Hechos 9

₁Qam ñaqaiso so Saulo queetalec quiyim ỹadentalec ná'maq huelec so qara'gaxala' Jesús. Vichiguiño' quepegue' so lashi na netaxaỹaxanqajanqaipi, ₂ca rashiilaxanaque aca lere lomalate da lo'ueenataxanaxac. Ca' eec, quepegue' yi na'a' leenaxat Damasco, quigui ana lapoonaxanaxaqui na judioipi, idaanaque na ỹalliripi chaqai na 'aallipi, ca' coñi' ná'maq queetalec da na'qaatec, nauegueu'a yi Jerusalén. ₃Qam co'na' ñaqai queeta'gue so nayic, mashic ipalatau'a yi na'a' Damasco, ca ne'laqataxanchiguiñi chicqo'ot na piguim so 'ec ncoỹeraxanaxaqui lauaq quiyí'maq hueete'e so'maxare. ₄Ca najño' so Saulo. Ca co'na' hueetañi quiyi 'laua, ca' 'xaỹaque so na'qaatec 'naaco':

—Saulo, Saulo, ¿chi'negue ma' yocañi'sac?

₅Ca' so Saulo renataxano':

—Qami', ¿negue' aqami'?

Ca só'maq na'qaatec 'naaco':

—Aỹim Jesús, chaqaỹim ná'maq ỹim yocañi'sac. Chi nqa'viiñiseguelta', 'nejem ca nauegaxanaxala' tooro quena' ỹachaqata'piguit na lo'lo aca na'daxanqate.

₆Ca' so Saulo i'loxoltari' quena lqolonaxa, ca 'naaco':

—Qami' ỹa'gaxala' Jesús, ¿nega'ỹo' cá'maq vi'saque so'uet?

Ca' so qara'gaxala' 'naapego':

—Ne'laxachirishiguim, ca quirepegue' yi na'a'. Ca' quiyi, ca qohiñirapegaxaua' quecá'maq 'viichi'.

₇Ca sauá'maq ỹale' liỹareta'pe so Saulo ỹaatqajam no'chi'. Ma' 'qaasapega só'maq na'qaatec, qam qaica ca iuanta. ₈Ca' quiyi, ca ne'laxashiguim so Saulo. Qam co'na' ỹauachiguilo naua nqote', ca se neuanñi. Vichiguiño' qaicona ada laua, ca qaỹauegueu'a yi Damasco. ₉Ca' yí hueetau'o' tres na'xata', se neuanñi chaqai se que'e chaqai qaica ca ni'chigui.

₁₀'Uo' so ỹale shi'gom ỹacoñiguit da na'qaatec neeta'ñi yi Damasco, leenaxat Ananías. Ca chaqaiso' só'maq so qara'gaxala' nachaxana queso leuanaxanaxac, ca 'naapego':

—¡Ananías!

Ca' so'maxare saato':

—¿Negue' ca, qami' ỹa'gaxala'?

₁₁Ca' so qara'gaxala' 'naapego' so Ananías:

—Ne'laxachirishiguim, ca quirepegue' so nayic, leenaxat Ỹalamqata. Ca ma' vichita yi la'a' ca Judas, ca nataxañiraque ma'le ca ỹale, leenaxat Saulo, chicqa'gue da na'a' Tarso. Ma' ñi'maxare nqouagaxaintac. ₁₂Ca 'uo' so leuanaxanaxac, iuana so ỹale leenaxat Ananías quiyim inoxoneu'a, ca co'na' ỹashil-lec ñi'maxare, ca lotqai liỹa neuanñi.

₁₃Ca co'na' 'xaỹa dajo so Ananías, ca 'naaco':

—Qami' ỹa'gaxala', mashic 'xoic na ỹa'xaỹaxac quecajo ỹale chaqai quená'ogue ná'maq ỹo'ueetetac se ỹa'maxañi queda Jerusalén quená'maq huelec qami'. ₁₄Ca' nagui nanaiquenajo ne'xateta so lere hueetalec na la'qaatec na lashillipi na netaxaỹaxanqajanqaipi quiyim i'xat ná'ogue coñi' ná'maq ỹouentac da qadeenaxachi' quena' nqouagaxain.

₁₅Qam ñi qara'gaxala' 'naapego' so Ananías:

—Mo'e', ma' ica'acsec ñi ỹale quiyim ỹa'xat da ỹeenaxat quená'ogue nanchaqaina ỹoreta'oguit qomyipi, chaqai quena lashillipi, chaqai vire'ta quena Israel laseripi. ₁₆Ỹim sachaxanem ma'le ñi'maxare quiyim ỹovirau'a 'xoic ca le'xoric souetapigui aỹim.

