Colosenses 1

₁Aỹim Pablo, da ñilaataxac chicqo'ot ñi qota'a quiyim ỹauaaque aỹim lelaatec so Jesucristo. Iỹaatac ñi qarqaỹa Timoteo. ₂Shiriñi najo ilaata tai'a na qamaxaraic qarqaỹaripi queso Cristo chaqai lalamaxaret ñi qota'a, neeta'ñi na na'a' Colosas. Sahotaque quiyim qamiri coñiguit da lqouagaxa ñi qota'olec chaqai ỹaanema qamiri da la'maxa.

₃Se qareme saanqatacot da qana'aachic ñi qota'a ñí'maq leta'a so qara'gaxala' Jesucristo quena' ñqouagaxainqateguelgoto qamiri. ₄Ma' 'ue da qara'xaỹaxac caqamiri queda rpi'ỹaxaguii queso Cristo Jesús chaqai quedá'maq re'xorenataxanaxahi quená'ogue ná'maq lalamaxareteripi ñi qota'a. ₅Ma' 'ue da naquitaxaguii quiyí'maq qaỹa'maxatetañi qaỹauaaque qoỹaanema qamiri ma'le quiñi qota'a hueeta'gue da piguim. Qamiri 'uo' na'le da naquitaxaguii co'na' na'xaỹaxañiỹa dá'maq ỹaatqajam llic na'qaatec chicqaugui da nca'laxa. ₆Dajo na'qaatec dá'maq qaỹa'xatema qamiri na'le, chaqaida dá'maq noquiiquetashiguim, ca re'oq da laỹaxac quená'ogue na 'laua. Qaican ỹapaguec na'le caqamiri na' qaỹa'xatema qamiri da le'xorenataxanaxa ñi qota'a, ca 'yiiñii dajo quiyim chaqaida dá'maq ỹaatqajam ne'xorenataxanaxa. ₇Dajo dá'maq ỹapaxaguinguelo' na'le qamiri so qanauochaxaua qarqaỹa Epafras. So'maxare lo'ueenataxanaxaua' qomi'. Chaqai caqamiri, ca' ỹaatqajam qamaxaraic lo'ueenataxanqajnec so Cristo. ₈So'maxare noda'alo qomi' da qara'xaỹaxac caqamiri, chaqai quedá'maq re'xorenataxanaxahi chicqo'ot so Espíritu.

₉Vichiguiño' qomi' quecá'maq na'xa'a na' novi' da qara'xaỹaxac, chaqa'ma' se neme ñqouagaxainqatalgoto qamiri, sashiilqatac ñi qota'a quiyim ỹa'deenaxanaxanque qamiri cá'maq ỹahotaque ñi'maxare, chaqai quiyim ỹaanema qamiri ná'ogue nanchaqaina na'deenaxanaxa quiyim 'yiiñichigui na se re'xogui chicqo'ot so Espíritu. ₁₀Qaiyi shichii quiyim na'maxachita ma' chaqaida 'neetari' ná'maq lalamaxaret so qara'gaxala', quiyim se neme 'viichitac ná'maq ỹa'maxarenta so'maxare. Ca re'oq nqai'ñii dá'maq 'ñiitari' quená'ogue ná'maq no'uen 'viichitac, chaqai quiyim paguec 'yiiñita ñi qota'a. ₁₁Chaqai sashiilqatac ñi'maxare quiyim ra'ñichiriñi nqai'ne' qamiri quedá'maq chalego lecaic lquesaxanaxa, qaiyi shichii na'ñaxachiguit ná'ogue quiyim 'xoic da reualaxaviguii chaqai da netoonaxaguii, ₁₂chaqai 'ỹaañitacot da na'aachicyaxaguii ñi qota'olec, ma' ñi'maxare ỹa'maxatetañi ỹaanem cá'maq ỹachaxantac ná'maq lalamqateripi ma' ỹovita quiyim seuqataugui cá'maq lauaq ñi'maxare. ₁₃Ñi qota'a naqata'alo qomi' na'le queso napalaxa qaratoiquentac, ca inoxonaqta'alo qomi' da lo'ueenataxanaxac so lqo'itaxat llaalec, ₁₄ỹachigoxochichigui da lelauaxa so'maxare, ca' nca'laxaterec qomi', chaqai ỹapalaxat cá'ogue ca qarasauaxaseteripi.

