Éxodo 11

₁Ca' ñi qara'gaxala' 'naaco' queso Moisés:

—Qaiyiita so'uet ca nouaxanaxaset, taalec nqaishin ñi Faraón chaqai na Egipto laseripi. Ca ma' ime dajo, ca' ñi Faraón sqaidaata quiyim ỹasenterec qamiri quiyim oquii. Ta'ta'a quiyim chaqaiñi ñi'maxare ỹo'derauec ma'le qamiri quenajo. ₂Qam nagui 'ñirapega na ỹale chaqai ana 'aalo quena llaalqaipi so Israel quiyim rashiilaxanaque canchaqaica nouenec quena 'oro loqo'm na plata quena Egipto laseripi.

₃Ca' so qara'gaxala' ỹo'uet quiyim so Egipto laseripi 'naxanaxaraic queso Israel llaalqaipi. Chaqai qai'neeta só'maq lotauaripi so Faraón ỹaatqajam 'ue nqai'negue nqohin so Moisés, chaqai qai'neeta sá'ogue so Egipto laseripi.

₄Ca' so Moisés 'naaco' queso Faraón:

—'Neetasa' da la'qaatec ñi qara'gaxala': “Ma' lepe lauel, ca' shiguelec ná'ogue na Egipto. ₅Ca' ileu ma'le cá'maq ỹi ñaalec quecá'maq 'óna na'a' quena Egipto laseripi, vire'ta ñí'maq ỹi llaalec ñi Faraón ñí'maq mashic nqa'xanñigui añi nqa'xanaxaqui na nashi, vire'ta ná'maq la'auaxanec llaalec ana na'a ná'maq lo'o ana namaquinaxanaxaqui qa'. Chaqai ileu ná'maq 'auaxaic llaalec na iseripi. ₆Ca' quená'ogue na Egipto 'ue da naualaxac queda nqui'ic, dá'maq se ỹauanapega 'ue, chaqai qaica ma' liỹa quet 'ue.” ₇Qaiyi 'yiiñii qamiri quiyim ñi qara'gaxala' ỹa'den quiyim ỹoỹooteta'oga na Egipto laseripi quena Israel llaalqaipi, quiyim vire'ta ñaqai pioq quet ca itou'ga ca qom loqo'm ca isecỹac quena Israel llaalqaipi. ₈Ca ma'le, ca nacpegue' aỹim ná'ogue na rotauachi'ipi yashiila, ỹa'yiichiriñi naua le'cootal, ca 'naac: “Mohi, quii qami' chaqai ná'ogue ná'maq qauochi'. Queeta'pegue' qami'.” Qam no'm saqa' ỹovita dajo, ca' sqa shique'e najo.

Ca' so Moisés ỹaatqajam ro'o na' inoxonec quiñi lauo' so Faraón. ₉Ca na' ime, ca' ñi qara'gaxala' qota'olec 'naac queso Moisés:

—Ñi nashi Faraón se na'xaỹaxanalo qamiri ma'le, qaiyi paguec lecaic cá'maq so'uet ma'le quiyi Egipto.

₁₀Ca' so Moisés chaqai so Aarón ỹo'ueete' ná'ogue ná'maq se ỹauanapega, iuanchigui so nashi Faraón, qam ñi qara'gaxala' ỹa'ñaxachigui lauel nqai'en so'maxare, ca' so nashi sqai ỹaxanec quiyim ca'e yi Egipto so llaalqaipi so Israel.