Amós 7

₁Dajo dá'maq ỹachaxañim na'le ñi qara'gaxala': Na' ñaqai chita'gue ñaxatetac na nanecsec co'uaataxanaxaic, ná'maq qaỹo'uet quena' ime'uegue quiyim raqataxan ñi nashi, ca seuane'ta ñi qara'gaxala' ỹo'ueetetac ana piñai. ₂Ca' seuana na' aso piñai ichiquetac, sham qo'oc ná'ogue aná'maq nanecse, ca' shinac:

—¡Qami' ỹa'gaxala', totaxan quirapeguema qomi'! ¿Negue' quet cá'maq 'neeta quiyim qa'vi'ra'gue naua sqo vite' llaalqa so Jacob?

₃Ca na'le, ca' ñi qara'gaxala' qaca'guit nqai'en dá'maq sham 'ne'tegue, ca 'naac:

—¡'E', dajo sqai 'neeta ma'le!

₄Dajo dá'maq ỹachaxañim ñi qara'gaxala': Seuana quiyim nela' so 'ec norec navicqataxanaq quiyim rouaxanaxana, ca rashivigui nqai'en aso qoỹoqochi'ñigui huaaxai late'ogue' chaqai sham nomachiñi qai'neete' naua no'ueenaxari. ₅Ca' ỹim shinac:

—¡Qovire'e qami' ỹa'gaxala', qouaquiric! ¿Chi'negue queta' qa'vi'ra'gue naua sqo vito'olqai' llaalqa so Jacob?

₆Ca na'le, ca' ñi qara'gaxala' nallaa quedá'maq sham 'ne'tegue, ca 'naac:

—¡Qai'neeta dajo sqai 'neeta ma'le!

₇Ñi qara'gaxala' qai'neeta ỹachaxañim dajo: Ñi'maxare hueeto'ot so nquepaqataxanaxat, ca lo'qoota'a aso lalamqataxanqate na 'imec lo'o. ₈Ca' yinat:

—Amós, ¿negue' ná'maq 'ajñisac?

Ca' shinac:

—Sa'ajantac ada 'imec lo'o lalamqataxanqate.

Ca na'le, ca 'naac caỹim:

—Ca' cadajo lalamqataxanqate ca 'imec lo'o, ca' sa'den ma'le ca lalamaxa ca la'deenataxanaxac na ỹalamaxareteripi Israel llaalqaipi. Ca ma'le, ca' tot qaica ma' liỹa yqouaca'gue quet. ₉Naua nqouagaxainqate' na llaalqaipi so Isaac qanopoxoỹaxajñi ma'le, chaqai naua no'ueenaxanaxaqui' quena llaalqaipi so Israel 'guiñi nqohin ma'le. ¡Ñanojshiguim ma'le ca llicat, ñalauate'e', ca ñomajñi ma'le na llaalqaipi ñi nashi Jeroboam!

₁₀So Amasías, só'maq netaxaỹaxanqajnec quena' qaretaxaỹa'pegue' ñi qota'olec quiyi na'a' Betel, so'maxare ilata da la'qaatec so nashi quiyi 'laua Israel leenaxat Jeroboam, ca 'naac: So Amós queetegueñigui na qomyipi quena Israel, ỹa'xatetac na se no'uen caqami'. Ca' ná'ogue na senqatalec 'laua tot nalo'guit quiyim queetalec da letaxaỹaxac. ₁₁Ma' 'neetasa' da letaxaỹaxac: Ñi Jeroboam qaỹalauat ma'le, qaỹodoota'a na lecat, chaqai ná'ogue na qomyipi quena Israel qai'xategue ma'le ca ỹoqa'a 'laua.

₁₂Na' ime, ca' so Amasías 'naac queso Amós:

—¡'Ire'oguiyi, qami' netaxaỹaxaqui! No'm vi'saque quiyim qui'i'sapigui dá'maq quiyim qami' netaxaỹaxaqui, ca mo'e', 'itegue da Judá; ₁₃qam totaxan liỹa taxahi' quena Betel, ma' na'maxare nqouagaxainqa' ñi qarashi, chaqai najo na'ñi na lo'ueenaxanaxaqui ná'ogue na neetalec na 'laua Israel.

₁₄Qam so Amós 'naaco':

—Mesqaỹim netaxaỹaxaqui chaqai se sahotaque quiyim ỹim netaxaỹaxaqui. Ma' ỹim sque'eetapigui dá'maq quiyim seloqota'a ana qagreta chaqai llapoontac ana 'igo neuec, ₁₅qam ñi qara'gaxala' naqata'a aỹim quiyim seloqota'a ana qagreta. Ca 'naac caỹim: Mo'e', 'xachi' da ỹa'qaatec quiyi qomyipi quiyi Israel. ₁₆Ca vichiguiño' nagui, ca na'xaỹaxañita da la'qaatec ñi qara'gaxala'. Dajo dá'maq 'ñirac qami': Totaxan 'ue ca 'xachi' quenaua la'qaatqa ñi qota'olec ỹadentalec na Israel chaqai qaica ca 'ñirac quiyim qaỹadentalec na llaalqaipi so Isaac. ₁₇Qam 'neetasa' dá'maq la'qaatec ñi qara'gaxala': Añi roua'e' icona ma'le quiyim nedequen, queugui ma'le na na'a' lodegaxat, ca' naua qachaalaxahi' chaqai naua qachaalli' qaỹalauate' ma'le, qaỹodoota'a na lecat; chaqai yaua na'lauachi' qanallichiguilo ma' qaneuagaxachiguilo; chaqai qami' qai'neeta rillivi' ma'le, ỹoqa'a ca 'laua vi'ralec, chaqai na Israel llaalqaipi qai'xat ma'le, ỹoqa'a ca 'laua qaỹaueguegue.