Amós 2

₁Ca 'neetasa' da la'qaatec ñi qara'gaxala':

Yi qomyipi na'ñi yi 'laua Moab ỹaatqajam 'xoic na ỹo'ueetetac se no'uen,

ca' sqaica ma' se sa'ue quet ca nouaxanaxaset;

ma' copata'alo saua lpi'naqa so nashi quiyi Edom,

paguec da lauel, ca vire'ta quiyim nodaachiguiñi lo nqai'ne'.

₂Vichiguiño' scopata'a ma'le yi 'laua Moab,

ca' sojo norec nopoxoỹaxajñi ma'le na nashi lauootoripi quiyi na'a' Queriot;

ỹalequetapougui so naualaxaquipi queso lauataq chaqai da lelamaxa ana npe'te,

ca nilliviñi ma'le so qomyipi na'ñi yi Moab.

₃¡Secona'a ma'le ñi lashi quena lavinñi so qomyipi;

ca' salauat ma'le, queeta'ñi' nqaishin so lotauaripi nalliripi!

Dajo 'naac ñi qara'gaxala'.

₄Ca 'neetasa' da la'qaatec ñi qara'gaxala':

Yi qomyipi naalec yi 'laua Judá ỹaatqajam 'xoic na ỹo'ueetetac se no'uen,

ca' sqaica ma' se so'uet quet ca nouaxanaxaset;

ma' liỹoqa'piguita naua lapaxaguinataxanaxaco ñi qara'gaxala',

chaqai se na'xaỹaxanalo naua laqataxaco,

ta'ta'a quiyim queetalec nqouagaxaintacot na lashiilqaipi lqolaquipi so 'auaxaic leta'allipi na'le.

₅Vichiguiño' scopata'a ma'le yi 'laua Judá,

ca' sojo norec nopoxoỹaxajñi yi nashi lauootoripi quiyi na'a' Jerusalén.

₆Ca 'neetasa' da la'qaatec ñi qara'gaxala':

Na qomyipi quena 'laua Israel ỹaatqajam 'xoic na ỹo'ueetetac se no'uen,

ca' sqaica ma' se so'uet quet ca nouaxanaxaset;

ma' imeenta ná'maq sqaica ca lasauaxaset canchi lesega'a nqai'en aca laseuete,

chaqai ca 'xoraic qoỹañiguita caua nepelate'.

₇Pataxañi chaqai nemanachit nqai'en na 'xoraiquipi,

chaqai se na'xaỹaxana quena' 'ue ca ỹahotaque.

Ca leta'a chaqai ca llaalec nouansagui lapaasapi'ñi' aca 'aalo nequetegaxai,

ca' queda, ca' iualaxainsac dá'maq chalego lco'taxa da ỹeenaxat.

₈Na'maxare ipiguinñi na ỹoqa'a nooỹac nillicseripi, ca' nenanlec,

ỹalequetau'a na nqui'ỹaxaquipi quena' qaimaqachin na nashiilec nqolaquipi;

rishiuetenaxana quena lataxa ana lam lachoxonataxanqate,

ca' ne'et quena lataxa quenaua lauooto' na lashiilqaipi nqolaquipi.

₉Qam ná'maq ỹim ma' sahotaque sa'ue ca qayiguii qamiri,

ca ñopoxoỹaxajñi so amorreoipi;

ỹaatqajam sá'ogue ñomachichiguiñi,

'eno'm ladocaiquipi 'ec ana qo'paq cedro,

chaqai ra'ñii 'ec ana qo'paq roble.

₁₀Qam qamiri ñaqata'alo na'le quiyi Egipto,

ca sashaxanta'pe qamiri quesaua cuarenta ñaxari quiyi 'laua qaica qom,

ma' sahotaque saanema qamiri yí'maq na'laua so qomyipi.

₁₁Ca' mesqai qollictaxañii, qamiri Israel llaalqaipi,

ma' caqamiri sachigoxotaugui na'le na' sa'ue ca itaxaỹaxaqui

chaqai ca nazareo cá'maq nomatalta' quiyim ro'ueenataxanot aỹim.

Ỹim na'gaxala', se'taxajñi dajo.

₁₂Qam qamiri 'xoic da repagaxalliguii quiyim ne'taxañigui na lataxa na nazareo ná'maq nallitalta' quiyim se ne'et,

chaqai sqai 'maxariñii quiyim na itaxaỹaxaquiripi ỹa'xate' naua ỹa'qaatqa.

₁₃Hua' cha'regue, ỹim roqopi'ñot nqaishin na 'laua quena pa'aañi caqamiri,

'ec quena' roqopita'pegue' aca nahoglena quena' no'qaachigui quena trigo.

₁₄Ca 'eno'm shi'gom ni'guiñita 'iichitac, qam qaica ca qohit;

cá'maq paguec quesaxanaxaic caqamiri, ca' qaica ma'le ca lquesaxanaxa,

ca 'eno'm 'ue ca paguec 'ñaaxaic, qam se nca'leuec.

₁₅Ca no'xoshic lo'o nañan ma'le,

vire'ta cá'maq yaqaic quena' ne'guen,

chaqai vire'ta cá'maq 'eet neetashiguim, se nca'leuec ma'le.

₁₆Ca' quecajo na'xa'a vire'ta cá'maq paguec 'ñaaxaic quena nalauataxairipi

inaxarec caua lo'goxonqate', qaiyi paguec liyic quiyim 'eet.

Ñi qara'gaxala' i'taxajñi dajo.