Hechos 23

₁Ca' so Pablo co'na' idaanaugui so nashillipi, ca 'naaco':

—Qamiri ỹaqaỹarolqa, ñaqai queeta quiyim qaica ca ño'uenegue ỹasauaxaset quiñi qota'olec, chi ỹovireta'a najo na'xa'a.

₂Ca' so lashi na netaxaỹaxanqajanqaipi, leenaxat Ananías, 'naapegalo saua huaqase'e' so Pablo quiyim qaỹouaxanougui na lap. ₃Qam so Pablo 'naaco':

—¡Ñi qota'olec rouaxañi' ma'le, ma' dos naua no'ueenataxagohi'! Ma' nqa'xañisañi, do'iseguelec aỹim na nelaataxanaxaquipi quiyim michiraque ca ỹasauaxaset. Qam nagui quiyim maqsoxoñirelec aỹim quiyim qaỹouaxañiỹot, ca' chaqaqami' ná'maq napaquiseguelec ná'maq nelaataxanaxaquipi.

₄Ca' sauá'maq hueese'eyi 'neraco':

—¿Dá, 'ñirapega ñí'maq lashi na letaxaỹaxanqajnec na qomyipi quena' qaretaxaỹa'pegue' ñi qota'a?

₅Ca' so Pablo 'naaco':

—Qamiri ỹaqaỹarolqa, se sa'den quiyim chaqaiño' ñi lashi na netaxaỹaxanqajanqaipi. Ma' naneresañi quiyaua la'qaatqa ñi qota'a: “Se no'uen taqaira'guit ca reloqota'a na qauochi' laseripi.”

₆Ca' so Pablo retan quiyim 'vio' saua nashil ỹalequesaho naneresaugui na leenaxat fariseo, ỹalequesa'guit so liỹa naneretaugui na leenaxat saduceo. Ca ỹa'uo' da la'qaatec so Pablo, qam nelamaxaren, 'naaco':

—Qamii ỹaqaỹa', aỹim fariseo le'ec, sachicqaugui na fariseo. Ca' nagui qayimitetac, ma' sasouetapigui da ñaquitaxac quiyim liỹa qanca'laxatec ná'maq ileu.

₇Ca co'na' ime 'naac dajo, ca' so fariseoipi chaqai so saduceoipi chi pa'ỹata' retaxaỹata', ỹovireta'a noỹoota'chi so qomyipi. ₈Ma' so saduceo sqai huelec quiyim liỹa nca'leuec ca leuaxaic, chaqai 'naac qaica ca chicqashiguim qota'a lelaatec, chaqai sqaica na nqui'iipi. Qam so fariseoipi ná'ogue najo huelec. ₉Ca sá'ogue ỹaualqatagui. Ca 'vio' saua ne'laxachishiguim napaxaguinataxana' quena naqataxaquipi. Saua'maxare ỹalequesaugui na fariseoipi, ca 'neraco':

—Dajo ỹale qaica ca lasauaxaset. Chaqai no'm qanetaxaỹa'ña queca nqui'i, loqo'm ca chicqashiguim qota'a lelaatec, ca se ỹa'maxañi quiyim 'ec ñpa'guenqata'pegue' ñi qota'olec.

₁₀Ca mashic ỹapaguelec da co'uaxac, ca' so nouaataxanaq lashi 'ue da lqolonaxa quiyim qano'chiguigui so Pablo. Ca relaataxana'alo saua nouaataxanaq lase' quiyim qarouootaxana'gue so Pablo, ca qaỹopilaxata'a yi la'a' so nouaataxanaq.

₁₁Ca' queso pe so Jesús nachaxana so Pablo. Ca 'naapego':

—Qami' Pablo, na'ñaxachi'o' ma'le, ma' dá'maq 'ñitetegue da retaxaỹaxaqui' caỹim quena Jerusalén, qai'neeta 'ñitetegue ca retaxaỹaxaqui' ma'le quiyi Roma.

₁₂Ca queso liỹa nete'e 'vio' saua judío lase' na'deenta' quiyim ỹalauate' so Pablo. Saua'maxare 'neraco':

—Qomi' ñallitqalta' quiyim se squi'ỹaq chaqai se ñi'taq quiyim saqa' salauataq so Pablo.

₁₃'Uo' ca paguelec cuarenta so ỹalliripi só'maq mashic saachiguit dajo. ₁₄Sojo qomyipi quepegue' so lashillipi na netaxaỹaxanqajanqaipi chaqai na'gaxalateripi judío laseripi. Ca 'naaco' so qomyipi:

—Qomi' ñallitqalta' quiyim se squi'ỹaq, no'm saqa' salauataq so Pablo. ₁₅Vichiguiño' nagui qamiri nashillipi chaqai na liỹa na'gaxalateripi, shiilahi ñi nouaataxanaq lashi quiyim ma' nete'e qaỹauegue'ogalo qamiri ca Pablo. Qam 'ñiỹapega ca nouaataxanaq lashi quiyim qaỹahotaque ỹaatqajam qaretaqachigui ca 'neeta so Pablo. Ca' qomi' ña'maxatqatañi quiyim salauataq, ma' saqa' novita najo.

