Lapoonta' qomi' so Espíritu Santo
1Ca' vichiguiño' saqatalo qamiri quiyim na'maxachita ma' mashic qaroỹaxanalo qamiri quiñi qota'a, ma' qaycoñiretari', sasouetapigui so qara'gaxala'. 2Ca' qamiri neneequesenaxaqa, chaqai 'naxanaxaraqa, chaqai qamiri hualaqhuaqa, chaqai quiñi 'óna caqamiri i'xoren ca liỹa no'm 'ue canchaqaica. 3Nquipichiỹa'pegue' quiyim se neme lapohitagui da lotaanaxanaxac so Espíritu Santo, chicqochigui nqai'ñii da ra'maxahi dá'maq lapoota'ta' nqai'ne' qamiri. 4'Ue so 'oonoqui' noshicmaxa lapohitagui, chaqai 'oonoqui' so Espíritu Santo. Ca' qai'neeta roỹaxanalo qamiri ñi qota'a, qaiyi 'oonoqui' ca naquitaxaguii. 5'Ue so 'oonoqui' qara'gaxala', 'oonoqui' da npi'ỹaxac, 'oonoqui' da chilaxac, 6'oonoqui' ñi qota'a ñí'maq leta'a ná'ogue. Ñi'maxare ỹomatalec ná'ogue najo, chaqai ro'ueenataxantapouguilo qomá'ogue, chaqai qomá'ogue ỹalequetauguilo.
7Qam quiñi 'óna coqomi' 'maxaraic nqohin yí'maq laloqo' quiyim ro'ueenataxan cá'maq qoỹaanem, qanaloqojontagui cá'maq laloqo' nqai'en so Cristo. 8Vichiguiño' naua naneresañi na'qaatqa 'neracsa':
So'maxare taigue da piguim, i'xateta sá'ogue so lcoñiitecseripi.
Ca' ỹa'ue na ỹaanem quiyim ro'ueenataxana na qomyipi.
9Ca ¿negue' cá'maq reloqo'tegue cá'maq 'naac dá'maq “taashiguim queda piguim”? Dajo 'naac so'maxare nenojño' na'le quenajo paguec pa'aañi quena 'laua. 10Ca só'maq nenojño' na'le, ca' chaqaiso só'maq taigue da pa'aashiguim quena piguim, qaiyi ỹomata'ta' ná'ogue nanchaqaina. 11Ca' ỹa'ue na ỹaanem quiñi 'óna, 'ue na ỹaanem quiyim lelaatec so'maxare, chaqai 'ue na letaxaỹaxaquiripi nqai'en ñi qota'a, chaqai na liỹa ca' ỹa'xatetac da na'qaatec chicqaugui da nca'laxa, chaqai 'ue ná'maq la'gaxala' ná'maq mashic icoñiguit da na'qaatec, chaqai na napaxaguinataxanaq. 12Ca' chaqaida 'ne'teco' na' ỹa'maxatetegueñi ná'maq lalamaxareteripi na' ỹahotaque quiyim ỹo'ueenataxanaxan, qaiyi noquiiguec na lalamaxareteripi so Cristo, 13chi ỹovireto'o' ma' qomá'ogue lapoỹata' da qarpi'ỹaxac chaqai quiyim sa'deenqata so llaalec ñi qota'a. Ca shinqatari' ca mashic ỹi, vire'to' ma' 'ec qaraloxoua so Cristo. 14Ca' totqai 'ec qomi' ñaalqolqai' quiyim chaqa'ma' ỹashaxanec ca la'deenataxanaxac, ca 'ec qaỹamaqata queca nonot quecanchaqai dalaxaic napaxaguinataxanaxac, vire'to' ma' qanaqajñi quená'maq 'ue da lco'ỹaxaric qomyipi ma' ỹahotaque so'maqac. 15Ta'ta'a quiyim sa'xatqatac ca lliqueta quedá'maq leloxoỹaxac ca ne'xorenataxanaxa, qolqatalec quiyim ñaqtetauec ná'ogue nanchaqaina quiyim ña'daqatau'a so Cristo ma' chaqaiso só'maq lqahic na noshicmaxa, qam sojo noshicmaxa chaqainaua nauá'maq qomi'. 16Ca' chaqaiso so Cristo só'maq 'em quiyim ná'ogue ná'maq noshicmaxa ỹaatqajam npataqa'ajta' chaqai inoque'ejta' chicqochigui quiyim ỹaatqajam necone'ejta' ná'ogue na louenqaipi; ca no'm 'maxaraic dá'maq 'neetari' cá'maq louenec, ca ná'ogue ñaqtetauec chaqai noquiiquetashiguim queda ne'xorenataxanaxa.
