Qaỹomatec so se ra'ñiiguelo naua lichil
1Ca 'uo' so na'xa'a so Pedro chaqai so Juan nauequetecta', tarishi'ma aca no'ueenaxanaxaqui quiyi Jerusalén, ma' mashic avit, ỹovita yi laloqo' qouagaxainqa'. 2Saua'que saua na'xata' neeta'ño' quen yí so ỹale. So'maxare co'na' chi ne'qaañi chaqa'ma' se ra'ñiiguelo naua lichil. Qaỹodou'o' quen añi no'ueenaxanaxaqui, ca qailla'ñi ñi lasom leenaxat Lo'yaxana, lashiilaxanqa' quená'maq inoxono quiñi'maxare. 3Co'na' sojo ỹale idaana'guita saua Pedro chaqai so Juan mashic sham inoxondo quiñi no'ueenaxanaxaqui, ca rashiilaxan quiyim qanqouaguegue. 4Ca' so Pedro chaqai so Juan ra'ira'a, ca so Pedro 'naaco':
—Ra'iro'oto qomi'.
5Ca' sojo ỹale na'ỹashiguim, ma' 'neetapigui lauel quiyim 'ue ca qoỹaanem. 6Qam so Pedro 'naaco':
—Qaca aca ỹam plata chaqai aca oro, qalaxam dá'maq hueeta'ỹot saanem qami'. So'ueenataxantapega da lquesaxanaxa so Jesús, Nazaret le'ec, vichiguiño' nagui shinapega qami', ne'laxachirishiguim, ca' qui'.
7Ca' so Pedro ỹacona da loic, ca nanojshiguim, ca' quiyi, chaqa'ma' ra'ñiiguelo naua lichil chaqai naua lataavi'. 8Ca chaqa'ma' ỹouoiguiri', ca liỹaasaho saua'maxare quiñi no'ueenaxanaxaqui, qauaata chaqai nenotetashiguim, imaqachintac ñi qota'olec. 9Sá'ogue so qomyipi iuana ỹouootegueri' chaqai imaqachintac ñi qota'olec. 10Ca ỹaatqajam 'xoic na le'laxa chaqai no'daxatetec quedá'maq 'neeta, ma' neuanatec so ỹale quiyim chaqaiso só'maq nqa'xantaño' quen, rashiilaxantac, neeta'ñi ñi no'ueenaxanaxaqui lasom, leenaxat Lo'yaxana.
Da letaxaỹaxac so Pedro na' hueeta'ñi yi leenaxat Nasoxoc so Salomón
11So ỹale se ra'ñiigue só'maq chita'gue qaỹomatec sqai ỹaxandec saua Pedro chaqai so Juan. Ca' sá'ogue so qomyipi 'xoic da le'laxa, vichiguiño' ne'guenta'ogalo quiyi hueesa'ñi, yí'maq cañi no'ueenaxanaxaqui late'ogue' leenaxat Nasoxoc so Salomón. 12Ca co'na' iuana dajo so Pedro, ca 'naapego' so qomyipi:
—Qamiri ỹalliripi Israel laseripi, ¿chi'negue ma' 'xoic na re'laxahi? ¿Chi'negue ma' ra'iito'oto qomi'? ¿Mashic 'eco' chaqaiqomi' naua somataxauec dajo ỹale, qaua nqaishinaq quecá'maq chi qarquesaxanaxa, loqo'm queda quiyim sa'maxataqa'tegue ñi qota'olec? 13Mesqaida. Qam ñi qota'olec ñí'maq huerelec sauá'maq 'au sachigoxosqauguilo Abraham, Isaac chaqai so Jacob ỹaanem quiyim paguec lichoxoric nqai'en so llaalec Jesús, só'maq qamiri 'ỹaañiu'a na nashillipi. Chaqai na' so Pilato ỹahotaque ỹosouec, qamiri sqa 'maxariñii. 14Ma' sqo ỹaxañiu'a quiyim qaỹosouec só'maq no'uen chaqai huagaxaraic ỹale, ta'ta'a qamiri ỹaxañiu'a quiyim qaỹosouec so lauataxanaxai. 15Ca' quiyi, ca' qamiri lauachii só'maq chicqo'ot da nca'laxa. Qam ñi qota'olec liỹa nca'leuec nqai'en, ca' quedajo qomá'ogue qomi' sauanqachigui. 16Ca' queda leenaxat so Jesús, só'maq sa'xatetac, loqo'm quiyim qaipi'ỹa'a da leenaxat, chaqaida dá'maq ỹa'ue da lquesaxanaxa najo ỹale huañiỹa chaqai 'yiiñii. Dajo npi'ỹaxac queso Jesús, chaqaida dá'maq ỹaatqajam ỹomatec. Ca' qamiá'ogue qamiri nagui 'ajñitac.
