So Pablo hueeta'ñi yi Efeso
1Ca co'na' so Apolos hueeta'ñi yi Corinto, ca so Pablo naquetagui na no'ueenaxanaxaquiripi neetalgoto naua 'lauari qoỹoqoshi'meguelo, ca chi ỹoviretau'o' yi Efeso. Ca 'vio' saua natenalgoto mashic ỹaconchiguit da na'qaatec. 2Ca inateta'pe, 'naaco':
—¿Mashic shi'gue coñiguit ca Espíritu Santo na' coñiguit da na'qaatec?
Ca saua'maxare 'neraco':
—Ỹaatqajam se sa'xaiqa'pegue quiyim 'uo' ca Espíritu Santo.
3Ca lotqai so Pablo inate':
—Ca' ¿negue' ca lachilaxanataxanaxac cá'maq shi'gue coñiguit?
Ca saua'maxare 'neraco':
—Dá'maq nachilaxanataxanaxac rapaxaguinataxanegue so Juan.
4Ca' so Pablo 'naapegalo':
—Ajá'a, qam so Juan lachilaxanataxanaxac chi letanec quecá'maq ỹacoñiguit da na'qaatec, ca ỹalate' naua se no'viiñi lanatqa. Qam qai'neeta 'naac quiyim qoyiuelec só'maq co'uaataxanta queso'maxare, leenaxat Jesús, ma' chaqaiso so nashi nca'laxaqui.
5Ca co'na' ime 'xaita dajo, ca qanachilaxane', qarachilaxanataxana da leenaxat so qara'gaxala' Jesús. 6Ca co'na' so Pablo ỹashil-lgoto saua'maxare, ca anac so Espíritu Santo, ta'ñiguilo saua'maxare, ca ỹa'xate' naua ỹoqa'alo na'qaatqa, chaqai ỹa'xate' naua chicqoro'ot ñi qota'a na'qaatqa. 7Ca' quesá'ogue 'uo' ca doce ỹalliripi.
8Ca quesaua'que saua tres shiriguiri so Pablo taatapegueu'a añi lapoxoqui na judioipi, ra'qaataxantac, qaica ca ỹouetaque. Chaqai retaqatapougui na qomyipi, ca ishit quiyim na qomyipi huelec da lo'ueenataxanaxac ñi qota'a ma' ỹoiquentac ná'ogue najo. 9Qam 'uo' na ỹa'ñaxat añi le'taxanata, ca se ỹa'maxaren huelec. Qaidaata quiyim se no'uen na ỹa'xatetac queda na'qaataxac so Jesús, ỹa'xaiqachitetac na qomyipi. Ca' so Pablo ca'ahi saua'maxare, qaisoota ỹauec só'maq mashic ỹacoñiguit da na'qaatec cañi lapaxaguinataxanaxaqui so ỹale leenaxat Tiranno. Ca' ỹapaxaguintac naua'que naua na'xata'. 10Ca' quiyi chaqa'ma' eec, chi ỹovirete' dos ñaxari, ca sá'ogue so qomyipi na'ñi yi Asia 'xaỹa da la'qaatec ñi qara'gaxala' Jesús, ná'ogue na judío chaqai na sqai judío. 11Chaqai ñi qota'olec ỹo'uet na lodegaxat se qaiuanapega, ro'ueenataxañigui so Pablo, 12vire'ta quiyim qanadou'a so Pablo na colligue', loqo'm ca nooỹac chi queuocau'a nqohin na loshicmaxa. Ime, ca' qaỹodo'oga ca ralolaxaic, ca chaqa'ma' imeuec nqai'en, chaqai inoxonec na ne'ec lecmaxaic.
13Qam 'vio' saua judío lase' queesagui na qomyipi, naqaterac na ne'ec lecmaxaic. Ca' saua'maxare ỹahosaco' ro'goxonta da leenaxat so qara'gaxala' Jesús, quiyim naqat. Ca 'naapego' quen na ne'ec lecmaxaiquipi:
—Shinqapega qami' quiyim noxoñirec. Sodaqa'a qami' da leenaxat so Jesús, so ỹa'xatetac so Pablo.