₁₇Ca' so Ananías quepegue' ca na'a' neeta'ñi so Saulo. Ca co'na' inoxono, ca ỹashil-lec quenaua lqai'laqate' so'maxare. Ca 'naaco':

—Qami' ỹaqaỹa Saulo, ñí'maq qara'gaxala' Jesús, ñí'maq nachaxano' qami' na' naquisa'gue na nayic, chaqaiñi ñí'maq nelata ỹim aqami', qaiyi liỹa neuañiriñi chaqai qami' no'qaachigui nqohin ma'le queca Espíritu Santo.

₁₈Ca' quiyi, ca 'vio' saua nachiñi quenaua nqote' 'ec leso, ca lotqai liỹa neuanñi. Ca' quiyi so Saulo ne'laxashiguim, ca' qanachilaxan. ₁₉Co'na' ime, ca' que'e, ca lot rapil liỹa da lquesaxanaxa. Ca 'vio' saua na'xata' neetauguilo saua mashic iconchiguit da na'qaatec nera'ñi yi Damasco.

₂₀Ca co'na' ncopa, ca so Saulo lotqai ỹa'xatetac da na'qaatec, hueetau'a ana lapoxoqui na judioipi, ỹa'xatetac so Jesús ỹaatqajam chaqaiso so llaalec ñi qota'olec. ₂₁Ca ná'ogue ná'maq na'xaỹaxantapega so'maxare ỹaatqajam 'xoic da le'laxa, ca 'neraco' quen:

—¿Mesqaido' dajo ỹale dá'maq rocanaxantapigui na neeta'ñi yi Jerusalén ná'maq ỹouentac da leenaxat so Jesús quena' nqouagaxain? ¿Mesqaido' dá'maq qai'neeta naiquenajo ma' ỹahotaque quiyim coñi' na'maxare, ca ỹauegueu'a yi lashillipi na netaxaỹaxanqajanqaipi?

₂₂Qam so Saulo lama'xa ra'qaataxan, noquiiquetauec da lquesaxanaxa, ichoxotetac so Jesús quiyim chaqaiso só'maq qaỹa'xateta'guit nashi nca'laxaqui, chi ỹovireta'a tot ỹa'den ca 'neeta so judioipi na'ñi yi Damasco.

₂₃Co'na' 'vii saua na'xata', ca' so judioipi na'deenta', ỹahotaque quiyim ỹalauat so Saulo. ₂₄Qam so'maxare 'uo' ca ỹa'ue la'xaỹaxac, ca ỹa'deeno'. Ma' quiyi na'xa'a chaqai yi pe saua'maxare nauaanta'pe naua lasomi' ñiguerec quiyi na'a', ma' qaỹahotaque qaỹalauat so'maxare. ₂₅Qam sauá'maq mashic shi'gue ỹaconchiguit da na'qaatec queca pe qaỹa'uo' aso canasto late'ogue', 'vii lequeete', ca qaillaañigui so Saulo, ca qaipa'xanauec queda lahi, ca quiichi'ñigui nqohin so lquepaxaset yi na'a'. Ca' da 'neeto' quiyim qohit.

₂₆Qam so Saulo co'na' ỹovira'a yi Jerusalén, ỹahotaco' lapoouo quesó'maq mashic ỹacoñiguit da na'qaatec. Qam sá'ogue qano'cha'a, ma' se qoyiuelec quiyim shi'co' ỹacoñiguit da na'qaatec. ₂₇Qam so Bernabé ỹauego, ca ichoxotema saua lelaatqa so Jesús. Ca' ra'qaataxanema quecá'maq 'neeto' so Saulo co'na' iuana so qara'gaxala' Jesús queso nayic, chaqai dá'maq 'neeto' so qara'gaxala' na' retaxaỹa'pegue', chaqai dá'maq 'neeto' da letaxaỹaxac so Saulo quiyim ỹaatqajam qaica ca no'chaaque ỹa'xatetac da leenaxat so Jesús na' hueeta'ñi yi Damasco. ₂₈Ca' quiyi, ca so Saulo na'ñi yi Jerusalén, ca ỹalequetauguilo' quen saua'maxare. ₂₉Chaqai qaica ca no'chaaque quena' ỹa'xat da leenaxat so qara'gaxala'. Na'qaataxanta'pegue' chaqai retaqata'guit na judioipi ná'maq ỹa'xate' naua la'qaatqa na griego. Qam sojo qomyipi idaantaco' quen ca la'maqa' quiyim ỹalauat so Saulo. ₃₀Qam co'na' ỹa'den dajo so nqaỹaripi, ca qai'xat so Saulo queda Cesarea. Ca' quiyi, ca qailategue da Tarso.