₁₆Qam so leteesec so Pablo ỹa'den dajo quiyim qana'deentapigui. Ca' eec, quepegue' ca la'a' so nouaataxanaq, ca ra'qaataxana so Pablo. ₁₇Ca co'na' ỹa'den dajo so Pablo, ca roỹaxana so lotaua so nouaataxanaq lashi, ca 'naaco':

—Viquira'a ca nouaataxanaq lashi najo ne'nec, ma' 'ue da la'qaataxanaxac.

₁₈Ca' so nashi lotaua ỹauec so ne'nec, ỹauega'a so nashi, ca 'naaco':

—Ñi ncoñiiteguesec leenaxat Pablo roỹaxana aỹim, ỹahotaque ñauego najo ne'nec, ma' 'uo' ca la'qaataxanaxac.

₁₉Ca' so nouaataxanaq lashi ỹacona da lqai'laxat so ne'nec, ỹaueguec. Ca inat:

—¿Negue' ca shim 'xachirim?

₂₀Ca' so ne'nec 'naaco':

—Na'deentecta' yi judío laseripi quiyim rashiilaxanegue viquirec nete'e ñi Pablo, viquire'ga yi nashillipi, ma' qaỹahotaque ỹaatqajam qaretaqachigui ca 'neeta ñi'maxare. ₂₁Qam se na'xaỹaxañito', ma' paguelec cuarenta yi ỹalliripi nañoxotetañi rauaanaxantac. Ma' yi'maxare nallitalta' quiyim se que'e chaqai se ne'et, no'm saqa' ỹalauat so Pablo. Chaqai nagui yá'ogue ỹa'maqatañi nauaantaque ca ra'qaachiqui'.

₂₂Ca so nouaataxanaq lashi 'naapega so ne'nec quiyim eec, qam qaica ca ra'qaataxanem quiyim ỹa'xatetac dajo.

₂₃Ca' so nouaataxanaq lashi roỹaxanalo saua dos lotaua', ca 'naapegalo quiyim na'maxajñi nqai'ne' ca doscientos nouaataxanaq co'ueetañi, chaqai ca setenta neetashiguim, chaqai ca doscientos ỹahote'e laqui, chaqai ma' ncopau'gue ca pe, ca' eec, taigue da Cesarea. ₂₄Chaqai relaataxanlec qaỹo'ueejlec ca lañaxala' so Pablo. Chaqai 'uo' da liỹa la'qaatec so nashi quiyim qaica ca qohine'tegue so Pablo, chi ỹovireta'a so nashi Félix. ₂₅Ca' qailateguelo aso nelaata lere, 'naac:

₂₆“Aỹim Claudio Lisias, qami' ỹauochaxat ỹashi Félix, selata qami' da iquinaxanaxac. ₂₇Chaqai da liỹa quiyim na judioipi ỹaconlec najo ỹale mashic sham ỹalauat, na' sa'den quiyim romano le'ec. Ca' ñanaguinaq, iỹaatac na ñalliripi, ca na' sovitaxa, ca' souootaxanqa'gue. ₂₈Ma' sahotaque quiyim sa'den cá'maq lasauaxaset na'maxare, ca sauegueu'a yí'maq judío lashillipi. ₂₉Qam na'le, ca' sa'den dá'maq qaỹahotaque soualec nqohin, sauaxat sqai quelgoto naua no'ueenataxaco na judioipi. Ca' negue' quet cá'maq 'neeta quiyim qaỹalauat, loqo'm quiyim qaicoñi'. ₃₀Chaqai na' sa'den quiyim qaretaqatapigui qaỹalauat, ca' chaqaida dá'maq 'em selata qami'. Chaqai shinapega na judioipi ná'maq qohintapega chicqaugui ca lasauaxaset, na'maxare quiyim qaretaqagui, 'qa'isapega qami'. Hua', ca' chaqaidaata.”

₃₁Ime, ca' so nouaataxanyipi ỹo'uet dá'maq shi'gue la'qaatec so lashi. Qaicona'a so Pablo, ca' queca pe, ca qaỹauegueu'a yi na'a' leenaxat Antípatris. ₃₂Ca co'na' richiguiñi, só'maq liỹa nouaataxanyipi co'ỹaaxaiquipi pil, pila yi la'a', ca só'maq liỹaripi neetashiguim ipaca ỹauec so Pablo. ₃₃Ca co'na' qaỹovita yi Cesarea, ca qoỹaanem aso lere so nashi. Chaqai qai'neeta so Pablo qoỹaano. ₃₄Ca na' ime retaqalec aso lere so nashi, ca' inat so Pablo negue' ca chicqa'gue. Ca co'na' ỹa'den quiyim Cilicia le'ec, ₃₅ca 'naapego':

—Ña'xaỹaxana qami' ma'le, ma' novi' cá'maq chicqaugui da ncoñiitaxaqui'.

Ime, ca relaataxanlec quiyim qaỹauegueu'a cá'maq ñauapec lauo' ca nashi leenaxat Herodes, qam ỹa'ue so neloxoỹaq.