So Pablo taata'gue da Jerusalén
1Ca na' ime sahoqotaque la'xaỹaxac so qarqaỹaripi, ca yinotaxaho caso qom lahi' huaxaỹaqse, salamaxataqa'gue da ñigaxasom leenaxat Cos. Ca' queca liỹa nete'e, ca sovitaxa yi Rodas. Ca' quiyi, ca qolaqpegue' yi Pátara. 2Ca' quiyi Pátara ñatenqalec aso qom lahi' huaxaỹaqse taỹa'gue da Fenicia. Ca yinotaxaugui, ca qolaq. 3Ca na' qolqata, ca sedaanqatau'a ada delec leenaxat Chipre, spa'xanqata'gue da qanemaq, ma' saaqata'gue da Siria. Qam cana' ỹovi' aso qarahi' taatou'a yi ñigaxasom leenaxat Tiro. Ca' quiyi, ca qaniỹoxoñi so li'ỹaac. 4Ca ñatenqalec so qomyipi shi'gue icoñiguit da na'qaatec, ca senqa'anyi siete na'xata'. Ca' saua'maxare qaỹa'uo' so la'xaỹaxac queso Espíritu Santo, ca qara'qaataxanem so Pablo quiyim sqa taigue da Jerusalén. 5Qam na' ỹovirerec saua siete na'xata', lotqai qolaq. Ca' so mashic ỹacoñiguit da na'qaatec ná'ogue na 'aallipi chaqai na ñaaqaipioqui' coỹarerauec qomi' queda lahi yi na'a'. Ca' quiyi lqodoc añi huaaxai, ca qomá'ogue sa'daqachiriñi naua qare'cootal, ca ñqouagaxainaq. 6Ca sahoqai la'xaỹaxac, ca ñqa'aalqata'piguit, ca yinotaxashiguim caso qom lahi' huaxaỹaqse. Ca saua'maxare pila'alo naua la'aate'.
7Somataq qolqatañigui aso huaaxai na' sachigoxosqochi'ñi yi Tiro, na' sovitaxa Tolemaida. Ca' quiyi, ca ñiquinqata'pegue' so qarqaỹaripi, ca senqa'anyi queso 'óna na'xa'a. 8Ca' queso liỹa na'xa'a so Pablo chaqai qomi' qolaq, ca sovitaxa yi na'a' Cesarea. Ca' quiyi, ca qolaqpegue' yi la'a' so Felipe. So'maxare ỹodac da na'qaatec chicqaugui da nca'laxa, chaqaiso' so liỹa' saua siete 'auaxaqa nca'acse' quiyim notaua', ca senqa'anyi. 9So Felipe 'vio' saua cuatro llaale saqa' o'ne'. Saua'maxare ỹa'xaterac na la'xaỹaxague' chicqotacot ñi qota'a. 10Ca mashic 'vii saua na'xata' senqata'anyi, ca novi' so qota'a la'qaataxanqajnec leenaxat Agabo. Chicqa'gue da Judea. 11Nouoỹalo qomi'. Ca ỹacona so nosaataxaqui so Pablo, ca coñite' naua lichil chaqai naua laua' queso'maxare. Ca 'naaco':
—Da la'qaataxanaxac so Espíritu Santo 'naac na judioipi quiyi Jerusalén 'ne'tegueda nqai'en ca ncoñiitaxac cá'maq looỹac nataq saataxaqui. Ime, ca' qoỹaano, qoỹaanem na sqai judioipi.
12Ca na' sa'xaỹaxa dajo qomi' chaqai yí'maq na'ñi yi Cesarea, ñi'xoresenqa'tot so Pablo quiyim se ipaguegue da Jerusalén. 13Qam so Pablo 'naaco':
—¿Chi'negue ma' nohiñitac chaqai viitaque na ỹachicoxo? Ma' ỹim mashic ñomatalta' quiyim sqaidaata quiyim qaycoñi', qai'neeta quiyim yileua'ñi yi Jerusalén, sasoualec so qara'gaxala' Jesús.
14Qam na' se na'xaỹaxanalo qomi', ca saxanqac, ca shinqac:
—Ipaquichigui nqohin cá'maq 'ne'tegue ñi qara'gaxala'.