₃₁Ca 'uo' da la'maxa ná'ogue ná'maq mashic ỹacoñiguit da na'qaatec neetalgoto naua 'lauari quiyi Judea, chaqai yi Galilea, chaqai qai'neeta yi Samaria. Ca na'maxare noquiiquetauec da lquesaxanaxa, chaqai ỹa'maxate'tegue ñi qara'gaxala', chaqai quedá'maq lotaanaxanaxac so Espíritu Santo. Ca noquiiquetauec ná'maq icoñiguit da na'qaatec.

₃₂Ca co'na' so Pedro ỹouootegueri', ra'pichitapega so nqaỹaripi, chaqai qai'neeta ra'ajnaxanalo saua mashic iconchiguit da na'qaatec nera'ñi yi Lida. ₃₃Ca' quiyi, ca iuanejlco' ca ỹale leenaxat Eneas hueetalco' ca lacanec ocho ñaxari, ma' se ra'ñiigue. ₃₄Ca' so Pedro 'naapego':

—Eneas, Jesucristo romachirec nagui. Ne'laxachirishiguim, nañireta' na qacanqui'.

Ca' so Eneas chaqa'ma' ne'laxashiguim. ₃₅Ca qaiuanchigui quesá'ogue só'maq qomyipi na'ñi yi Lida chaqai na na'ñi yi 'laua leenaxat Sarón. Ca ỹalate' naua ñaua'pe lpi'ỹaxaco, ca' quelec so qara'gaxala' Jesús.

₃₆Ca' quesaua na'xata' 'uo' aso mashic shi'gom ỹacoñiguit da na'qaatec na'ñi yi Jope, leenaxat Tabita. Dajo neenaxat quenaua griego la'qaatqa 'naac: Dorcas (dajo 'naac: qagreta neuec). Aso 'aalo co'na' ñaqa 'ue 'xoic da lotaanaxanaxac, ỹotauantac ná'maq 'ue na louenaxanaxa. ₃₇Qam quesauajo na'xata' so Dorcas ralolo', ca ileu; ca co'na' ime qaiquiỹo, ca qaillaugui ca 'imec pa'aashiguim. ₃₈Yi Jope sqoỹaqaque quiyi Lida yí'maq neeta'ño' so Pedro. Ca co'na' so qomyipi ỹa'den so'maxare quiyim neeta'ñi yi Lida, ca' qailate' saua dos ỹale' quiyim 'nerapega chaqa'ma' eec, quepegue' yi Jope.

₃₉Ca' so Pedro queguelo saua'maxare. Ca co'na' ỹoviro, ca qaỹavicshi'ma cá'maq shi'co' qaillaugui pa'aashiguim 'imec. Ca sá'ogue so pa'ỹellipi noỹentagui, lapoỹaho, ca qaỹachaxantapeguem na loxoquiripi chaqai na lamaxaquiripi ná'maq lo'ueenatqaipio' aso Dorcas co'na' ñaq nca'leetauec. ₄₀Ime, ca' so Pedro inoxonaqtec sá'ogue so qomyipi. Ca ỹa'yi'iñi naua le'cootal, ca nqouagaxain. Ime, ca ra'iitalec aso 'aalo shi'gue ileu. Ca 'naapego':

—Tabita, ne'laxachirishiguim.

Ca so'maxare chi naviqueterec naua nqote', ca co'na' ra'i'tot so Pedro, ca' nqa'xanñi. ₄₁Ca' so'maxare ỹacona ana laua, ca navicshiguim. Ime, ca roỹaxane'oga so nqaỹaripi chaqai so pa'ỹellipi, ca ỹachaxanem, qam mashic nca'leetauec aso'maxare. ₄₂Ca' ỹa'den dajo yá'ogue yi na'ñi yi na'a' Jope, ca 'xoic na huelec so qara'gaxala' Jesús. ₄₃Ca' so Pedro ỹa'vii na'xata' neeta'ñi yi na'a', neeta'ñi yi la'a' so loshicmaxa lo'o, leenaxat Simón.