Éxodo 12

₁Ca ñi qara'gaxala' retaxaỹa'pegueto saua Moisés chaqai so Aarón quiyi Egipto, 'naaco':

₂—Najo shiraigo chaqaina ná'maq ỹapacauec nqai'ñii qamiri, ná'maq 'auaxaic shiraigo quiyi ñaaxa. ₃Ca 'ñiỹapega ná'ogue na llaalqaipi so Israel, 'ñiỹaco': Ma' ỹovirerec naua diez na'xata' quenajo shiraigo, ca' quiñi 'óna 'imec caqamiri, ca cá'ogue cá'maq neeta'ñi ca na'a', ca ỹaconeu'a ca 'oonoqui' qagreta llaalec, loqo'm ca quetaqoqui'. ₄Qam no'm 'ue ca sqo vite' caua llaalqa, ca retan quiyim se qo'oc ca isecỹac, ca cá'maq paguec leseeque'ta queca la'a', ca nouante'e', imeentauec quecá'maq liỹorete' caua qomi', chaqai ỹaỹajanta cá'maq naloote'e' ỹa'ic quiñi 'óna. ₅Qam cajo isecỹac ỹovi' yi 'óna niñaaxa, chaqai ỹale, chaqai qaica ca natoc, qagreta loqo'm quetaqoqui'. ₆Ca' qaỹa'maxat cajo isecỹac, toco' ma' ỹovire'oga ca na'xa'a catorce quenajo shiraigo. Ca quecajo na'xa'a ná'ogue na Israel llaalqaipi lapoonta' na llaalqaipi, ca ma' mashic lavit, ca ỹalauat ca'maxare. ₇Ca ma' ime, ca' queca 'óna 'imec iconalo caua leuo' cajo qagreta llaalec, ca' ỹa'meene' naua'que naua lasomse' ca 'imec cá'maq hua'ñi na' ỹa'ic cajo qagreta llaalec. ₈Ca' quecajo pe qaỹa'ic ca la'at, qam qaico'iita qaỹalecqajanta'guit ana peue nochaua nqohin, chaqai na pan, qam qaca aca lalequete cana pe'taxachigui. ₉Ca' qaica ca 'guii quiyim saqa' rato, loqo'm ca qoỹantauaq. Cá'ogue cajo isecỹac, vire'ta ca lqahic, lapiaate', chaqai caua lauel lase', cá'ogue qaico'iita. ₁₀Chaqai qaica ca no'ueenaqchiỹauec, ỹovira'guit nqai'ñii ca liỹa nete'e. Chaqai no'm 'ue ca no'ueenauec, ca lachiuaq queca norec, copachiu'a. ₁₁Ca ma' qui'ii quecajo qagreta llaalec, qam ñiitañi naua qatoohi, chaqai naua qapelachiri, chaqai lo'xoita'a aca rashillichii, chaqai qui'guiñita'gue ca rqui'ỹaxaguii quecajo isecỹac. Ma' dajo taỹaugui quiyim qaimaqachin ñi qara'gaxala' na' naqata'a na' na'aquipi na Israel llaalqaipi. ₁₂Quecajo pe, ca' shiguelec yá'ogue yi Egipto. Ca' salauat ná'ogue ná'maq ỹi ñaalec quená'ogue ná'maq Egipto laseripi, chaqai ná'ogue ná'maq 'auaxaic llaalec na iseripi. Chaqai sa'ue ca nouaxanaxaset ná'ogue ná'maq lashiilec na Egipto laseripi. Ỹim ra'gaxalari shinac dajo.

