1Na'le, ca' lotqai ñanecalta', ca' shinac: Hua' nagui, ca' se'guen na nishiquiaxac. ¡Qam vire'ta da'maxare qaica ca 'negue! 2Ca' sa'den quiyim da naỹalliguiric hualoxonqaishic chaqai da nqo'iitaxanqachic qaica ca 'negue.
3Ca quedá'maq ỹa'deenataxanaxac quiichigui nqaishin da na'deenaxanaxa, sahotaque se'guen da lo'ueenataxanaxac na lataxa. Ca' lotqai yimelec ñi'et, ma' sahotaque sa'den quiyim chaqaido' dá'maq paguec la'maxa queca qom quenaua na'xatarolqai' quiyim ñaq ỹouootegueri' quena 'laua.
4Ca' chalego lecaic ná'maq so'uet; ño'xoñishiguim caua iuooto' leta'al, chaqai so'ueete' ỹanaxanqate' 'uva lomaate'. 5Ñasauec cá'maq chaqai ỹanaxanqa' chaqai loma' ana ỹanecse 'ue lenoỹaxai, chaqai ỹaleque'ejta' ana ỹanecse qo'paq na'ic ana la. 6Ca so'ueete' naua ni'ỹaqa huaxaỹaq lahiri, sauaaque leletqate ana qo'paq ỹanecse; 7chaqai seshiujnaxanque na ilaatqaipi chaqai ana ilaatallipi, chaqai 'ue na ne'xaỹa'ñi yi ỹa'a'; chaqai 'ue ana ilo huaca chaqai qagreta, ỹapacauec aso ilo queso 'auaxaic nashillipi quena Jerusalén. 8Chaqai 'vii naua ỹapoonqa quena 'oro chaqai quena plata ná'maq no'uen louenqaipi na'le na liỹa nashillipi quenaua liỹa' 'lauari. Chaqai 'ue na ỹo'ueenaxanqajanqaipi chaqai ana ỹo'ueenaxanqajnallipi chaqai da lamaanaxanqachic na la'at, ca' 'xoic ana 'aalo iloxoỹaxanata.
9Ỹaatqajam ỹim choxoraic chaqai vire'ta sapacauec quesá'ogue só'maq 'auaxaiquipi caỹim quiyi Jerusalén. Qam quedá'maq dajo se na'laañi da na'deenaxanaxa caỹim. 10Se ỹauanapega quiyim sqai shigue'uegue ca ishoxo; se ỹauanapega quiyim se salequetaho queca nemaqachic. Ỹaatqajam ñitoon quedá'ogue dá'maq ỹo'ueenataxanaxac, ca' dajo ñitoonaxac, da'maxare chi ñishiue'.
11Ime, ca' sa'ajan dá'maq chi ỹo'ueenataxanaxac, chaqai dá'maq idaxac na' so'ueetetac. Ca na'le, ca' yitan quiyim ná'ogue qaica quet cá'maq 'negue, 'ec sahotaque iconecsec na nonot, chaqai quiyim qaica quet cá'maq 'negue quenajo 'laua.
12Ime, ca' sa'deenataxantac ñaloqojontecta' da na'deenaxanaxa chaqai quecá'maq qaica ca ỹa'den: Ma' ime quiyim ỹim nashi, ca' ¿nega'ỹo' cá'maq ỹo'uet ma'le cá'maq dalaxaic nashi?, ta'ta'a dá'maq shi'gue imeetari'. 13Ca' sanata quiyim paguec 'ue ca 'negue da na'deenec quedá'maq quiyim qaica ca qaỹa'den, 'ec dá'maq quiyim paguec la'maxa ca richiichiguiñi queca napalaxa.
14Cá'maq 'ue ca ỹa'den ỹouene' naua nqote', qam cá'maq qaica ca ỹa'den queetapougui na napalaxa. Qam na' ime, ca' yitan, ca' sa'den quiyim dá'ogue dá'maq taỹa'gue. 15Ca' shinac: Dá'maq taỹa'gue ná'maq qaica ca ỹa'den, qai'neeta saỹa'gue; ca' qaica quet cá'maq 'negue quiyim 'xoic ca ỹa'deenaxanaxa. Ca ¡vire'ta dajo qaica quet cá'maq 'negue! 16Ma' qaica ma' qaỹo'leentetaque quet cá'maq 'ue ca ỹa'den chaqai cá'maq qaica ca ỹa'den; ma', ma' ncopa, ca' ná'ogue qaỹa'laxate cá'maq 'deenaxanqachaqaic chaqai cá'maq qaica ca ỹa'den. ¡Caua'que ileue'!
17Vire'ta se yqo'ta dá'maq chi ñachaalataxac, ma' ná'ogue ná'maq qaỹo'uet quenajo 'laua ná'ogue se no'uen caỹim. Ỹaatqajam ná'ogue qaica quet cá'maq 'negue, ¡'ec qaỹahotaque neconecsec na nonot! 18Vire'ta se yqo'ta qai'neeta ná'maq ime ỹo'ueenatec quena 'laua, ma' ná'ogue taỹot ma'le cá'maq renoto quiyim nashi. 19Qam 'oonoqui' dá'maq 'neeta ỹaatqajam 'chiichiguiñi: quiyim ca'maxare, 'deenaxanqachaqaic loqo'm qaica ca ỹa'den, qam taỹot ma'le ná'ogue ná'maq chalego idaxac chaqai ỹa'deenaxanaxa quiyim ỹoviralec somat quena 'laua. ¡Ca' dajo qai'neeta qaica quet cá'maq 'negue!
20Na' sa'ajan ná'maq shi'gue ỹo'ueenatec quenajo 'laua, ca' ñitogot na'le quiyim 'xoic da ỹo'ueenataxanaxac, 21ma' mashic 'ue ná'maq ỹomatalec da la'deenaxanaxa chaqai da lquesaxanaxa quená'maq ỹo'uet, ca' ỹaanot cá'maq se ro'ueenataxan, ca' dá'ogue ỹomatalec ca'maxare. ¡Ca' dajo qai'neeta quiyim qaica quet cá'maq 'negue chaqai ỹaatqajam se no'uen!
22Ca' quedajo, ca' ¿negue' quet cá'maq naqat ca qom quiyim 'xoic ca lo'ueenataxanaxac chaqai quiyim 'xoic ca leuogoxo quena 'laua? 23'Xoic da le'xoric queda nachaalataxac, ỹaatqajam qaica ca lo'daqa'; vire'ta quiyi pe se nco'majñi, ra'deenataxantac. ¡Ca' dajo qai'neeta qaica ca 'negue!
24Dá'maq paguec loyac quiyim ỹo'uet ca qom 'neetasa': que'e chaqai ne'et, chaqai ỹouen cá'maq laseue' da lo'ueenataxanaxac, ma' sanata quiyim dajo qai'neeta chicqo'ot ñi qota'olec. 25Ma' ¿negue' quet cá'maq ishit que'e, loqo'm netoontac, no'm mesqaiñi ñi'maxare ỹo'uet? 26Llic quiyim ñi qota'olec ỹa'ue da na'deenaxanaxa chaqai da toonaxac quecá'maq nqo'ta ñi'maxare; qam cá'maq 'ue ca lasauaxaset, ca' iỹoxolec quiyim nqo'neuec chaqai lapoonñi na lesallaxa, ime, ca' ỹaanem cá'maq nqo'ta. ¡Qam qai'neeta dajo qaica ca 'negue chaqai 'ec qaỹahotaque neconecsec na nonot!