₁₅Ñi qota'a ñí'maq qaican iuana, ñi'maxare hueetaugui da re'qoochigui no'ueenataxac na'le so llaalec, só'maq 'auaxaico' na'le na' saqa'leca ná'ogue nanchaqaina. ₁₆Ma' ỹachigoxochichigui so'maxare na'le, ca' ñi qota'a ỹo'uet ná'ogue nanchaqaina quená'maq 'ue quena piguim chaqai quena 'laua; ca' 'ue ná'maq se re'xogui, chaqai ná'maq re'qoochigui, chaqai na relaataxanac, nashillipi, na'gaxalateripi, chaqai na nquesaxanaxa se re'xogui; ná'ogue chicqochigui nqohin so'maxare. Chaqai ná'ogue chi lalamaxareteripi so'maxare. ₁₇So Cristo chaqai'eno' 'ue na' saqa'leca nanchaqaina, ca' chaqaiso só'maq nolliitañi ná'ogue na'maxare. ₁₈Qai'neeta chaqaiso so Cristo só'maq lqahic na noshicmaxa, ca na'maxare chaqaina ná'maq mashic icoñiguit da na'qaatec. So'maxare chaqaiso só'maq ỹa'ue da lca'laxa na noshicmaxa. Ma' so'maxare 'au qanca'laxatec na'le queso lelauaxa, ca' qoỹana'ñi quiyim na'gaxala' ỹapacauec quená'ogue. ₁₉Ma' ñi qota'a ỹahotaco' quiyim dá'ogue dá'maq chi no'ueenataxac imaagui so Cristo. ₂₀Chaqai ñi qota'a qai'neeta ỹahotaque quiyim ỹachigoxochichigui so Cristo quiyim ỹa'ue da la'maxa ná'ogue nanchaqaina, quená'ogue ná'maq hueetalec na 'laua, chaqai ná'maq hueeto'ot na piguim. Ca ỹo'uet da na'maxa, ỹachigoxochichigui da lelauaxa so Cristo co'na' qaipateno queso npatenaxala'.

₂₁Qamiri quesom 'ec ỹoqa'a ca chigoxoỹa'gue, ca quedá'maq 'neetari' añi re'taxanatahi ỹaatqajam npa'guenaxauahi ñi qota'a, ma' 'viichitac na se no'uen. Qam nagui ñi qota'a ỹo'uet quiyim huaqui'chiguita qamiri ñi'maxare, ₂₂ỹachigoxochichigui da re'qoochigui lelauaxa so Cristo. Dajo 'ne'tegue, ma' ỹahotaque nachaalataxando qamiri, qam co'chiita quecá'maq hueete'e so'maxare, quiyim 'ec qaica ca ro'maxashichii chaqai ca rasauaxashichii. ₂₃Qam quedajo, 'maxaraic quiyim na'ñaxachichiguiñi queda rpi'ỹaxaguii, 'ñiitari' aca qo'paq ỹaatqajam qoỹorichi'nguilo caua lpa'yii. Chaqai sqai 'xañiñi da naquitaxaguii chicqochigui dá'maq na'qaatec chicqaugui da nca'laxa na' 'xaiỹa. Dajo dá'maq na'qaatec qaỹa'xatetac quenaua'que naua lahil na 'laua. Chaqai aỹim Pablo sotaanaxanegue quiyim sa'xat da'maxare.

₂₄Ca' nagui, ca ñitoontac, ma' qamiri nauá'maq 'em quiyim 'ue da i'xoric, ma' quedajo, ca' nalogoñi nqaishin quená'maq chi ỹoshicmaxa dá'maq saqa' ỹovira'a na'le le'xoric so Cristo, quená'maq mashic icoñiguit da na'qaatec ma' chi loshicmaxa. ₂₅Ca sovirau'a quiyim sedaanlec ná'maq mashic icoñiguit da na'qaatec quedá'maq laqataxac ñi qota'a, ma' ỹahotaque quiyim ra'maxaiñi chaqai quiyim sa'xat dá'ogue dá'maq la'qaatec ñi'maxare, ₂₆dá'maq la'qaatec se ỹa'deenaxanaxanegue só'maq 'auaxaic qomyipi quesaua 'auaxaqa ñaxari, qam nagui, ca' ỹa'deenaxanaxanegue ná'maq lalamaxareteripi. ₂₇Ca quesaua'maxare ñi qota'a ỹahotaque quiyim qaỹa'den dá'maq lesallaxa 'ue da lauaq dá'maq ỹahotaque ỹaanem na mesqai judioipi. Ca' dajo na'qaatec quiyim so Cristo ỹalequetauguilo qamiri, ca' so'maxare chaqaiso só'maq ỹo'uet ca naquitaxaguii, qaiyi 'ue ca lauaxai' ma'le qamiri.

₂₈Qomi' sa'xatqatac so Cristo. Ca' 'ue da qaraqataxac quená'ogue, chaqai ná'ogue sapaxaguinqatac, qaiyi ỹaatqajam ỹa'deenta ca leloxoỹaxac, qaiyi quiñi 'óna ỹaatqajam noquiiquetashiguim ma' na'deetau'a so Cristo. ₂₉Ca' chaqaida dá'maq 'em quiyim ña'ñaxat, so'ueenataxan quedá'maq ỹa'ñaxac chaqai da iquesaxanaxa chicqo'ot so Cristo.