Amós 5

₄Ca 'neetasa' da la'qaatec ñi qara'gaxala' na' retaqaugui so Israel llaalqaipi:

Naguipegue' aỹim, qaiyi rca'lliiuec.

₅Sqai quiipegue' yi Betel quiyim nqouagaxaiñii,

chaqai sqai 'iigue da Gilgal,

chaqai sqai quiipegue' yi Beerseba,

ma' yi Gilgal qaica ca nañitqa' quiyim ỹoqa'a ca 'laua qainaxague,

chaqai yi Betel qanopoxoỹaxajñi ma'le.

₆'Guiñiỹot ñi qara'gaxala', qaiyi rca'lliiuec;

ma' no'me', ñi'maxare nela' ma'le ca norec,

taalec nqai'en ma'le ná'ogue ná'maq Israel,

ca' qaica ca ishit ỹo'mat ma'le quena Betel.

₁₄Daañiỹaque ca no'uen, mesqai ca se no'uen, qaiyi rca'lliiuec;

qaiyi llic dá'maq 'ñiỹaiquen qamiri

quiyim ỹalequetauguilo qamiri ñi qara'gaxala', ñí'maq qota'olec sqaica lqalanec.

₁₅¡Se rqo'chiỹa na se no'uen! ¡Ca rqo'chiỹa ná'maq no'uen!

'Chiichiguiñi nqai'ñii quiyim ỹo'uet na ỹa'maqachiguiñi ná'maq leraxanaxaqui na nimiitaxanaq quena nasauaxaset;

ca' sqoue quiyim ñi qara'gaxala' ñí'maq qota'olec sqaica lqalanec

'ue ca lqouagaxa quená'maq ca'laaxaiquipi quena Israel.

Yoquii'a chaqai se yqo'talo naua remaqachigohi 'viichita'pe quena' nqouagaxaiñii;

se semaqachine' naua rapoxogohi.

₂₂Se sa'maxaren ná'maq 'ỹaañiuo quiyim qaicopata'a quiyim yimaqachiñii,

vire'ta ana 'ỹaañiuo nanecsec ala;

se secoñiguit ná'maq huaqui llaalec 'uegaxasaq rachitaxanataxanaxachii

quiyim pilliỹot aỹim.

₂₃¡Ỹoxe'oga nqai'ñii caỹim da lelamaxa na ro'viiñigui!

¡Se yqo'ta sa'xaỹa na riviiguillipi!

₂₄Qam sahotaque quiyim 'ec huaxaỹaq ne'paxanec dá'maq no'uen caqamiri,

chaqai da na'maqataxanaxac 'ec ca se imeuo ne'paxantashiguim huaxaỹaq.