quiyim sa'xataq da la'qaatec ñi qota'a ma' qamiri judío lase'; qam sqai coñiguit, chaqai sqa 'maxariñii quiyim viriỹau'a yi nca'laxa sqaica lqodoc, ca' nagui, ca qolaqpegue' na mesqai judioipi. 47Ma' dajo dá'maq qarelarelec so qara'gaxala', na' 'naac:
Aỹim sanagui quiyim 'eco' qami' ncoỹeraxanaxaqui quená'ogue na ỹoreta'oguit qomyipi,
chaqai quiyim chicqochigui ca nca'laxa quená'ogue na qomyipi quena lauat na 'laua.
48Ca co'na' 'xaỹa dajo na mesqai judioipi, ca 'xoic da netoonaxac, chaqai sá'ogue 'naac quiyim lo'yaxanec dá'ogue da la'qaatec ñi qara'gaxala', ca sá'ogue huelec só'maq shi'gue qaỹa'maxatetañi quiyim ỹovirau'a da nca'laxa sqaica lqodoc. 49Ca chaqaido' da 'neeta quiyim qaỹa'xate' naua la'qaatqa so qara'gaxala' quiyá'ogue yi 'laua. 50Qam na judioipi ná'maq se ỹa'maxaren so Jesús, ca itaxaỹaxanac so 'aallipi 'maxataxaraipi chaqai huelec ñi qota'a, quiyim quepegue' na nashillipi quiyi na'a' quiyim qaỹocana'pe so Pablo chaqai so Bernabé, ỹovireta'a quiyim qaỹo'derauec quiyí'maq hueese'e. 51Ca' saua'maxare ỹochigoxoi' naua lapelate' quena namoxoỹaxa. Ca' dajo 'neeta quiyim chi nasauaxatalta' so qomyipi. Ca' quiyi, ca' que', taategue da Iconio. 52Qam ná'maq mashic ỹacoñiguit da na'qaatec ỹaatqajam 'xoic da netoonaxac chaqai no'qaachigui queso Espíritu Santo.