₁₃Ca' so neuoripi, ca' chi netanegue' qamiri quiyim tañii' naua ra'aachiri, qaiyi ma' ñalauajñi na llaalec na Egipto laseripi, qam caqamiri, ca' qaica ca ileu. Ca ma' seuana ca leuoripi queca 'imec, ca' sa'iitalec. ₁₄Najo ná'maq na'xa'a ná'maq qamiri sqai 'laxachii. Ca quiyim ỹovire'oga, ca' 'viichii ca nemaqachic lodegaxat, maqachiñitac najo ra'gaxalari. Maqachiñitac 'ñiita'gue meca nelaataxanaxac qaica lqodoc, chicqotougui na neta'allipi, ca queetougui chi ỹovireta'oga ca ñaalqaipi. ₁₅Ca a'guii ma'le na pan qaca aca lalequete caná'maq pe'taxachigui quecaua siete na'xata'. Ca quecá'maq 'auaxaic na'xa'a, ca chaqa'ma' qaca ana nalequetenaxanqate pe'taxachigui na pan quenaua ra'aachiri. Ma' canchaqaica no'm ỹa'ic ca pan 'ue aca lpe'taqate, ca' qaỹoỹoote'oga quena llaalqaipi so Israel. ₁₆Ca' quecajo 'auaxaic na'xa'a chaqai ca pa'aatec quecaua siete na'xata', ca' lapohigui da la'qaatec na ra'gaxalari. Ca' quecauajo na'xata' se qaro'ueenataxañiguilo, qaidaata quiyim chi ỹa'maxajñi ca loq ca qom. ₁₇Ca' ma' ỹovire'oga cajo na'xa'a quiyim qaỹa'ic na pan sqaca lpe'taqate, ca quecajo na'xa'a, ca' 'viichii ca remaqachiguii. Ma' chaqaica cajo na'xa'a viichigui na' ñaqata'alo qamiri quiyi Egipto. Ca ma' ỹovire'oga cajo na'xa'a lotqai 'viichii ca remaqachiguii, ca' chaqaida 'ne'tegue na qachaalaxahipi, sqai 'xañiñi quiyim 'viichitac.

₂₁Ca' so Moisés relaataxane'oga ná'ogue ná'maq mashic qo'xoiquipi queso Israel llaalqaipi. Ca 'naapego':

—Mohi, coñiu'a ca qagretoqui' loqo'm quetaqoqui'. Ca' lauachii, qaiyi quecá'maq chi ni'icoqui' queca na'a' ỹo'uet cá'maq chi lemaqachic. ₂₂Ca' ca leuoripi hueetañigui nqohin ca quiỹoxoqui. Ime, ca' coñiỹa ana peue leenaxat hisopo, coñiriỹata'. Ca' qaillijñigui ca leuoripi, ca' qaỹa'meene' naua'que naua lahise' ca lasom ca qauori. Ca' qaica ca nenoxonec queca 'imec quiyim saqa' richiguiñi. ₂₃Ca ma' ñi qara'gaxala' ma' quelec quiyim nalauajñi na llaalec ỹi na Egipto laseripi, ca iuane'ta ma'le ca leuoripi queca lasom, ca' ỹa'iitalec cajo 'imec. Ca' ñi qara'gaxala' se inoxono nqai'en ma'le ca nalauataxanaq queca qauori. ₂₄Dajo ñilnataxanaxac se napaguiỹalec qamiri chaqai ca qachaalaxahipi. Quiyim ỹovire'oga, ca 'viichii, ca' dajo 'ñiita'gue ca ỹaatqajam nelaataxanaxac qaica lqodoc nqai'ñii. ₂₅Ca ma' noxoñiu'a yi 'laua yí'maq ỹachaxantac ñi qara'gaxala' quiyim ỹaanema qamiri ma'le, ca ma' viri, qam qaiyiita quiitalec 'viichitac dajo nemaqachic. ₂₆Chaqai no'm caua qachaalaxahi inate' qamiri, 'nerac: “¿Negue' cá'maq 'neeto' cá'maq taỹauquio' quen dajo nemaqachic?”, ₂₇ca qamiri 'ñiỹaco' ma'le: “Ñijo isecỹac na' qaỹalauat, ca' qaỹa'ic, taỹaugui quiyim qaimaqachin ñi qara'gaxala'. Ma' ñi'maxare nalauajñi na'le na llaalqaipi na Egipto laseripi, ca ỹa'iitalgoto naua la'aate' na Israel llaalqaipi neeta'ñi yi Egipto. Ca' ca'laxatec na qochaalqaipi.”

Ca' na Israel llaalqaipi ỹa'chi'iñi naua le'cootal, ca' nqouagaxainot ñi qara'gaxala'. ₂₈Ime, ca' sá'ogue eec, ca ỹo'uet dá'ogue dá'maq 'naaco' na'le ñi qara'gaxala' queso Moisés chaqai queso Aarón.

