Eclesiastés 9

₁Ca ná'ogue ỹaatqajam ñapaxaguina, ca sa'den quiyim dá'maq lo'ueenataxanaxac na huagaxaraiquipi chaqai na 'deenaxanqachaqaiquipi ỹoiquentac ñi qota'olec. Na qom se ỹa'den da ne'xorenataxanaxa chaqai da neuelgaxanaxac, 'eno'm richa'am re'qoota. ₂Ma' ná'ogue, cá'ogue cá'maq taỹa'ñi lqodoc: ná'maq huagaxaraic chaqai na sqai huagaxaraic, ná'maq sqai nocqaic chaqai na nocqaic, ná'maq 'maxataxaraic chaqai na sqai 'maxataxaraic, ná'maq ỹaano ca lachitaxanataxanaxat chaqai ná'maq sqai ỹaano; dá'ogue dá'maq 'neete' ma'le ca huagaxaraic chaqai ca sauaqhuaic, cá'maq nallitalta' ỹaanec ca la'qaatec chaqai cá'maq sqai ỹaanec ca la'qaatec.

₃Dajo dá'maq se no'uen quená'ogue ná'maq 'ue quena 'laua: ná'ogue qaidaata dá'maq taỹa'gue. Chaqai da liỹa quiyim da la'deenataxanaxac na qom no'qaachigui quena se no'uen; queeta'pegue' dá'maq quiyim qaica ca ỹa'den quedá'ogue da nachaalataxac; ca quena' ncopa, ca' ¡ỹovita yi napalyipi!

₄Paguec da naquitaxac cá'maq ñaq nca'leetauec, ma' paguec la'maxa ca pioq nca'leetauec queca sauaxaic leta'a leuaxaic. ₅Ma' ná'maq nca'leetauec ỹa'den quiyim ileu ma'le, qam ná'maq mashic ileu qaica quet cá'maq ỹa'den chaqai se rauegaxan, ma' qaỹa'laxate. ₆Quiyi, ca' lqodoc da le'xorenataxanaxa, da lauelgaxanaxac, chaqai da le'xoric, chaqai tot qaiconape'oga quecá'maq qaỹo'uet quena 'laua.

₇Cha'regue, quirelec da rqui'ỹaxaqui' quena pan, chaqai ni'chi' quena lataxa, ma' ñi qota'olec nqo'ta da ro'ueenataxanaxaqui'. ₈Se neme ñi'segueñi na nooỹac lalagaxaic, chaqai vite ca lishilaxat na rqahiqui'. ₉Chita'gue lotqai 'viichi' cá'maq vi'saque cacá'maq rqo'chita 'aalo, queda nachaalataxaqui' qaica cá'maq leloxoỹaxac ỹaañiraxarom ñi qota'olec quena 'laua; ma' chaqaidaata dá'maq naqachi' ma'le quedá'ogue dá'maq ro'ueenataxanaxaqui' quena 'laua. ₁₀Chaqai quecá'maq ralo'isalec quiyim 'viichi', ca' ỹaatqajam qamaxachite'; ma' cañi napal lahi' añí'maq i'sa'ñigui, qaica cá'maq qaỹo'uet chaqai qaica ca na'deenataxanaxac, ca na'deenec chaqai ca na'deenaxanaxa.