Ester 3

₁Ca co'na' mashic shi'gom quedajo, ca' so nashi Asuero nqo'naxajshiguim queda lo'ueenataxanaxac so Amán, só'maq llaalec so Hamedata, so'maxare chigoxougui so Agag. Ca' so Amán qoỹanagui quiyim la'gaxala' na nashillipi. ₂Ca ná'ogue na ro'ueenataxantacot so nashi quená'maq hueeta'ñi yi la'a', ca na'maxare ỹa'chi'iñi naua le'cootal, ca ỹoviraqta'guit na latap na 'laua chaqai nanaxañi na lqahic quena' qoyique'tot queso Amán chaqai quena' qareloqota'guit, ma' chi lelaataxanaxac so nashi. Qam so Mardoqueo se na'xaỹaxana dajo na'qaatec.

₃Ca co'na'le, ca' so lotauaripi so nashi inato' so Mardoqueo chi'negue ma' se na'xaỹaxana da la'qaatec so nashi. ₄Chaqai quesaua'que saua na'xata' qaidaata qainateta'pegue, qam so'maxare se na'xaỹaxan. Ca co'na'le, ca' qara'qaataxana so Amán, sha'apiguito' so Mardoqueo ipaquichigui nqai'en da la'qaatec, ma' so'maxare shi'co' 'naac quesaua'maxare quiyim judío le'ec. ₅Ca co'na' so Amán ỹaatqajam ỹa'deenta quiyim so Mardoqueo se ỹa'dooto naua le'cootal so'maxare chaqai se nanaxañi nqai'en na lqahic, ca so Amán ỹaatqajam ro'o. ₆Ca ma' mashic shi'gue qaỹa'xatem ná'maq lauo' laseripi chigoxougui so Mardoqueo, ca' se ỹa'maxañi nqai'en quiyim qaisoota qaỹa'ue ca nouaxanaxaset. Ca' idaanaque ca la'maqa' quiyim sá'ogue so judioipi qanomachichiguiñi quená'maq hueetalec da lquesaxanaxa so nashi Asuero.

₇Ca quesó'maq 'auaxaic shiraigo leenaxat Nisán queso ñaaxa na' ỹovite' doce ñaxari quiyim nashi so Asuero, ca' qaỹa'ue so llitaxac na' reloqotaho so Amán, qaiyi qaỹa'ue ca naloqojnec queca na'xa'a chaqai queca shiraigo quiyim ipaguigui nqohin so 'maqataxac. Ca so'maxare taachigui so na'xa'a trece queso shiraigo Adar só'maq pa'aatec shiraigo queso ñaaxa. ₈Ca' so Amán 'naaco' queso nashi Asuero:

—Quiyim quená'ogue na na'aateripi quená'maq 'lauari hueeto'oto da rquesaxanaxa'e', qami' qarashi, ma' 'ue na noỹootetapeguec quena liỹaripi quená'maq se nachiñiguita naua loico na liỹaripi chaqai na'maxare se na'xaỹaxana da ra'qaachiqui'. Ca se ỹa'maxañi quiyim najo qomyipi ỹalequetaho queda ro'ueenataxanaxaqui' quiyim qami' nashi. ₉Ca' qami' qarashi, no'm 'maxariñite', ca' 'ỹaañiro ca ra'qaachiqui' quiyim qanalauajñi. Ca' ỹim saanec quena nashillipi rotauachi'ipi ca trescientos treinta mil kilos na lecat leenaxat plata taỹaugui nqaishin añi qadami' lahi'.

₁₀Ca co'na'le, ca' so nashi naqate'e aso lichicshaqate, ca' ỹaanem so Amán só'maq npa'guenaxaua na judioipi. ₁₁Ca 'naaco' queso'maxare:

—Chaqai hueeto'ot qami' ma'le acajo plata, qam quenajo qomyipi 'viiquiñi'sac quecá'maq 'ñi'sa'gue.

₁₂Ca na' ỹovire'oga so na'xa'a trece queso 'auaxaic shiraigo queso ñaaxa, ca qaroỹaxane'oga so leraxanqajanqaipi so nashi, ca' ỹiriñi dá'maq la'qaatec so Amán, ca' qailata na nashillipi reloqota'alo naua liỹa' 'lauari qoỹeretalec nauá'maq chi la'qaatqa ná'maq qomyipi reloqota'a chaqai hueetalec da leenaxat so nashi Asuero chaqai qaỹotocqotañi aso letanaxanqate so lashi na nashillipi. ₁₃Ca' ỹodo nqohin na lere lo'ollipi quiyim ỹoda'alo naua 'lauari quiyí'maq reloqota'a so nashi. Ca' ana lerellipi hueetalec quiyim qanomachichiguiñi qanalauajñi queca 'oonoqui' na'xa'a na judioipi, 'eno'm ne'necoqui', loqo'm qo'xoiquipi, ñaaqaipioqui', loqo'm 'aallipi. Chaqai qarouootaxana'gue na louenqaipi. Ca' so na'xa'a naloqojnec chaqaiso so na'xa'a trece queso pa'aatec shiraigo queso ñaaxa só'maq leenaxat Adar. ₁₄Ca' so na'qaatec qanaqajshiguim quiyim nelaataxanaxac, chaqai qailatalo naua 'lauari chaqai naua na'aate', qaiyi ná'ogue na qomyipi na'maxatetañi ma' ỹovire'oga cajo na'xa'a. ₁₅Ca' so lere lo'ollipi chaqa'ma' taate'ogalo ma' chi la'qaatec so nashi. Ca' so na'qaatec chicqochi'ñi yi Susa na' qaỹa'xat. Ca' so nashi chaqai so Amán co'na' ñaq nqa'aamsañi ne'teeta'pe, ca ná'maq neeta'ñi yi Susa ỹaatqajam se ỹa'den ca 'neeta.