Deuteronomio 23

₂Ca ñaalec no'm chaqai chicqauec peuaq, ca ca'maxare se qaỹalecqajnougui na llaalqaipi so Israel quiyim ỹovita qanqouagaxainot ñi qara'gaxala', chi ỹovireta'a nqohin quiyim se qaicoñiguit ná'maq chigoxougui ca'maxare.

₃Na llaalqaipi so Amón chaqai na llaalqaipi so Moab se ỹalegougui nqohin na Israel llaalqaipi quiyim ỹovita qanqouagaxainot ñi qara'gaxala', chi ỹovireta'a nqohin quiyim se qaicoñiguit ná'maq chigoxougui ca'maxare. ₄Ma' na' qamiri quiijlec yi na'laua na' chigoxoita'gue da Egipto, na'maxare se ỹo'uet ca raquipii chaqai ca qanoxohi, chaqai vire'ta ishiueten so Balaam, llaalec so Beor chicqa'gue da Petor quiyi 'laua leenaxat Mesopotamia, quiyim ỹahotaque inaxalgoto qamiri ca se no'uen la'qaatec. ₅Qam ñi qara'gaxala' qota'olec se na'xaỹaxana so Balaam. Ta'ta'a quiyim ñiguit nqai'en só'maq se no'uen la'qaatec so lo'yaxanec la'qaatec caqamiri, ma' re'xoriñii. ₆Ca' sqai viitaque quiyim nemañiguit chaqai quiyim 'maxachii'tegue na'maxare quenaua'que naua na'xata' quiyim ñaq rca'lliitauec.

₇Qam 'neeto' sqai coñiguit na llaalqaipi so Edom, ma' chi qauori laseripi na'maxare, chaqai na Egipto laseripi, ma' qamiri ñiitalec na'le yi na'laua. ₈Ca' ỹovira'a quiyim na llaalqaipi so lauaripi na'maxare, qaỹa'maxarenta ỹalegougui na Israel llaalqaipi quiyim ỹovita qanqouagaxainot ñi qara'gaxala'.

₉Ca ma' ỹovita quiyim qamiri nalauachii'e' ca npa'guenaxauahi, ca qamiri 'ue ca nco'matqari quena no'ueenaxa, ỹaatqajam reuogoxoỹa'pegue' quiyim qaica ca ỹo'uet ca se no'uen. ₁₀No'm 'ue caqamiri ca 'ec napio'o da no'ueenataxac quiyim se nauate ca nac queca pe quena lagueleteripi, ca 'maxaraic quiyim ca'maxare ca'e ca loma' na ỹalliripi, ca' se ỹoviro quecá'ogue ca na'xa'a. ₁₁Ca ma' mashic avit, ca ca'maxare ỹaatqajam nquiỹoota, ỹahote'e na huaxaỹaq. Ca ma' inoxonñi aca ra'aasa, ca ca'maxare lotqai pila'a ca co'matqa'.

₁₂Ca' ỹaatqajam qaỹa'ue ca naguelet loma', qam qoỹoqote'oga nqohin queca co'matqa'. ₁₃Queca no'goxonqateripi, ca' ỹalequeta'guit nqohin ca shichiguit, qaiyi quiyim qaiuet ca naguelet, ca' qani'ỹaguiñi aca lahi'. Ca ma' ime, ca' qaỹapolec quena 'laua ca naguelet. ₁₄Ma' ñi ra'gaxalari qota'olec ỹalequetauguilo qamiri quena nco'matqari, quepaqataxanteguelgoto qamiri, chaqai ỹo'uet quiyim qadoxoñiguii ca npa'guenaxauahi. Ca' vichiguiño' cá'maq nco'matqari ỹaatqajam co'teeta nqai'ñii, qaiyi ñi qota'olec qaica ca iuana se no'uen queca'maxare, ma' no'me', ca' noỹootec caqamiri.

₁₅No'm 'ue ca na'ac 'eetapeguem ca na'co', ca' rashiilaxan quiyim na'ñi ca ra'aari, ca' sqo pilaxachim cá'maq shi'gue na'co'. ₁₆Ta'ta'a quiyim 'xañitac quiyim nauguilo qamiri, ca' ỹoiquentac quiyim na'ñi cá'maq nqo'ta na'a'. 'Neeto' 'ue ca ỹoqocatac.