Ná'maq ỹa'maqachiguiñi qaỹa'ic na la'at quena iseripi chaqai na se qaỹa'ic
3'Neeto' a'guii ma'le ná'maq se qaỹa'ic.
4Ca' 'ena leenqateripi ná'maq iseripi qaỹa'ic: tooro, chaqai qagreta loua', quetaq llaalec, 5chaqai na peele, qagreta neuec, naueenec, quemaralec qa' lase, chaqai ná'ogue na iseripi 'nejem na'maxare. 6Ca' qamiri shichii 'guii ná'ogue na isecỹac quena ropilqataxan chaqai shicchiguilo naua lenachi'. 7Qam 'ena ná'maq iseripi sqa 'guii, 'eno'm ropilqataxan loqo'm shicchiguilo naua lenachi' quena iseripi:
Ana nauaanaxanaxa late'e, ana que'laỹole, nesoxona late'e. Naua'maxare se qaỹa'gue', ma' naua'maxare ropilqataxan, qam sqai shicchiguilo naua lenachi'.
8Chaqai ana cos, ma' na'maxare 'nesa ma' shicchiguilo naua lenachi', qam se ropilqataxan. Ca' se qaỹa'ic na la'at najo iseripi, chaqai quiyim mashic ileu, ca' se qaicoñigui.
9Quena iseripi huaxaỹaqsec ỹa'maqachiguiñi qaỹa'ic ná'maq 'ue ana lqai'iiteue chaqai ana leso, 10qam sqa 'guii ná'maq qaca aca lqai'iiteue chaqai aca leso, na'maxare 'ñiita'gue quiyim se qaỹa'ic.
11Qamiri shichii 'guii ná'ogue aná'maq ỹo co'teeta. 12Qam cana'maxare 'ue ana se qaỹa'ic, ca totaxan a'guii na la'at: o'ic, chaqai na chirálo, chaqai nesogue lo'o, 13chaqai na qatañiguit lodegaxat, chaqai ná'ogue na liỹa ỹa'cac ana qo'o, 14chaqai na ratecsan chaqai ná'ogue ná'maq 'nejem na'maxare, 15chaqai na mañic, ana quichiguiguit, chaqai na chiỹo', chaqai ná'ogue na ỹoreta'oguit qatañiguit, 16chaqai na chirit, chaqai na qoloxoqoq leta'a, chaqai ana cotelala', 17chaqai na 'ec natagoxonaq, chaqai na poue, chaqai ana qoyipe, 18chaqai na damec, chaqai ana qomigoxonaq, chaqai ana na'gaxanaxa.
19Chaqai ná'ogue na 'ec lase 'vii laua', na'maxare se na'ic caqamiri. 20Chaqai ná'ogue ana ỹo caná'maq co'teeta, shichii a'guii.
21Totaxan a'guii ca isecỹac quiyim chi nanoiquentac ileu, ma' qamiri ỹaatqajam co'teete' nqai'ne' ñi qara'gaxala' qota'olec caqamiri. Qam shichii 'ỹaañim cá'maq ỹoqa'a ca chicqa'gue ỹalequetauguilo qamiri queca ñiita'ñi, ca na'maxare ishit ỹa'ic chaqai ishit qaimeenem cá'maq ỹoqa'a ca chicqa'gue quiyim chaqai quejlgoto qamiri.
Sqai ñiiuaq ca quetaq llaalec huoshaxañiỹalo caua lo'i' aca late'e.
Dá'maq 'neeta quena' qoỹaano añi 'óna queca diez nanecsec la
22Ca' quiyim ỹovirec ca ñaaxa, ca' se couahi'e quiyim ỹoochihe'oga ca 'óna queca diez qadañicshiguii la. 23Ca cá'maq 'óna ỹoochiỹa'oga, chicqaugui na trigo, chaqai na lataxa, chaqai na aceite, chaqai na 'auaxaic llaalec ana huaca chaqai ana qagreta, ca' qamiri a'guii ma'le iuanchiguilo qamiri ñi qara'gaxala' qota'olec caqamiri, ñiita'ñi cá'maq lca'acsec ñi'maxare quiyim qaimaqachin da leenaxat, qaiyi qamiri shichii quiyim ỹaatqajam ro'chiỹa ñi'maxare. 24Ca no'm ñi qara'gaxala' nqouagueguelo qamiri quena re'qoochigui, qam qoỹoqo'talo qamiri quiyim dohi cá'maq ỹoochita'oga queca lca'acsec ñi qara'gaxala' quiyim neeta'ñi 'miaqchiỹa'gue, 25ca 'maxaraic quiyim miiñii cá'maq ỹoochita'oga, ca acá'maq laseuete, ca' dohiỹa cá'maq lca'acsec quiyim neeta'ñi ñi qara'gaxala'. 26Ca cá'maq laseuete, ca shiujnaxañita cá'maq paguec 'maxaraic nqai'ñi': ca ñii'lolaa, qagreta, lataxa, loqo'm canchaqaica quena liỹa lataxa, loqo'm cá'maq viichigui na qavilli' quiyim shiujnaxañita. Ime, ca' 'guii, iuanchiguilo qamiri ñi qara'gaxala', ca 'viichi' ca remaqachiqui', riỹahitac cá'ogue ca qachaalaxahipi.
27'Neeto' couahitaque na llaalqaipi so Leví neeta'ñi ca na'a' ñiitaugui. Ma' na'maxare qaica cá'maq ỹaatqajam na'laua caqamiri.
28Quiyim ỹovirerec caua tres ñaxari, ca' qamiri ỹoochihe'oga ca 'óna quecaua diez la ca qadañicshiguii queca ñaaxa, ca lapooñii quecá'maq raari ñiita'ñi, 29qaiyi ma' novi' na lotaua na netaxaỹaxanqajanqaipi quená'maq qaica ca na'laua, loqo'm na ỹoqa'a ca chicqa'gue, chaqai ana na'pelyipi, chaqai ana pa'ỹellipi, ca na'maxare ishit quiyim que'eetac, chi ỹovireta'a quiyim quema'. Qaiyi ñi qara'gaxala' qota'olec caqamiri nqouagueguelo qamiri quena re'qoochigui quená'ogue ná'maq 'viichii.