Dá'maq dalaxaic nachaalataxac ná'maq queeta'pegue' so Cristo
17Ma' ỹim ña'deetau'a so qara'gaxala', ca' 'ue da shinac chaqai saqatalo qamiri quiyim totqai 'ñiita dá'maq 'neetari' ná'maq saqa' ỹauanapega ñi qota'a, ma' na'maxare queeta'pegue' ná'maq qaica ca 'negue chi la'deenataxanaxac, 18ca' 'ec palac da la'deenaxanaxa. Na'maxare sqai hueeto'ot da chaalataxac chicqo'ot ñi qota'a, ma' sqaica ca ỹa'den sauaxat da la'ñaxac añi le'taxanata. 19Ca na'maxare ỹaatqajam mashic tot qaica ca layiloxo, ca que'uegue da lamaanaxanqachic, chaqai nqo'ta quiyim ỹo'ueetetac ná'ogue nanchaqaina rapio'qotaxan. 20Qam qamiri se napaxaguinataxaguii na'le dajo quiyim quiita'pegue' so Cristo, 21no'm ỹaatqajam 'xaichigui dá'maq na'qaatec na'le queso'maxare, chaqai qaỹapaxaguinque qamiri so'maxare quiyim nachiñi'chiguit nqohin dá'maq lliqueta chicqo'ot so Jesús. 22Ca quedá'maq shi'gue 'ñiitari' quen, ca' lachii só'maq 'auaxaic no'ueenataxaguii ma' se ỹa'maxañi, chaqai qaỹachichiguiñi, ma' queeta'pegue' da lamaanaxanqachic quena se no'uen. 23Ta'ta'a quiyim dalaxachii da no'ueenataxaguii chaqai da ra'deenataxanaxaguii, 24ca' ñiiñi dá'maq dalaxaic chaalataxac dá'maq ỹaatqajam chicqochigui da lo'ueenataxanaxac ñi qota'a, dá'maq ichoxot dá'maq ỹaatqajam 'maxaraic 'ueenataxac chaqai co'teeta.
25Ca' vichiguiño' nagui 'xañiñi ca na'majnaxaguii. Ca' quiñi 'óna ỹaatqajam lliqueta cá'maq ỹa'xat queca liỹa, ma' qomá'ogue 'ec ña'daqatau'a so 'oonoqui' noshicmaxa.
26Chaqai no'm 'ue ca ro'o, qam se ỹa'ue ca lasauaxaset; chaqai cajo lonogoxonaxac sqai queugui nqai'en cá'ogue ca na'xa'a. 27Ỹaatqajam qaica ca lligo nqai'ñii so na'ỹaapec.
28Cá'maq rocachitaco' quen, ca' 'maxaraic ỹaxanñi da locataxac; ta'ta'a quiyim ro'ueenataxan, qaiyi ishit ỹotauan cá'maq 'ue ca louenaxanaxa.
29Sqai 'xachii' naua se no'viiñi na'qaatqa, ta'ta'a quiyim no'ueenaxachii' naua ra'qaataxahi, qaiyi noquiicshiguim nqai'en chaqai ỹa'ue ca la'maxa cá'maq na'xaỹaxantapegalo qamiri. 30'Neeto' lotqai rachico nqai'ñii ñi Espíritu Santo chicqo'ot ñi qota'a. Ma' quiñijo Espíritu chicqochigui quiyim qaitane' qamiri, qaiyi qamiri lalamaxarete' ñi qota'a, chi ỹovireto'o' cá'maq na'xa'a quiyim ñi'maxare ỹaanema qamiri cá'maq ỹaatqajam naloochiguiñi nca'laxa.
31Ca 'xañiñi dá'ogue da roquiiaxahi queca riỹahi, ná'ogue na nonogoxonaxac, chaqai quiyim ỹaualqatalec ca liỹa, loqo'm rishiuenaxantac, chaqai quiyim queetapegueu'a ca liỹa, chaqai ná'ogue na se no'uen 'xañiñi. 32Ta'ta'a quiyim qamiri 'xorenataxanaxaiqa chaqai huagaxaraqa. Ca' quiñi 'óna i'xoren ca liỹa quiyim 'ue ca lasauaxaset, 'nejem dá'maq 'ne'tegue na'le ñi qota'a na' i'xorene' qamiri chicqochigui nqai'en so Cristo.
