Qaỹalauat so Amán
1Ca' so nashi chaqai so Amán niỹareta'pe querepegue' ca nqui'ỹaxac. 2Ca' queso liỹa na'xa'a qaiyiita so nashi 'naac caso Ester na' ñaqai que'eetac:
—¡Viraque cá'maq shiilaxañiraque, ca' ỹim saañiraxarom, 'eno'm shiilaxañitque na lavinñi naua 'lauari seloqota'alo!
3Ca' aso Ester 'naaco':
—No'm rqo'chiriua', qami' qarashi, chaqai quiyim 'maxariñite', ỹim qaidaatoqui' sahotaque chaqai sashiila'e' qami' qarashi quiyim se yalauachi' chaqai na iuo' laseripi. 4Ma' ỹim chaqai na iuo' laseripi qaimeene' qomi', qaiyi qanalauachiñi qomi'. Qaica nqai 'negue queta' qaimeene' quiyim na'aqa qomi', ca' yi'maqata queta'le, ma' na qanpa'guenaxaua se noquiiguiñi nqai'en da resallaxa'e' qami' qarashi.
5Co'na'le, ca' so nashi Asuero renataxano' 'naaco':
—¿Negue' cá'maq ỹahotaco' ỹo'uet dajo? chaqai ¿negue' ca hueeta'gue ca'maxare?
6Ca' aso Ester 'naaco':
—¡Ñí'maq pa'guenaxantac chaqai rasauaqataxantac, chaqaiñi ñijo hualoxonaq Amán!
Ca co'na' 'xaỹa dajo so Amán, ca' se ra'ñiigue queda lqolonaxa reloqoto'oto so nashi Asuero chaqai aso nashi Ester. 7Ca' so nashi Asuero chalego lauel, ca' ne'laxatashiguim, ca chaqa'ma' ca'e ñí'maq 'imec nqui'ỹaxaqui, ca' quepegue' yi nashi lanaxanqa'. Qam so Amán na' retan quiyim so nashi ỹahotaque quiyim qaỹalauat, ca so'maxare no'ueenaugui so nqui'ỹaxaqui, ma' ỹahotaque quiyim ne'xoresene'tot aso nashi Ester quiyim se qaỹalauat. 8-9Qam co'na' so nashi rapilo quiyi lanaxanqa', ca inoxonougui ñi 'imec nqui'ỹaxaqui, ca iuane'ta so Amán ỹa'deesañi le'cootal huaqatalec so qa'xanaxala' huaqatalec aso Ester. Ca 'naaco':
—'Aa, ¿qa' vi'saco' hualaxaiñi' ana nashi ya'ajnaxanaxañisac, chaqai quena ỹa'a'?
Ca na' 'naac dajo so nashi, ca saua lotaua' neloxoỹa' queso'maxare chaqa'ma' ỹapoorigui na lashic so Amán, ca' so 'óna quesaua'maxare leenaxat Harbona 'naaco':
—Quiyi la'a' na Amán 'ue ada ỹa'maqatañi ncoñiitaxanaxalate 'uo' ca veintidos metros da ladogaxa, ma' ñi'maxare relaataxanlec ỹahotaque qaicoñijshi'megue so Mardoqueo, só'maq chalego loyac nqai'en da ra'xaỹaxaqui' na'le, qami' qarashi.
—Cha'regue coñirishiguim ñi'maxare caca'maxare —'naaco' so nashi.
10Ca' chaqaida 'neeto' na'le so Amán na' qaicoñijshi'megue asó'maq chi ỹa'maxatetañi quiyim ỹahotaque coñijshi'megue so Mardoqueo. Ca' queda, ca tauco' so lauel so nashi.