14Da 'neeto' da ỹo'ueetesac saua siete llaalqa so judío le'ec, leenaxat Esceva. So'maxare lashi na letaxaỹaxanqajanqaipi na qomyipi quena' qaretaxaỹa'pegue' ñi qota'a. 15Qam co'na' ỹo'ueete' dajo, ca' so ne'ec lecmaxaic 'naaco':
—Seuana ca Jesús, chaqai seuana qai'neeta ca Pablo. Qam qamiri, ¿negue' qamiri?
16Ca' quedajo so ỹale neetagui so le'ec lecmaxaic, ca renotauguilo saua'maxare. Qaica ca ỹaho'chi, ma' ỹapaguelec da lquesaxanaxa. Ỹaatqajam iualaxainta'pe, ỹasectaqteta'pe naua loho, ca' vire'ta saua'maxare 'eete', quere'e yi la'a' so ỹale, neesauec chaqai coñirqate'. 17Ca sá'ogue so judío chaqai na sqai judío na'ñi yi Efeso, co'na' ỹa'den dajo, ca' 'xoic da lqolonaxa. Ca' 'naaco' so qomyipi:
—Ỹaatqajam 'xoic da lecaic da leenaxat ñi qara'gaxala' Jesús.
18Qai'neeta 'xoico' só'maq mashic icoñiguit da na'qaatec noviro, ỹa'xat dá'maq se no'uen 'au ỹo'ueetetac. 19Ca' queso qomyipi 'xoico' so re'oq ro'ueenataxantapegalo naua se no'viiñi. Qam se re'xoi' no'ueenataxanaxaco. Vichiguiño' sá'ogue nodouo ana nelere aná'maq hueetalec da se no'uen 'ueenataxac. Ca' qaicopata'a. Sá'ogue qaỹa'ajantac. Ca co'na' ime, ca' ỹaatqajam 'xoic na' qanaloqochin aso laseuete so lerellipi. 20'Eda da 'neeto' da na'qaatec queso qara'gaxala', ca lama'xa nqo'neetauec chaqai re'qoota da lquesaxanaxa.
21Ca co'na' ime dajo, ca' so Pablo ỹahotaque quepegueto yaua Macedonia chaqai yi Acaya, ca chi ỹovireta'gue da Jerusalén. Chaqai qai'neeta 'naaco':
—Ma' ime saigue da Jerusalén, ca sahotaque saigue da Roma.
22Ca ilajtegue da Macedonia saua dos lotaua', Timoteo chaqai so Erasto, ma' so'maxare ñaq ỹa'vii na'xata' neeta'ñi yi Asia.
'Uo' so la'aaxa quiyi Efeso
23Ca quesaua na'xata' 'uo' so la'aaxa lodegaxat hua'ñi yi Efeso sauaxat da la'qaatec ñi qota'a. 24Ma' 'uo' so lecata lo'o, leenaxat Demetrio. So'maxare ỹo'uet na ladenqatqaipi 'imqaipioqui', ỹadenaxachichigui da no'ueenataxac so lauo' aso nashiila, leenaxat Diana, ro'ueenataxana na lecata lahi leenaxat plata. Na'maxare chaqaina na ỹachigoxotetapigui quiyim 'xoic da lauegaxanaxac na lo'ueenataxanqajanqaipi so'maxare. 25Sojo ỹale ỹo'ueeto' so lapoxoc, lapoonta' sá'ogue so lo'ueenataxanqajanqaipi chaqai so liỹaripi, qam qainaata na lo'ueenatec. Ca 'naapego':
—Qamiri ỹalliripi, 'yiiñita quiyim dajo qaro'ueenataxanaxac chaqaidaata qara'maxatetegueñi, chaqai squi'ỹaqatapigui. 26Qalaxam qamiri mashic huañiỹa chaqai 'xaichigui queso ỹale, leenaxat Pablo. So'maxare ỹa'xatetac quiyim mesqai qota'a na chaqai qom lo'ueenatec nashiilec. Ca 'xoic na qom huelec so'maxare, chaqai mesqainaata quenajo Efeso, qai'neeta naua'que naua 'lauari quena Asia. 27Ca' nagui dajo 'ue da lichic, ma' queda qaro'ueenataxanaxac sqoue na'laañi, chaqai qai'neeta ñí'maq 'imec neetaugui añi ỹaatqajam late'ogue' qarate'e Diana ishit na'laañi da lichoxoric, ca tot qanqo'ta da lecaic añi qarashiila, ma' quená'ogue na Asia chaqai quená'ogue na 'laua lashiila añi'maxare.