₂₉Ca co'na' mashic pe lauel, ca' ñi qara'gaxala' nalauajñi na 'auaxaic llaalegue' caua noua' quesá'ogue so Egipto laseripi, chaqai qai'neeta so 'auaxaic llaalec so nashi Faraón, chaqai na 'auaxaic llaalec na ncoñiitecseripi neetaugui añi ncoñiitaxanaxaqui, chaqai na 'auaxaic llaalec na neloipi iseripi. ₃₀Ca so Faraón chaqai so lotauaripi chaqai sá'ogue so Egipto laseripi ne'laxashiguim queso pe, ca' ỹaatqajam 'ue da nqui'ic chaqai da naualaxac quiyá'ogue yi Egipto. Qaica ma' 'ue quet ca 'imec sqai hua'ñi quet ca leuaxaic. ₃₁Ca' chaqaicaata ca pe, ca' so Faraón relaataxane'ogalo saua Moisés chaqai so Aarón. Ca 'naaco' quesaua'maxare:

—Mohi, oquii'e najo, noỹoochiuec quena iuo' laseripi qamiri chaqai ná'ogue na Israel llaalqaipi. Mohi, quiipegue' nqouagaxaiñiỹot ca ra'gaxalari, repaguiỹalec dá'maq 'ñiỹac. ₃₂'Xachii qai'neeta ana qalohi qagreta chaqai ana huaca dá'maq viitaque quen. Ca' mohi, oquii. Ca' shiilahi ma'le ñi qota'olec, nqouagaxaiñilec aỹim ma'le.

₃₃Ca' na Egipto laseripi ỹaatqajam iỹalqachit na Israel llaalqaipi quiyim se naỹaloxoren quiyim ca'e yi 'laua, ma' 'neetapigui lauel quiyim sá'ogue ileu. ₃₄Ca' so Israel llaalqaipi ỹaconot aso laqaulata hueetagui ana laqaulataxanaxaqui saqa'laca ana lalequete pe'taxachigui, ca lepachigui quena looỹac, ca i'xat, illiitalgoto naua lallaaco. ₃₅Ca' so qomyipi ipacqajanchigui dá'maq la'qaatec so Moisés. Ca' ỹashiila so Egipto laseripi quena louenec 'oro chaqai na plata, chaqai na nooỹac. ₃₆Ca' ñi qara'gaxala' ỹo'uet quiyim 'naxanaxaraic nqai'en so Egipto laseripi. Ca' ỹaanec ná'ogue ná'maq rashiilaxanaque so Israel llaalqaipi. Ca' quiyi, ca' so Israel llaalqaipi nouoretam so Egipto laseripi.

₃₇Ca' so Israel llaalqaipi co'na' eec, ca'e yi Ramsés que'tegue yi leenaxat Sucot. So'maxare 'uo' ca sham ỹovi' seiscientos mil ỹalliripi co'ueetañi mashic ỹovite' yaua niñaxari quiyim taho quena nouaataxanaq. Qam se qanaloqochin ana 'aalo chaqai na ñaaqaipioqui'. ₃₈Ca' queso qomyipi ỹaatqajam 'xoic so liỹaate'uegue' ỹoreta'oguit qomyipi. Chaqai qai'neeta 'xoic ana qagreta chaqai ana huaca. ₃₉Ca ma' sqaica ca ledaaqa' quiyim ỹo'uet ca nouene' aloq, ma' so Egipto laseripi ỹo'daauec ca'e nqai'en yi 'laua, ca ỹo'uet ana lqueualata ỹachigoxotaugui aso laqaulata quiyi Egipto saqa'laca aca lalequete lpe'taqate.

₄₀So Israel llaalqaipi ỹovi'o' cuatrocientos treinta ñaxari quiyim neetalec yi 'laua Egipto. ₄₁Ca' chaqaiso so na'xa'a na' ỹovi' cuatrocientos treinta ñaxari, ca sá'ogue so nalliripi ñi qara'gaxala' ca'e sojo 'laua Egipto. ₄₂Ca' quesojo pe, ca ñi qara'gaxala' ma' ỹahotaque naqata'a quiyi Egipto, ca' chaqaiso sojo pe lalamaxaret ñi qara'gaxala' quiyim qaimaqachin. Ca' qai'neeta queso Israel llaalqaipi qaica ca laq quesojo pe, ca' chaqaida dá'maq 'neeta quena' ỹovire'oga ca laloqo' quiyim qaimaqachin ñi qara'gaxala'.