Ná'ogue ná'maq qaiuana qaica ca 'negue
1-2Nauajo nauá'maq la'qaatqa so netaxaỹaq, llaalec so David, nashi na'le quiyi Jerusalén.
¡Na qaiuana qaica ca 'negue, qaica ca 'negue!
¡Ná'ogue qaica ca 'negue!
3¿Nega'ỹo' cá'maq naqat ca ỹale
quiyim paguelec ca lo'ueenataxanaxac quenajo 'laua?
4'Ue na ne'qaañi, chaqai na liỹa ileu,
qam na 'laua qaica ma' nadalaxat quet.
5Nenoxonshiguim añi ra'aasa chaqai inoxonñi,
chita'gue lotqai pilli'ñi ca loma',
ca lotqai liỹa nenoxonshiguim.
6Na nonot taỹa'gue da 'guiñi,
ime, ca naqalgoxoñi lotqai taigue da rapiguim.
¡Naqalgoxoñi, lotqai rapil na nonot,
chaqai lotqai liỹa naqalgoxoñi!
7Na huaxaỹaq cana lachiugue taỹaxaso'ma aso huaaxai,
qam aso huaaxai se no'xa;
ca' lotqai pilegue dá'maq chicqa'gue ana lachiugue,
ca lotqai pile'tegue só'maq chaqai'en llic.
8Ca' qaica quet cá'maq ishit ỹa'xat
quiyim qaỹamaqa'que naua'que nauajo;
chaqai qaica quet cá'maq qaiuana chaqai cá'maq qara'xaỹaque
quiyim qaiyi ỹa'maxagui lauel ca qom.
9Qaica quet cá'maq sqai shi'gue 'ue;
qaica qaỹo'uet quiyim sqai shi'gue qaỹo'uet.
¡Qaica ca dalaxaic quenajo 'laua!
10Sqoue quiyim 'ue ca 'naac:
¡Najo maxasa' dalaxaic!
Qam so'maxare shi'co' quen 'ue
quesaua ñaxari na' saqa'lecaua qomi'.
11Qaicoua'ahi sauá'maq shi'co' quen 'vii,
chaqai qaicoua'ahi ma'le nauá'maq ñaqa naate'
quená'maq co'uaataxanta qomyipi ma'le.
Dá'maq ỹovirau'a ỹa'den só'maq netaxaỹaq
12Ỹim ná'maq ỹim netaxaỹaq, ỹim nashi quena Israel, sena'ñi na Jerusalén. 13Ca' ỹaatqajam ñomatalta' quiyim sa'ajan chaqai ñapaxaguina queda chi ỹa'deenaxanaxa ná'ogue ná'maq qaỹo'ueetetac quena 'laua. Ca' ¡chalego lecaic dá'maq ñi qota'olec illaalec na ỹalliripi, qaiyi nemanachit nqai'en na qomyipi! 14Ca' yitan quiyim ná'ogue ná'maq qaỹo'ueetetac quena 'laua, qaica quet cá'maq 'negue, 'ec qaỹahotaque neconecsec na nonot.
15¡Chaqai se qaishit qaỹalamaxat cá'maq chaqai'en namaq, chaqai quiyim qanaloqochin cá'maq sqaica!
16-17Ca' na'le, ca' ñanecalta', ca' shinac: 'Ena seuete'e, 'ec ỹim chalego lecaic ỹale, paguec ỹa'deenaxanaxa quesá'ogue só'maq 'au nashillipi quena Jerusalén; ỹaatqajam ñomatalta' ñañaañiguit da na'deenec chaqai na'deenataxanaxac chaqai da hualoxonqaishic chaqai da mogollishic, qam qaidaata quiyim yitan quiyim dajo 'ec cá'maq ỹahotaque nollaañi ca nonot. 18Dá'maq quiyim paguec da na'deenaxanaxa, ca' paguec ca nedaxac; chaqai no'm paguec na qaỹa'den, paguec ca ne'xoric.
