Deuteronomio 31

₁Ca' so Moisés lotqai liỹa retaqaugui sá'ogue so llaalqaipi so Israel, 'naacsa':

₂—Ỹim mashic sovite' yaua ciento veinte ñaxari, chaqai tot qaica ca iquesaxanaxa quiyim 'xoic ca ỹouoxoc. Chaqai ñi qara'gaxala' mashic 'naac quiyim se sapacta so lachiugue Jordán. ₃Qam ñi qara'gaxala', ñí'maq qota'olec caqamiri, 'auetauec ma'le caqamiri, chaqai nalauajñi ná'ogue na qomyipi quecá'maq loxoỹa'gue, qaiyi shichii ñiỹalec yí'maq na'laua. Ca' ñi Josué chaqaiñi ñí'maq 'auetauec ma'le quiyim ra'gaxalari, ma' chaqaida dá'maq 'naac ñi qara'gaxala'. ₄Ñi qara'gaxala' 'ne'tegue ma'le quená'ogue na qomyipi dá'maq 'ne'tegue na'le queso nashi Sehón chaqai queso Og, sauá'maq lashil so amorreoipi, chaqai nimiichiguiñi nqai'en só'maq na'aateripi queso na'laua. ₅Ca ma' ñi qara'gaxala' ỹo'uet quiyim qadoxoñiguii ná'ogue na ỹoreta'oguit qomyipi, ca' qamiri 'ñii'tegue na'maxare cá'ogue cá'maq shinac quiyim 'ñii'tegue. ₆Ca' 'ñaxachiguilo naua qavilyi, totaxan ro'chii, chaqai se ro'daxachiuec ma' loxoita'guit ca npa'guenaxauahi. Ma' ñí'maq na'gaxala' ñí'maq qota'olec caqamiri ỹalequetauguilo qamiri, se ralachii, chaqai se ro'ueenaxachitañi.

₇Ca na' ime, ca' so Moisés roỹaxana so Josué, ca' 'naapega, 'qaatac nqai'en sá'ogue so llaalqaipi so Israel:

—Na'ñaxachi', ma' qami' viqui' ma'le ná'ogue najo qomyipi, viquita ma'le yi 'laua yí'maq ñi qara'gaxala' nallitalta' na' ỹachaxantapeguema na'le saua 'auaxaqa qata'allii. Ca' qami' ná'maq icoñiguit nqai'ñi' ma'le quiyim naalec cajo 'laua. ₈Ca ñí'maq qara'gaxala' chaqaiñi ñí'maq 'auetauec ma'le caqami' chaqai riỹa'isac, se ralachi' chaqai se loỹoote'oga qami'. Ca' vichiguiño' totaxan ro'chi'i' chaqai se ileuetapigui qavilli'.