15Ca na' ime dajo, ca ña'maxataxañi, ca saxague da Jerusalén. 16Ca' 'vii saua qariỹa' mashic ỹaconchiguit da na'qaatec chicqora'ñi yi Cesarea. Ỹalequetauguilo so 'oonoqui' ỹale leenaxat Mnasón, ne'xaỹoqsoqo' yi Chipre. So'maxare mashic shi'gom ỹacoñiguit da na'qaatec. Chaqaiso só'maq 'naac senqa'ñi ca la'a' ma' soviraq.
So Pablo ra'piichiu'a so Jacobo
17Ca na' soviraxaho quiyi Jerusalén, yi qarqaỹaripi netoonta'peguelo qomi'. 18Ca' queso liỹa na'xa'a so Pablo chaqai qomi' sa'piichaxau'a so Jacobo. Na' soviraxaho, hueeta'anyi sá'ogue so na'gaxalateripi qai'neeta. 19Ca' so Pablo sá'ogue niquine'e' so'maxare. Ca ime, ca' ra'qaataxan so'maxare, ỹa'xat ná'ogue na lo'ueenataxanaxac ñi qota'a huaugui na mesqai judioipi. 20Co'na' qara'xaỹa dajo, ca sá'ogue imaqachin ñi qota'olec. Ca qohinapega so Pablo:
—Hua', qami' qarqaỹa, ỹaatqajam 'yiiñite' quiyim 'xoic na judioipi mashic ỹacoñiguit da na'qaatec, ca ná'ogue na'maxare 'xoic lepagaxallic quiyim ỹouen qoyiquichi'ñigui na naqataxaquipi chicqo'tot nqohin na'le so Moisés. 21Chaqai 'uo' da la'xaỹaxac quiyim qami' paxaguiñisac ná'ogue na judioipi ná'maq neetaugui na sqai judioipi quiyim se na'xaỹaxana na naqataxaquipi chicqo'ot nqohin so Moisés, chaqai 'ñirapego' quiyim se ỹa'ue ca netanec na loshicmaxa na llaalqaipi, chaqai ỹaxañiñi naua chi qano'ueenataxaco. 22Ca ¿negue' ca 'neeto' nagui? Ma' na qomyipi lapoỹata' ma' ỹa'den novichi'. 23Ca' 'maxaraic quiyim 'viichi' da shinqac: 'Vii naua cuatro ỹale' salecqata'guita, ipalata'a ca laloqo' cá'maq la'qaategue' quiyim ỹomachirigui ca 'nerac quiñi qota'olec. 24Ca' nagui naua'maxare viqui', nquiỹoxouachi' ma'le, chaqai ná'ogue shivichiñi' aca laseuete dajo. Ca ma' ime dajo, ca naua'maxare, ca nepetec na laue. Qaiyi ná'ogue na qomyipi ỹa'den quiyim sqai llic dá'maq qaỹa'xatetac caqami', ma' qami' qai'neeta ỹaatqajam pacqajñichirigui 'viichi'sac ná'maq nelaataxanaxaquipi. 25Qam quena sqai judioipi quená'maq mashic huelec da na'qaatec mashic shi'gue 'ue aso qoderecse hueetalec quiyim shinqapega sqa taỹapegueu'a dajo 'ueenataxac. Qaidaata dá'maq shinqapega quiyim se ỹa'ic ca la'at cá'maq mashic qoỹaanot ca nashiilec nqolac, chaqai naua nodaachiriñi leuo', chaqai na la'at ca isecỹac ỹauego na lqosot, chaqai se nocachita'ta' ca ỹale caca liỹa 'aalo.
Qaicoñi' so Pablo huaugui añi no'ueenaxanaxaqui quiyi Jerusalén
26Ca' so Pablo ỹauegue' saua cuatro ỹale'. Ca queso liỹa na'xa'a, ca nquiỹo chaqai saua'maxare. Ca na' ime, ca so Pablo inoxonougui añi no'ueenaxanaxaqui quiyi Jerusalén. Ca ỹa'xat ca laloqo' ca nquiỹoxoc, ca rachitaxanataxan, nodouo aca lachitaxanataxanqate que'óna quesaua'maxare.