17Qamiri ỹaqaỹa', shi'gue sa'den, ma' na' qamiri chaqai saua ra'gaxalachiri lauachii so Jesús, qamiri 'viichii dajo, qalaxam sqa 'yiiñii dá'maq ỹaatqajam reloqo'tegue dá'maq 'viichitac. 18Qam ñi qota'olec ipacqajanchigui quedá'maq dajo, dá'maq shi'gue ỹa'xat quesó'maq la'qaataxanqajanqaipi: quiyim ma' nela' so nashi nca'laxaqui, quiyim ỹovirau'a nqai'en da le'xoric. 19Vichiguiño' nagui no'uen quiyim 'xañiñi naua no'ueenataxagohi, ca' nañaañiỹot ñi qota'olec, qaiyi ñi'maxare ỹapalaxate' naua rasauaxashichiri. Ca' ñi qara'gaxala' ishit quiyim nelatalo qamiri caua na'xata' quiyim ra'maxaichiguiñi, 20ma' nela' so Jesús só'maq nashi nca'laxaqui, só'maq shi'gue qaỹa'maxatetañi quiyim qanelatalo qamiri. 21Qam nagui ỹouen quiyim ñaqai neeta'gue da piguim so Jesucristo, ma' saqa' ỹovita ca na'xa'a quiyim ñi qota'olec ỹa'maxajñi dá'ogue da lo'ueenataxanaxac. Ma' chaqai 'naac ñi'maxare na' retaqaugui so 'auaxaic co'teeta la'qaataxanqajanqaipi. 22Ma' chaqaido' da 'naac so Moisés quesaua sachigoxosqauguilo, co'na' 'naac: “Ñi qota'a ñí'maq qara'gaxala' ilatalo qamiri ma'le ca la'qaataxanqajnec, qam chi ralamaxachii rqaỹahi, 'nejem aỹim na' yila'. Na'xaỹaxañiỹo' cá'ogue cá'maq ỹa'xat caqamiri. 23Ma' ná'ogue ná'maq se na'xaỹaxana cajo na'qaataxanqajnec, ca' se qaỹalecqajnougui na Israel laseripi chaqai qaỹaqa'viỹa'gue.”
24Ca' qai'neeta ỹa'xateta'guita nauajo na'xata' sá'ogue só'maq na'qaataxanqajanqaipi, chicqochi'ñi so Samuel, chaqai sá'ogue so liỹaripi. 25Naua ỹachaxanta'pe ñi qota'olec ỹaanouguilo saua la'qaataxanqajanqa ỹaatqajam taỹauguilo qamiri. Ma' qaỹahotaque ca ra'maxahi, ma' ñi qota'olec co'na' na'maxate'e' so 'auaxaic qareta'allipi co'na' 'naapega so Abraham: “Ná'ogue na ỹoreta'oguit qomyipi neetalec na 'laua 'uo' da na'aachicyaxac, qam chicqotougui ma'le ca qachaalaxai'ipi.” 26Na' ñi qota'olec liỹa nca'laxatec so llaalec, ca' 'au ilatalo qamiri, ỹahotaque ỹaanouguilo qamiri cá'maq no'uen, qaiyi quecá'maq 'óna caqamiri ỹalate' caua se no'viiñi no'ueenataxaco.