28Ca co'na' 'xaỹa dajo so qomyipi, ca ro'o. Ca sá'ogue ỹaualqagui, 'naaco':
—¡Ỹaatqajam 'xoic lecaic añi Diana, lashiila na Efeso laseripi!
29Ca 'uo' da la'aaxa quiyá'ogue yi na'a'. Ca qaiconlgoto saua Gayo chaqai so Aristarco, dos ỹale' Macedonia lase', nauegaxaua' so Pablo. Ca qaỹahoglensau'a ca 'imec cá'maq lapooqo' so qomyipi. 30Ca' so Pablo ỹahotaque inoxono quiyi'maxare quiyim retaxaỹa'pegue' so qomyipi, qam se qaỹaseno quesó'maq qomyipi só'maq shi'gue ỹacoñiguit da na'qaatec. 31Chaqai qai'neeta 'uo' so nashillipi nauochaxauaripi so Pablo chaqai na'ñi yi Asia, nelaro da la'qaatec quiyim qohinapega quiyim sqa taỹapegueu'a cajo lapoxoc. 32Ca' quesó'maq lapoxoc 'uo' quen na ỹaualaq, 'naacda, lotqai da liỹa 'ue da liỹa ỹa'xat, ma' so qomyipi ro'ootari' chaqai sham sá'ogue se ỹa'den cá'maq 'neeto' quiyim lapoỹata'. 33Qam 'vio' saua judío lase' ỹa'xajtem so Alejandro dá'maq 'neeta, ca' chaqaiso ỹamaxashiguim so judioipi quiyim retaqa. Ca' so Alejandro nanojshiguim ada laua, ma' ỹahotaque i'maxañi so qomyipi, ma' ỹahotaque qoshiilgoto saua'maxare queso qomyipi. 34Qam co'na' qaỹa'den so'maxare quiyim judío le'ec, ca se qana'xaỹaxana, sá'ogue ỹaualqatagui 'uo' ca dos horas, 'naaco':
—¡Ỹaatqajam 'xoic lecaic añi Diana, lashiila na Efeso laseripi!
35Qam só'maq ỹiriguiñi ca 'deenaxac quenaua lapoxoco quiyi na'a', co'na' ishit i'maxañi nqai'en so qomyipi, ca 'naapego':
—Qamiri ỹalliripi ñiỹa'ñi na Efeso, quená'ogue na qomyipi qaica ca se ỹa'den quenajo na'a' Efeso quiyim chaqaina na reloqota'a ñi lauo' añí'maq npe'eete qarashiila Diana, chaqai qai'neeta ñi nadenqatec lqui'i ñí'maq najñi quesom chicqo'ot na piguim. 36Ma' dajo qaica ca ishit ỹoqolliguit. Vichiguiño' 'maxaraic quiyim nañaxañiñi re'maxaita, 'neeto' quiyim 'ue ca 'viichii no'm ỹaatqajam sqa 'yiiñita. 37Ma' nauajo ỹale' nauá'maq qamiri naviguiro sqaica ca ỹo'maqajandac chaqai qaica ca ỹa'xate' se no'uen cañi rashiilahi qamiri. 38Ma' ñi Demetrio chaqai ná'maq lo'ueenataxanqajanqaipi quiyim 'ue ca se nqo'ta, qam 'ue añi lo'ueenataxanaxaqui ná'maq imit quiyim 'ue ca nasauaxaset. Ca ỹalamaxatau'a cá'maq 'ue ca 'neeta, chaqai quena nashillipi, qaiyi queca 'óna idaanaque cá'maq chi lqoshaaqa'. 39Chaqai no'm ỹoqa'a cá'maq liỹa ỹaxañiỹaque, ca qamiri vii ca lapoxoc, taxaigui, qam na'maxachichigui ca 'neeta. 40Ma' qomi' seuqataugui da lichic quiyim qaỹamata'que qomi' pa'guenaxanaxaqa sauaxat dajo la'aaxa shiguente'e. Ma' 'ue ca renataxanegue sojo la'aaxa, ca ¿nega'ỹo' ca shinqac?
41Ca co'na' ime da ỹa'xat so neraxanaq, ca ime nqai'en so lapoxoc.