27Qam co'na' ipalasauec saua siete na'xata', ca 'vio' saua judío lase', chicqora'gue da 'laua Asia iuanterelec so Pablo hueetaugui añi no'ueenaxanaxaqui. Ca ỹo'ueete' na la'aaxa quesá'ogue so qomyipi. Qai'guentau'a so Pablo, 28ca ỹaualaxalec, 'naaco':
—Qamiri ỹalliripi Israel laseripi, qarotauañii. Ma' najo ỹale chaqaina na ỹomate' naua 'lauari quiyim ỹapaxaguinta'pegue na qomyipi quiyim npa'guena'e' na qouo', chaqai na naqataxaquipi chicqo'ot nqohin so Moisés, chaqai qai'neeta najo qaro'ueenaxanaxaqui. Chaqai nagui inoxondougui nqai'ne' ana qaro'ueenaxanaxaqui saua sqai judío lase', chi i'nerari' napio'xote' najo co'teeta qalapooqo'.
29Dajo 'nerac, ma' shi'co' qaiuana quiyi na'a' lodegaxat liỹaatec so Trófimo, Efeso le'ec, ca qohintapega quiyim so Pablo ỹauegougui añi no'ueenaxanaxaqui.
30Ca 'ue da la'aaxa quiyá'ogue yi neeta'ñi yi na'a' lodegaxat, ca ne'guentagui. Ca co'na' ỹoviriri', ca sá'ogue ỹaconeu'a so Pablo, qaỹahoglene'oguiyi pa'aauec quiñi no'ueenaxanaxaqui, ca chaqa'ma' qaỹapoguilo ñaua lasomi'. 31Ma' qaỹahotaque qaỹalauat so'maxare, qam mashic ỹovi' da la'xaỹaxac so nouaataxanaq lashi quiyim mashic ro'o yá'ogue yi na'a' lodegaxat Jerusalén. 32Qam so nouaataxanaq lashi lapoonta' so nalliripi chaqai so lotauaripi. Ca' eec ne'guentagui. Ca na' qaỹovita ca hueete'e so qomyipi. Ca' so qomyipi co'na' idaana'guit so nashi chaqai so nalliripi, ca qoỹaxanñi quiyim qaỹouaxantac so Pablo. 33Ca' so nouaataxanaq lashi nqo'neu'a so'maxare. Ca' coñi' so Pablo, relaataxanlec qaicoñi' quesaua dos carénas. Ime, ca' renataxan negue' so'maxare, chaqai negue' ca lasauaxaset. 34Qam so qomyipi sá'ogue ỹaualqatagui, ỹoreta'oguit na ỹa'xatetac. Ca' so nouaataxanaq lashi se ỹa'den ca 'neeta paguelec na naỹaac, ca relaataxanlec quiyim qaỹauegueu'a ca la'a' ca nouaataxanyipi. 35Ca co'na' ỹovita ca ñicshiguim queca la'a' ca nouaataxanaq, ca' so nouaataxanyipi nanojshiguim so Pablo sauaxat se qaỹa'maxata'gue queso qomyipi. 36Ma' sá'ogue coỹaretaho, ỹaualqatagui, 'naaco':
—¡Paguec la'maxa queta' qaỹalauat!
So Pablo nichoxota so qomyipi
37Qam co'na' sham qainoxonaxato so Pablo quiyi la'a' so nouaataxanaq, ca 'naapega so nouaataxanaq lashi:
—¿Tegue' chi seshit sa'ue ca ỹa'qaatec?
Ca' so nashi 'naaco':
—¿'Yiiñi'o' naua griego la'qaatqa? 38Qam ¿mesqai qami'o' so Egipto le'ec so ñaqai chita'gue ỹo'uet so leualoxonqaishic, ca ỹauegue'oga yi 'laua qaica qom so cuatro mil qomyipi lauataxanaxaiquipi, ca' npa'guenaxanaxan?
39Qam so Pablo 'naaco':
—'E', ỹim judío le'ec, mese reto yi ña'xaỹoqsoqo' na'a' Tarso huaugui yi 'laua Cilicia. Qam qouaquiric quiyim yashiñi' quiyim setaqaugui na qomyipi.
40Ca' so nouaataxanaq lashi ỹasene'tem quiyim retaqa. Ca' so Pablo nachajñi quiyi ñicshiguim. Ca ỹachaxanshiguim da lqai'laxat, ca i'maxañi nqai'en so qomyipi. Ca na' sá'ogue i'maxañi, ca retaqa, ỹahota'ahi naua judío la'qaatqa. Ca 'naaco':
