Ester 5

₁Ca co'na' ỹovirerec saua tres na'xata', ca aso Ester ỹañiñi saua loho nashi loho, ca eec inoxonou'a yi nasoxoc so nashi. Ca co'na' ỹovira'a, ca' hua'e quiyi naloote'oga yi nqa'xanqa' so'maxare ma' naloote'oga so lasom. ₂Ca co'na' so nashi iuante'oga aso nashi Ester quiyi nasoxoc, ca pe'eeta, ca' ỹaane'oga aso'maxare so lashile' 'oro lo'qoota'a queda lqai'laxat. Ca' aso Ester nqo'neuo, ca icoñiguit da lo'lo so nashile'. ₃Ca' so nashi inat aso'maxare:

—¿Negue' ca 'ñi'sa'pegue, qami' nashi Ester? ¿Negue' ca vi'saque? Ca ¡'eno'm shiilaxañitegue na lavinñi na seloqota'a 'lauaripi, qaiyiita saañiraxarom!

Ca' aso Ester 'naaco':

₄—No'm 'maxariñite' qami' qarashi, ca ñi'xoresene'tot qami' quiyim lliquesaho ma'le' queca nqui'ỹaxac sahotaque quiyim qaremaqachiñi', ca ỹalequetaho nqai'ñi' ca Amán.

Ca co'na'le, ca' so nashi relaataxan:

₅—Chaqa'ma' quihe'oga ca Amán, qaiyi ipaquichigui dá'maq ỹahotaque ada nashi Ester.

Ca' chaqaida 'neeta, ca' so nashi chaqai so Amán que' querepegue' ca nqui'ỹaxac ỹa'maxatetañi aso nashi. ₆Ca co'na' queso nqui'ỹaxac, ca' so nashi 'naaco' caso nashi Ester:

—¡Cá'maq vi'saque, ca' yashiila'e', ca' ỹim saañiraxarom, 'eno'm na lavinñi naua 'lauari seloqota'alo!

₇Ca' aso Ester 'naaco' queso'maxare:

—Qaicaata sahotaque chaqai sashiilaxanaque dajo: ₈No'm qami' qarashi 'ue ca rqo'iichi'i' caỹim, chaqai vi'saque 'viichi' cá'maq sahotaque, chaqai quiyim 'viichi' cá'maq sashiilaxanaque, ca lliquisaho' nete'e riỹa'isac ñi Amán queca liỹa nqui'ỹaxac sa'maxatetañi quiyim qaremaqachiñi'. Ca ma'le, ca' so'uet cá'maq shiilaxañisaque, qami' qarashi.

₉Ca' so Amán na' pil ime so lqui'ỹaxac ỹaatqajam ỹa'maqachigui lauel chaqai netoontac. Qam ỹaatqajam ro'o na' iuane'ta so Mardoqueo hueeta'ñi ñi lasom, se ne'laxashiguim chaqai se redaỹac na' que'tegueyi so'maxare. ₁₀Qam so Amán se ichoxoteta da lauel queso'maxare, qam na' ỹovirec queca la'a', ca roỹaxane'ogalo saua nauochaxaua' chaqai aso loua Zeres. ₁₁Ca' retaqatecto ỹa'xatetac da lesallaxa, chaqai quiyim 'xoic na llaalqaipi, chaqai quiyim so nashi ỹapacqajnauec quesá'ogue so liỹaripi so'maxare, chaqai ỹaanem yi paguec lecaic loma' ỹapacauec nqai'en quena liỹa lotauaripi so nashi. ₁₂Chaqai qai'neeta 'naaco':

—Chaqai qaỹimeta ỹa'ue ỹa'xaỹaxac añi nashi Ester quiyim salequetau'a ca lqui'ỹaxac ỹo'uet queso na'xa'a lavinñi, chaqai lotqai ỹahotaque salequetau'a ca liỹa lqui'ỹaxac quiyim qaimaqachin ñi qarashi nete'e. ₁₃Qam quena' seuana so judío le'ec Mardoqueo nqa'xantañi quiñi lasom ñi nashi lauo' 'imec lodegaxat, ca ná'ogue najo sa'xatetac qaica ca 'negue nqaishin.

₁₄Ca' aso loua chaqai so nauochaxauaripi 'neraco' queso'maxare:

—Laataxañirelec quet quiyim qaỹa'yiñi aca qo'paq veintidos metros da ladogaxa nqai'ñi', qaiyi qaicoñishi'megue. Ca ma' nete'e nete'eta, ca shiila'e' ñi qarashi, qaiyi qaicoñishi'megue ca Mardoqueo, qaiyi ma' riỹa'isac ca nashi quirepegue' ca nqui'ỹaxac qaica ca huapigui qavilli'.

Ca' dajo na'qaatec ỹaatqajam ỹa'maxarenta so Amán, ca relaataxanlec quiyim qaỹo'uet aso ncoñiitaxanaxalate.